ಕಾಯಿಲೆಗಳ ಕೂಪ - ಕಾಸ್ಮೆಟಿಕ್ಸ್ !

ಇಂದಿನ ಜೀವನಶೈಲಿಯಲ್ಲಿ ಸೌಂದರ್ಯವರ್ಧಕಗಳು (ಕಾಸ್ಮೆಟಿಕ್ಸ್) ಗಾಬರಿ ಹುಟ್ಟಿಸುವಷ್ಟು ಮಟ್ಟಿಗೆ ಬೆಳೆದು ನಿಂತಿದೆಯೆಂದರೆ ಅತಿಶಯೋಕ್ತಿಯಲ್ಲ. ೩೦-೪೦ ವರ್ಷಗಳ ಹಿಂದೆ ಆಹಾರ, ವಸತಿ, ಉಡುಪು ಆದ್ಯತೆಯ ವಿಷಯಗಳಾಗಿದ್ದವು. ‘ಊಟವಿಲ್ಲದಿದ್ದರೂ ಸೌಂದರ್ಯವರ್ಧಕಗಳನ್ನು ಬಿಡಲಾರೆವು' ಎಂಬುದೇ ಇಂದಿನ ಯುವಜನಾಂಗದ ಮಂತ್ರ! ಯುವಕ-ಯುವತಿಯರು ತಮ್ಮ ಆದಾಯದ ಹೆಚ್ಚು ಭಾಗವನ್ನು ಸೌಂದರ್ಯವರ್ಧಕಗಳಿಗೆ ಖರ್ಚು ಮಾಡುತ್ತಿದೆ. ‘ಸೌಂದರ್ಯವರ್ಧಕಗಳು ಕೇವಲ ಮಹಿಳೆಯರಿಗೆ ಮಾತ್ರ' ಎನ್ನುವ ಕಾಲ ಮಾಯವಾಗಿ ಈಗ ಪುರುಷರೂ ಸೌಂದರ್ಯವರ್ಧಕಗಳ ಬಳಕೆಯಲ್ಲಿ ಸಿಂಹಪಾಲು ಹೊಂದಿದ್ದಾರೆ.

ಘಮಘಮಿಸುವ ಸಾಬೂನುಗಳು, ಉಗುರು ಬಣ್ಣಗಳು (ನೈಲ್ ಪಾಲಿಶ್), ಮುಖಕ್ಕೆ ಹಚ್ಚುವ ಸ್ನೋ, ಪೌಡರ್ ಗಳು, ಕೂದಲಿಗೆ ಹಚ್ಚುವ ಡೈಗಳು, ಲಿಪ್ ಸ್ಟಿಕ್ ಗಳು, ಡಿಯೋಡ್ರೆಂಟ್ ಗಳು, ರಿಫ್ರೆಷರ್, ಮುಖಕ್ಕೆ ಹಚ್ಚುವ ವಿವಿಧ ಕ್ರೀಂ ಗಳು ಒಂದೇ ಎರಡೇ? ಅವರ ದುಡ್ಡು, ಅವರ ಸೌಂದರ್ಯವರ್ಧಕಗಳು ನಿಮ್ಮದೇನು ಅನ್ನುವಿರಾ? ಆದರೆ ವಿಷಯ ಅದಲ್ಲ, ಅವು ತರುವ ಗಂಭೀರ ಕಾಯಿಲೆಗಳು ! ಇದನ್ನು ಕೇಳಿದ ಮೇಲೆ ನೀವು ಇನ್ನೂ ಇವುಗಳನ್ನು ಬಳಸುವಿರಾದರೆ ನಮ್ಮ ಅಭ್ಯಂತರವೇನಿಲ್ಲ ! ಈ ಸೌಂದರ್ಯವರ್ಧಕಗಳಿಂದ ಅಲರ್ಜಿ, ಕ್ಯಾನ್ಸರ್, ಚರ್ಮದ ವಿವಿಧ ತೊಂದರೆಗಳು, ವಂಶವಾಹಿ ತೊಂದರೆಗಳು, ಜೀವವಿಕೃತಿಗಳು, ಉಸಿರಾಟದ ತೊಂದರೆಗಳು ಮುಂತಾದ ಕಾಯಿಲೆಗಳು ಶತಸ್ಸಿದ್ಧ. 

