ಕಾಯಕ ನಿಷ್ಠೆ

ಕರುಳಿನ ಕುಡಿಯನು ಸೊಂಟದಲೇರಿಸಿ

ದುಡಿಮೆಯ ಗೈಯಲು ಹೊರಟಿಹಳು/

ಕಾಯಕ ನಿಷ್ಠೆಯ ತೋರಿಸುತವಳು

ಹೊಟ್ಟೆಗೆ ಅನ್ನವ ಹುಡುಕುವಳು//

ಬಿದಿರಿನ ಬುಟ್ಟಿಲಿ ಗೊಂಬೆಯ ಪೇರಿಸಿ

ಪುರಾಣ ಲೋಕವ ತಂದಿಹಳು/

ರಂಗಿನ ಬಣ್ಣದಿ ಹೊಳೆಯುವ ದೇವರ

ನೋಡುತ ಕೈಯನು ಮುಗಿದಿಹೆವು//

ಸಿಂಬಿಯ ಶಿರದ ಮೇಲೆಯೇ ಇಟ್ಟು

ಭಗವಂತನ ಹೊತ್ತು ತಿರುಗುವ ಗತ್ತು/

ಕಷ್ಟದ ಬದುಕು ಹೊಟ್ಟೆಯ ಪಾಡು

ಮುಖದ ಮುಗುಳ್ನಗೆ ಮಾಸದ ಹೊತ್ತು//

ಅಳುವ ಕಂದಗೆ ಆಸರೆ ನೀಡಿ

ಮೊಗದಲಿ ನಗವನು ತರುತಿಹಳು/

ನಾಸಿಕ ನತ್ತು ಮಿನುಗುವ ಹೊತ್ತು

ಹಣೆಯ ಕುಂಕುಮ ಶೋಭಿಸುತಿರಲು//

ಮನದ ದೃಢತೆ ಕಾಯಕ ನಿಷ್ಠೆಯ

ಮೆಚ್ಚಲೇ ಬೇಕು ನಾವಿಂದು/

ದುಡಿದು ಉಣ್ಣಿರಿ ಸುಖವನು ಕಾಣಿರಿ

ಸಾರುತ ಸಾಗುತ ಹೊರಟಿಹಳಿಂದು//

ನಾರಿಯ ಶಕ್ತಿಗೆ ಕೈಯನು ಮುಗಿವೆ

ದುಡಿಮೆಯೇ ದೇವರು ಎನ್ನುವ ಪರಿಗೆ/

ನೋವಿನ ಎಳೆಯ ತೋರಗೊಡದೆ

ಮಾಸದ ಮುಗುಳ್ನಗೆ ಮೊಗದ ಒಸಗೆ//

-ರತ್ನಾ ಕೆ.ಭಟ್, ತಲಂಜೇರಿ