ಕನ್ನಡ ಪ್ರೀತಿಯ ಕವನಗಳು

*ಪ್ರಕೃತಿಯೊಳು ಕನ್ನಡಾಕ್ಷರ*

ಸುತ್ತಲೂ ಮುತ್ತಲೂ ಎತ್ತೆತ್ತಲೂ

ಪ್ರಕೃತಿ ಮಾತೆಯು

ಅಕ್ಕರೆಯಿಂದಲಿ ಕನ್ನಡ 

ಅಕ್ಷರ ಅಪ್ಪಿಹಳು

ಬೀಜದ ಮೊದಲ ಚಿಗುರಿನ

ಆಕೃತಿ ಕನ್ನಡ ಅಕ್ಷರ *ಒ*

*ಒ* ಟ್ಟಿಗೆ ಬಾಳುವ ಸಂದೇಶ

ಹೊತ್ತು ನಿಂದಿದೆ

ಚಿಗುರೆಲೆ ಹವಣಿಕೆ

ಅಕ್ಷರ ರೂಪವು *ಶ*

*ಶಂ* ಖನಾದದಲಿ

ನುಡಿ ನಾದವ ಮೊಳಗಿಸಿದೆ

ಒಂದೇ ಪಕಳೆಯ 

ಇಣುಕಿಸಿ ನೋಡುವ

ಮೊಗ್ಗಿನ ರೂಪವು *ಈ*

*ಈ* ಶ್ವರ ಅಲ್ಲಾ ಭಾವವು ಇಲ್ಲ

ಮಾನವ ಧರ್ಮವೇ ನಮಗೆಲ್ಲ

ಅರಳಿದ ಹೂವು ಘಮವನು ಚೆಲ್ಲಿ

ನಿಂದಿದೆ *ಪ* ಅಕ್ಷರ ರೂಪದಲಿ

*ಪ* ರಸ್ಪರ ಪ್ರೀತಿ ಗೌರವ ಮಾತ್ರ

ಕನ್ನಡ ತಾಯಿಯ ಮಂತ್ರ

ಇಂತಹ ಕನ್ನಡ ನಾಡು

ನಾ ನೆಲೆಸಿದ ಬೀಡು

ಸಾಹಿತ್ಯ ಸಂಸ್ಕೃತಿಯ ನೆಲೆವೀಡು

ನನ್ನಭಿಮಾನದ ಗೂಡು

*ಸರ್ವರಿಗೂ ಕನ್ನಡ ರಾಜ್ಯೋತ್ಸವದ ಶುಭಾಶಯಗಳು.*

-ಜಯಶ್ರೀ ರಾಜು, ಬೆಂಗಳೂರು

*****

*ಕನ್ನಡದ ಕಂಪು*

(ಕುಸುಮಷಟ್ಪದಿ)