ಈ ಸೌಂದರ್ಯವರ್ಧಕಗಳ ತಯಾರಿಕೆ ಅಪಾಯಕಾರಿ ಎನ್ನುವ ಮಟ್ಟಕ್ಕೆ ಬೆಳೆದು ನಿಂತಿರುವುದಕ್ಕೆ ಕಾರಣ ಇವುಗಳ ತಯಾರಿಕೆಗೆ ನಿರ್ಭಂಧಗಳು ಅಥವಾ ಕಾನೂನು ಕಟ್ಟಳೆಗಳು ಇಲ್ಲದೇ ಇರುವುದು. ನಿಮಗೆ ಗೊತ್ತಿರಲಿ, ಯಾವುದೇ ಸೌಂದರ್ಯ ಸಾಧಕಗಳು ಮಾರುಕಟ್ಟೆಗೆ ಬರುವ ಮುನ್ನ ಅವುಗಳನ್ನು ಪರೀಕ್ಷಿಸುವ ವಿಧಾನಗಳೇ ಇಲ್ಲ. ಹೀಗಾಗಿ ಇಂದು ಸೌಂಧರ್ಯವರ್ಧಕಗಳ ತಯಾರಕರು ಅಪಾರ ಹಣವನ್ನು ಯಾವುದೇ ಕಟ್ಟಳೆಗಳಿಲ್ಲದೆ ಗಳಿಸಿ, ಯುವಜನಾಂಗವನ್ನು ಕಾಯಿಲೆಗಳ ಕೂಪಕ್ಕೆ ತಳ್ಳುತ್ತಿವೆ!

ಫೆಡರಲ್ ಡ್ರಗ್ ಅಂಡ್ ಕಾಸ್ಮೆಟಿಕ್ಸ್ ಆಕ್ಟ್ಸ್ ಎಂಬ ಸಂಸ್ಥೆ ಸೌಂದರ್ಯವರ್ಧಕಗಳ ಮೇಲೆ ನಿಯಂತ್ರಣ ಹೇರುವ ಅಧಿಕಾರವಿದ್ದರೂ ಅದನ್ನು ಸಮರ್ಪಕವಾಗಿ ಬಳಸದೇ ಇರುವುದು ದುರ್ದೈವದ ಸಂಗತಿಯೇ ಸರಿ. ಒಂದು ಸರ್ವೆಯ ಪ್ರಕಾರ ಇಂದು ಸೌಂದರ್ಯವರ್ಧಕಗಳಲ್ಲಿ ೮೮೪ಕ್ಕಿಂತಲೂ ಅಧಿಕ ವಿಷಯುಕ್ತ ರಾಸಾಯನಿಕಗಳನ್ನು ಬಳಸಲಾಗುತ್ತದೆ.

ಪ್ರತಿಯೊಂದು ತಯಾರಿಕೆಯಲ್ಲೂ ಉದ್ಯಮಗಳು ತಮ್ಮ ಉತ್ಪನ್ನಕ್ಕೆ ತಮ್ಮದೇ ಆದ ನಿಯಂತ್ರಣಗಳನ್ನು ಹೇರಿಕೊಂಡು ಉತ್ತಮ ಗುಣಮಟ್ಟದ ಉತ್ಪನ್ನಗಳನ್ನು ಗ್ರಾಹಕರಿಗೆ ಕೊಡಲು ಪೈಪೋಟಿಯನ್ನೇ ನಡೆಸುತ್ತವೆ. ಆದರೆ ಸೌಂದರ್ಯವರ್ಧಕ ಉದ್ಯಮಗಳು ಮಾತ್ರ ಕನಿಷ್ಟ ಮಟ್ಟದ ನಿಯಂತ್ರಣಗಳನ್ನೂ ಪಾಲಿಸುತ್ತಿಲ್ಲ. ಇಂದು ಸುಮಾರು ೪-೫ ಸಾವಿರ ಸೌಂದರ್ಯವರ್ಧಕ ತಯಾರಕರಲ್ಲಿ ಶೇಕಡ ೩ ರಷ್ಟು ಸಂಸ್ಥೆಗಳು ಮಾತ್ರ ಕೆಲವು ನಿಯಮಗಳನ್ನು ಅಳವಡಿಸಿಕೊಂಡಿವೆ. ಅಲ್ಲದೆ ಇವುಗಳಲ್ಲಿ ಕೇವಲ ೨೦೦೦ ರಿಂದ ೨೫೦೦ ತಯಾರಿಕಾ ಸಂಸ್ಥೆಗಳು ಮಾತ್ರ ನೋಂದಣೆಯನ್ನು ಪಡೆದಿವೆ.

