ಕುಂಭ ಮೇಳ

(ಲಲಿತ ಲಯ ಚೌಪದಿ)

ನಂಬಿರುವ ದೈವ ಭಕ್ತರು ಭರತ ಖಂಡದಲಿ

ತುಂಬ ಹುರುಪಿನಲಿ ಯಾತ್ರೆಯ ನಡೆಸುತ|

ಮುಂಬರುವ ದಿನಗಳಲಿ ಜೊತೆಗೆ ಸೇರುತ ಮಹಾ

ಕುಂಭ ಮೇಳದಲುತ್ಸುಕತೆ ತೋರುತ ||೧||

ತುಂಬಿರಲು ಕೋಟಿ ಜನ ಜಂಗುಳಿಯು ಸಂತಸದಿ

ತುಂಬಿ ಹರಿಯುತಿಹ ನದಿಯಲ್ಲಿ ಮಿಂದು|

ಚೆಂಬಿನಲಿ ಪಾವನದ ತೀರ್ಥವಂ ಶ್ರದ್ಧೆಯಲಿ

ತುಂಬುವರು ತಲೆಯಲ್ಲಿ ನಡೆದು ಮುಂದು ||೨||

ನಂಬಿಕೆಯ ಸಮ್ಮಿಲನವಾಗಿರಲು ದೇಶದೊಳು

ಕುಂಭ ಮೇಳವು ವಿಶೇಷವೆನಿಸುತಲಿ|

ಬೆಂಬಲಿಸುತಲಿ ಮಂದಿ ನಡೆದಾಡಿ ಹಗಲಿರುಳು

ತುಂಬು ಹೃದಯದಲಿ ಸಹಕರಿಸುತ್ತಲಿ||೩||

ಅಂಬರವನುಟ್ಟಿರುವ ಸಂನ್ಯಾಸಿಗಳ ಕೂಟ

ಹೊಂಬಿಸಿಲಿನಲಿ ಮೆರೆವಣಿಗೆ ನಡೆಸುತ|

ಅಂಬಿಗರು ನಾವೆಯ ವಿಹಾರ ನಡೆಸುವ ನೋಟ

ತುಂಬುವುದು ಹೃನ್ಮನಗಳನು ಸಂತತ||೪||

ಕೊಂಬು ಕಹಳೆಯ ಜೊತೆಗೆ ಶಂಖ ಜಾಗಟೆ ನಾದ

ಬಿಂಬಿಸುತ ಕ್ಷೇತ್ರ ಪ್ರಯಾಗದಲ್ಲಿ|

ಕುಂಭಮೇಳದ ವೈಭವಕ್ಕೆ ಸರಿಸಾಟಿಯ ವಿ-

-ಜೃಂಭಣೆಯು ಬೇರಿಲ್ಲ ವಿಶ್ವದಲ್ಲಿ ||೫||

- ಎ. ಕೇಶವರಾಜ್

ಚಿತ್ರ ಕೃಪೆ: ಎ. ಮುರಳೀಧರ