ಕೆ.ಪಿ.ಭಟ್ಟರ ‘ಈ ಮರದ ನೆರಳಿನಲಿ’ - ಭಾಗ ೧೨

ರಾಗವಾವುದೊ…

ರಾಗವಾವುದೊ ತಾಳವಾವುದೊ

ಹಾಡನಂತೂ ಹಾಡುವೆ

ಕೇಳುಗರ ಮನ ತಣಿಯದಿದ್ದರು

ತಣಿದರೂ ನಲಿದಾಡುವೆ !

ನನ್ನ ಹಾಡನು ತೇಲಿ ಬಿಡುವೆನು

ಹೊತ್ತು ನಡೆವನು ಮಾರುತ

ಸುತ್ತಲೆಲ್ಲಾ ತೂರಿ ಕೊಡುವನು

ಹಾಡಿನೊಸಗೆಯ ಸಾರುತ !

ನಾ ಕಲಾವಿದನೆಂಬ ಹೆಸರನು 

ಪಡೆದೆನೆಂದೋ ಅಂದಿಗೆ ;

ಬಿಟ್ಟಿಹೆನು ಜನಜಂಗುಳಿಯ ಮನ-

ದಿಂದ ಬರುತಿಹ ನಿಂದಗೆ !

ನಾ ಕಲಾವಿದ ನನ್ನ ಜೀವನ

ಕಲೆಗೆ ಮೀಸಲಾಗಿದೆ ;

ನನ್ನ ಜೀವನದೊಳಿತು ಕೆಡುಕುಗ-

ಳೆಲ್ಲ ಕಲೆಗೇ ಸೇರಿದೆ ;

ನಾನು ನಂಬಿದ ಕಲೆಯ ಬದುಕಿಗೆ

ಸಾನುರಾಗದ ಬೆಂಬಲ ;

ಕೋದುಕೊಂಡುದೆ ಧನ್ಯತೆಯ ಛಲ

ಮಾಸಿಹೋಗದ ಹಂಬಲ !

***

ರಾವಣ

ಹತ್ತು ಮುಖಗಳನು ಹೊತ್ತ ರಾವಣನಿ-

ಗಿತ್ತೆ ಸ್ವಸ್ಥ ಚಿತ್ತ?

ಮತ್ತೆ - ಮತ್ತೆ ಭುಗಿಲೆದ್ದ ಕಾಮನೆಗ-

ಳತ್ತ ಅವನು ವ್ಯಸ್ಥ !

ಸರ್ವಶಕ್ತನೆಂದೆನಿಸಿಕೊಂಡರೂ

ಮನಸಿಗಿರದ ಹಿಡಿತ ;

ಗರ್ವದಿಂದ ತುಂಬಿರುವ ಬುದ್ಧಿ-

ಗಾಸರೆಯು ಬಿಡದ ತುಡಿತ !

ಹತ್ತು ಮುಖಗಳನು ಹುತ್ತವಾಗಿ ಬೆಳೆ-

ದಿರುವ ದುಷ್ಟ ಬುದ್ಧಿ ;

ಸುತ್ತುತ್ತಿತ್ತು ಸುಳಿಯಾಗಿ ಸುತ್ತಿ

ಬಳಿಕಲ್ಲಿ ಇಷ್ಟಸಿದ್ಧಿ !

ಸುಪ್ತವಾಗಿ ಬೆಳೆದಿರುವ ಕಾಮನೆಗೆ

ಇಲ್ಲದಿರುವ ಹಿಡಿತ ;

ಸ್ವಸ್ಥವಲ್ಲದಸ್ವಸ್ಥ ಭಾವನೆಗೆ

ಸಲ್ಲದಂಥ ತುಡಿತ !

ಹತ್ತು ಮುಖಗಳನು ಹೊತ್ತ ರಾವಣನಿಗೆ 

ಇತ್ತೆ ಸ್ವಸ್ಥ ಚಿತ್ತ ?

ಹೊತ್ತಿಕೊಂಡ ಕಾಮನೆಯ ಕಾಮಲೆಗೆ

ಅವನು ವ್ಯಸ್ತ - ವ್ಯಸ್ತ !