೧೯೯೦ರಲ್ಲಿ ಅಮೇರಿಕ ಒಂದರಲ್ಲೇ ಸುಮಾರು ೩೮ ಸಾವಿರ ಮಂದಿ ಸೌಂದರ್ಯವರ್ಧಕಗಳ ಬಳಕೆಯಿಂದ ತೊಂದರೆಗಳನ್ನು ಅನುಭವಿಸಿದರು. ಅವರೆಲ್ಲ ಇದರ ವೈದ್ಯಕೀಯ ವೆಚ್ಚಕ್ಕೆ ಅಪಾರ ಹಣವನ್ನು ವೆಚ್ಚ ಮಾಡಿದರು. ಕ್ಯಾನ್ಸರ್, ಅಲರ್ಜಿ, ಶ್ವಾಸಕೋಶದ ತೊಂದರೆ, ಕಣ್ಣುಗಳಿಗೆ ಹಾನಿ, ಒಂದೇ ಎರಡೇ... ನೂರಾರು ರೀತಿಯ ತೊಂದರೆಗಳನ್ನು ಅವರೆಲ್ಲಾ ಇಂದಿಗೂ ಅನುಭವಿಸುತ್ತಿದ್ದಾರೆ.

ಮಾನವ ಚರ್ಮ ಅತ್ಯಂತ ಸೂಕ್ಷ್ಮ. ಅಲ್ಲದೆ ಅದು ವಸ್ತುಗಳನ್ನು ಹೀರಿಕೊಳ್ಳುವ ಗುಣವನ್ನು ಹೊಂದಿದೆ. ನೀವು ಹಚ್ಚುವ ಎಲ್ಲ ಸೌಂದರ್ಯವರ್ಧಕಗಳೂ ಚರ್ಮದ ಮೂಲಕ ದೇಹವನ್ನು ಸೇರುತ್ತವೆ. ಕೆಲವಂತೂ ಬಹಳ ವೇಗವಾಗಿ ಚರ್ಮದ ಮೂಲಕ ತೂರಿಹೋಗುತ್ತವೆ. ಬಹಳ ಕಾಲ ಬಳಸುವ ಮುಖಕ್ಕೆ ಹಚ್ಚುವ ಕ್ರೀಂಗಳಂತೂ ಹೆಚ್ಚು ದುಷ್ಪರಿಣಾಮವನ್ನು ಬೀರುತ್ತವೆ. ಬಹುತೇಕ ಸೌಂದರ್ಯವರ್ಧಕಗಳಲ್ಲಿ ಶೇಕಡ ೧೩ರಷ್ಟು ‘ಬ್ಯೂಟೈಲೇಟ್ ಹೈಡ್ರಾಕ್ಸಿಟಾಲಿನ್' ಹಾಗೂ ಶೇಕಡ ೪೯ರಷ್ಟು ಪ್ರಮುಖ ಕೀಟನಾಶಕ ಡಿ ಡಿ ಟಿಯನ್ನು ಬಳಸಲಾಗುತ್ತದೆ. ಈ ಎರಡೂ ಭೀಕರ ರಾಸಾಯನಿಕಗಳು.

ಹೆಚ್ಚಿನ ಸೌಂದರ್ಯವರ್ಧಕಗಳಲ್ಲಿ ‘ಡೈ ಈಫನೋಮೈನ್' ಮತ್ತು ‘ಟ್ರೈ ಈಥನೋಲಮೈನ್' ಬಳಸಲಾಗುತ್ತಿದೆ. ಈ ರಾಸಾಯನಿಕಗಳು ಕ್ಯಾನ್ಸರ್ ತರುವಂಥ ವಸ್ತುಗಳು ಎಂಬುದು ಧೃಢಪಟ್ಟಿದೆ. ಪ್ರಸಿದ್ಧ ಬ್ರ್ಯಾಂಡಿನ ಮಕ್ಕಳ ಸೌಂದರ್ಯವರ್ಧಕಗಳಲ್ಲಿ ಅತ್ಯಂತ ಅಪಾಯಕಾರಿಯಾದ ‘ಬ್ರೋನೋಪಾಲ್' ರಾಸಾಯನಿಕವನ್ನು ಬಳಸಲಾಗುತ್ತಿದೆ. ಆದರೆ ಈ ಕಂಪನಿ ಮಾತ್ರ ಈ ಸತ್ಯವನ್ನು ಮರೆಮಾಚಿ ಕೇವಲ ಸ್ವಾಭಾವಿಕ ಪರಿಸರದ ವಸ್ತುಗಳನ್ನು ಬಿಡುಗಡೆ ಮಾಡುವುದಾಗಿ ಬೊಗಳೆ ಬಿಡುತ್ತಿದೆ.

