ಕೆ.ಪಿ.ಭಟ್ಟರ ‘ಈ ಮರದ ನೆರಳಿನಲಿ’ - ಭಾಗ ೧೩

ಮಲ್ಲಿಗೆ, ಸಂಪಿಗೆ, ಸೇವಂತಿಕೆ

ಯಾರನ್ನು ಮೆಚ್ಚಿಸಲು ನೀನಿಂತು ಅರಳಿರುವೆ

ಮಲ್ಲಿಗೆಯೆ, ಸಂಪಿಗೆಯೆ, ಸೇವಂತಿಗೆ?

ಊರೆಲ್ಲ ಕಮನೀಯ ಕಂಪುಗಳ ಕಂಪನದಿ

ಉಲ್ಲಸಿತಗೊಳಿಸುವೀ ಜೀವಂತಿಕೆ !

ಮಲ್ಲಿಗೆಯೆ ನಿನ್ನರಳು ಚೆಲ್ಲಿರುವ ಹೂಗಂಪು

ಮನವನ್ನು ಮುದಗೊಳಿಪ ಶ್ರೀಮಂತಿಕೆ

ಅಲ್ಲಿಗೆಯೆ ಮುಗಿದಿಲ್ಲ ಮಲ್ಲಿಗೆಯ ನಿನ್ನ ನೆಲೆ

ಕನಸಿಗರ ಕಾಮನೆಯ ಕೈದೀವಿಗೆ !

ಸಂಪಿಗೆಯ ಕಂಪಿನಲಿ ನಿನಗಾರು ಎಣೆಯುಂಟು

ಕಂಪನಕೆ ಕೈರವವ ಸೂಸುವಲ್ಲಿ?

ಕಂಪೆಸೆವ ಕೈಂಕರ್ಯದಲ್ಲಿ ನಿನ್ನದೆ ಹಿರಿಯ

ಹೆಸರುಂಟು ತೀವ್ರತೆಯ ಓಘದಲ್ಲಿ !

ಸೇವಂತಿಕೆಯ ನಿನ್ನ ಸಿರಿವಂತಿಕೆಯ ನೋಟ

ಅರಿವಂತೆ ಇರುವಂಥ ಮುದಗಾರಿಕೆ

ಶಾಂತ-ಸುಂದರ-ಸ್ನಿಗ್ಧತನವು ತುಂಬಿರುವಂಥ

ಮುಗ್ಧ ಮುಖವನು ಹೊತ್ತು ಇರುವಂತಿಕೆ !

ಯಾರನ್ನು ಮೆಚ್ಚಿಸಲು ನೀನಂತು ಅರಳಿರುವೆ

ಮಲ್ಲಿಗೆಯೆ, ಸಂಪಿಗೆಯೆ, ಸೇವಂತಿಕೆ

ಊರೆಲ್ಲ ನಿಮ್ಮನ್ನು ಮನದುಂಬಿ ಸ್ಮರಿಸುತ್ತ

ಗೌರವವ ತೋರಿಸುವ ದೊಡ್ಡಸ್ತಿಕೆ !

***

ತಿಂಗಳ ಬಂದನು

ತಿಂಗಳ ಬಂದನು ಕಂಗೊಳಿಸುತ ಬೆಳ-

ದಿಂಗಳ ಹರಡುತ್ತ ;

ಕಣ್ಮನ ತಣಿಸುವ ಮಂದದ ಬೆಳಕನು 

ಅಂದದಿ ಸೂಸುತ್ತ !

ತಿಳಿಗೊಳದಲಿ ಪ್ರತಿಬಿಂಬವ ಮೂಡಿಸಿ

ನಲಿವಿನ ನೆಲೆ ಅಲ್ಲಿ ;

ಚಿರುರೆಲೆ-ಹೂಬನಗಳ ತಾ ಮುದ್ದಿಸಿ

ಒಲವಿನ ಸೆಲೆ ಚೆಲ್ಲಿ !

ಮೆಲುಗಾಳಿಯ ಮನತಣಿಯುವ ಸಂಭ್ರಮ

ಪಡಿ ಮೂಡುವುದಲ್ಲಿ ;

ಚೆಲುವಿನ ಹೂಗಿಡ-ಮರ ಲತೆಗಳಿಗೂ

ಸಡಗರವಿಹುದಲ್ಲಿ !

ನೆತ್ತಿಯ ಮೇಲೇರಿದನದೊ ಚಂದಿರ

ಅತ್ತ ಹರಿಸು ದೃಷ್ಟಿ ;

ಸುತ್ತಲು ಬತ್ತಲೆ ಆಕಾಶದ ನೆಲೆ

ಚಿತ್ತಹರಣ ಸೃಷ್ಟಿ !

ತಿಂಗಳ ಬಂದನು ಕಂಗೊಳಿಸುತ ಬೆಳ-

ದಿಂಗಳ ಹರಡುತ್ತ ;

ಕಣ್ಮನ ತಣಿಸುವ ಮಂದದ ಬೆಳಕನು 

ಅಂದದಿ ಸೂಸುತ್ತ !

***