ಕನ್ನಡದ ಕಂಪಿನಲಿ

ಹೊನ್ನುಡಿಯು ಹರಡುತಿದೆ

ಮುನ್ನುಡಿಯ ಬರೆಯುತ್ತ ಸಾಗುತಿಹೆವು||

ಎನ್ನೆದೆಯ ಬಾಂದಳದಿ

ಚಿನ್ನುಡಿಯ ಹಾಡುತ್ತ

ಬೆನ್ನತ್ತಿ ಕರುನಾಡ ಮಡಿಲಲಿಹೆವು||

ಚಂದನದ ಬೊಂಬೆಯ

ಗಂಧದಲಿ ಮೇಳೈಸಿ

ಬಂಧವನು ಬೆಸೆಯುತ್ತ ಕಾವ್ಯದುಸಿರು

ಅಂದದಲಿ ಚಿಗುರುತ್ತ

ತಂದಿಹೆವು ನವಬರಹ

ಕಂದನಲಿ ಕನ್ನಡದ ಝೇಂಕಾರವ||

ಪಂಪರನ್ನರು ಬರೆದ

ಚಂಪುಕಾವ್ಯ ಗ್ರಂಥ

ಸೊಂಪಲ್ಲಿ ಪಸರಿಸಿ ಪ್ರಜ್ವಲಿಸಿದೆ

ಕಂಪನ್ನು ಹರುಡುತ ಕು

ವೆಂಪು ಕಾವ್ಯ ರಚನೆಯು

ತಂಪನ್ನು ಸೂಸುತಿದೆ ಸುತ್ತೆಲ್ಲವು||

ಮಲ್ಲಿಗೆಯ ಪರಿಮಳವು

ಮೆಲ್ಲನೆ ಹರಡುತಲಿ

ಪಲ್ಲಕ್ಕಿ ಮೆರವಣಿಗೆ ಕನ್ನಡತಿಗೆ

ವಲ್ಲಿಸೀರೆಯು ಚಂದ

ಗಲ್ಲಿಗಲ್ಲಿಯ ಬಂಧ

ಚಲ್ಲಿಹುದು ದುಂದುಬಿಯ ನಾದದೊಳಗೆ||

ಇತಿಹಾಸ ಪುಟದೊಳಗೆ

ಕಥೆಯನ್ನು ಹೇಳುವುದು

ಗತಕಾಲ ಚರಿತೆಯಲು ಲಾಲೈಸಿದೆ

ಜತನದಲಿ ಸಾಗುತ್ತ

ಶತಕದಲು ಮಿಂಚುತಿದೆ

ಪಥದಲಿ ಧೃಢತೆಯನು ಕಾಯ್ದಿರಿಸುತ||

ದಾಸ ಸಾಹಿತ್ಯದಲಿ

ಹಾಸವನು ಮೂಡಿಸುತ

ಬೀಸುತಿದೆ ತಂಗಾಳಿ ಹೊಂಬೆಳಕಲಿ

ಸಾಸಿರಕಥೆಗಳಲ್ಲಿ

ಕಾಶವದು ಕರುನಾಡು

ಕೋಶದಲಿ ಪರಿಪುಷ್ಠಿ ಹೊಂದುತಲಿದೆ||

ಛಂದಸು ಸಾಲಿನಲಿ

ನಂದನದ ವನವಾಗಿ

ಗಂಧವನು ಪಸರಿಸುತ ಬೀಗುತಿರಲು

ವಂದನೆಯ ಮಾಡುತ್ತ

ಬಂದಿಹೆವು ಕರಮುಗಿದು

ಹಂದರದಿ ಕನ್ನಡತಿ ಮೆರೆಯುತಿರಲು||

ಅರಿಶಿನದ ಸಿಂಚನದಿ

ಧರೆಯಲ್ಲಿ ಹೊಳೆದಿಹಳು

ತರುತಿಹಳು ನವಕಾವ್ಯ ಹೊತ್ತಿಗೆಯನು

ಚರಣಗಳಿಗೆರುಗುತಲಿ

ಪರಿಪರಿಯ ವೈಭವವು

ಹರಿದಾಡಿ ಸುರಿಸುತಿದೆ ಹಾಸ್ಯದೊನಲ||

ಕುಂಕುಮದ ಕಾರಂಜಿ

ಕಿಂಕಿಣಿಯ ನಾದದಲಿ

ಪಂಕಜದ ಹಾಸವದು ಬೀಗುತಿಹುದು

ಅಂಕೆಯಲಿ ನಿಲ್ಲುತ್ತ

ಶಂಕೆಯನು ಮಾಡದಯೆ

ಟಂಕಿಸುವ ನೃತ್ಯದಲಿ ಜೊತೆಯಾಗುತ||

ಅಕ್ಷರದ ಮುತ್ತುಗಳು

ಕಕ್ಷೆಯಲಿ ಚಲಿಸುತ್ತ

ತಕ್ಷಶಿಲೆ ರೂಪದಲಿ ರಾರಾಜಿಸಿ

ದಕ್ಷತೆಯ ಮೆರೆಯುತಲಿ

ರಕ್ಷಣೆಯ ಮಾಡುತ್ತ

ಭಕ್ಷಿಗಳ ಶಿಕ್ಷಿಸುತ ಮುನ್ನೆಡೆಯುತ||

-ಅಭಿಜ್ಞಾ ಪಿ ಎಮ್ ಗೌಡ