ನೀವು ಬಳಸುವ ಹೇರ್ ಡೈಗಳಲ್ಲಿ, ಶಾಂಪೂಗಳಲ್ಲಿ, ಹೇರ್ ಕಂಡೀಷನರ್ ಗಳಲ್ಲಿ, ಹೊಟ್ಟು ನಿವಾರಕಗಳಲ್ಲಿ, ಲೋಷನ್ ಗಳಲ್ಲಿ, ಕ್ರೀಮುಗಳಲ್ಲಿ, ಸುಗಂಧ ಭರಿತ ಸಾಬೂನುಗಳಲ್ಲಿ ಅತ್ಯಂತ ಅಪಾಯಕಾರಿ ‘೧-೨ ಡಯಾಕ್ಸೇನ್' ಎಂಬ ರಾಸಾಯನಿಕವನ್ನು ಬಳಸಲಾಗುತ್ತಿದೆ. ಇದು ಅತ್ಯಂತ ವೇಗವಾಗಿ ಆವಿಯಾಗುವ ರಾಸಾಯನಿಕ. ಇದು ಚರ್ಮದ ಮೂಲಕ ಹಾಗೂ ಉಸಿರಾಟದ ಮೂಲಕ ಬಹಳ ವೇಗವಾಗಿ ದೇಹವನ್ನು ಸೇರುತ್ತದೆ. ಈ ರಸಾಯನಿಕವನ್ನು ಇಲಿಗಳ ಮೇಲೆ ಪ್ರಯೋಗಿಸಿದಾಗ ಶ್ವಾಸಕೋಶದ ಹಾಗೂ ಯಕೃತ್ ಗಳ ಕ್ಯಾನ್ಸರ್ ಆಯಿತು. 

ಈ ಸೌಂದರ್ಯವರ್ಧಕಗಳಲ್ಲಿ ಬಳಸುವ ಬಣ್ಣಗಳಾದ ಬ್ಲೂ-೧, ಗ್ರೀನ್ - ೩, ಡಿ ಆಂಡ್ ಸಿ -೩೩, ಯೆಲ್ಲೋ ೫-೬, ಚರ್ಮದ ಕ್ಯಾನ್ಸರ್ ಗೆ ಖಂಡಿತ ನಾಂದಿ ಹಾಡಬಲ್ಲವು. ನೀವು ಬಳಸುವ ಹೇರ್ ಡೈಗಳಲ್ಲಿ ಅದರಲ್ಲೂ ಕಪ್ಪು ಮತ್ತು ಕಂದು ಬಣ್ಣದ ಹೇರ್ ಡೈಗಳಲ್ಲಿ ಕ್ಯಾನ್ಸರ್ ತರುವಂತಹ ರಾಸಾಯನಿಕಗಳಿವೆ. ಇವು ಲಿಂಫೋಮಾ, ಮಲ್ಟಿಪಲ್ ಮೈಲೋಮಾದಂತಹ ಭೀಕರ ಕ್ಯಾನ್ಸರ್ ರೋಗಗಳನ್ನು ತರಬಲ್ಲವು. ನಾವು ಪ್ರೀತಿಯಿಂದ ಬಳಸುವ ಟಾಲ್ಕಂ ಪೌಡರ್ ಕೂಡ ಅಪಾಯಗಳನ್ನು ತರಬಲ್ಲದು ಎಂದರೆ ನೀವು ನಂಬುತ್ತೀರಾ?

ಏನೇ ಆಗಲಿ, ಈ ಸೌಂದರ್ಯವರ್ಧಕ ತಯಾರಕರ ಮೇಲೆ, ರಾಷ್ಟ್ರೀಯ ಹಾಗೂ ಅಂತರಾಷ್ಟ್ರೀಯ ಮಟ್ಟದಲ್ಲಿ ನಿಯಂತ್ರಣ ಮತ್ತು ಕಾನೂನುಗಳನ್ನು ಹೇರುವುದು ಅತ್ಯಗತ್ಯ. ಇಂದಿನ ಯುವಜನಾಂಗ ಕೇವಲ ಜಾಹೀರಾತಿಗೆ ಮರುಳಾಗದೇ ಒಳಿತು-ಕೆಡುಕುಗಳನ್ನು ವಿಮರ್ಶಿಸಿ ಸೌಂದರ್ಯವರ್ಧಕಗಳನ್ನು ಬಳಸುವುದು ತುಂಬಾ ಒಳ್ಳೆಯದು. 

-ಕೆ. ನಟರಾಜ್, ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