ಗಿಲ್ಗಮೆಶ್ ಮಹಾಗಾಥೆ

ಜಗತ್ತಿನ ಅತ್ಯಂತ ಪ್ರಾಚೀನ ಕತೆಯಾದ 'ಗಿಲ್ಗಮೆಶ್ ಮಹಾಗಾಥೆ' ಹೊಸ ಗದ್ಯರೂಪದ ಅನುವಾದ ಪ್ರಕಾರದಲ್ಲಿ ಪ್ರಕಟವಾಗಿದೆ . ಮೆಸೊಪೊಟೇಮಿಯಾದ ಈ ಮಹಾಗಾಥೆ ಎಲ್ಲ ಕಾಲ, ದೇಶ, ಭಾಷೆಗಳನ್ನು ಮೀರಿದ ವಿಚಾರಗಳಾದ ಗೆಳೆತನ, ಹುಟ್ಟು ಸಾವಿನ ನಡುವಿನ ಬದುಕಿನ ಅರ್ಥ ಅರಸುವ ಹಂಬಲ, ಸಾವಿನ ಅಂಜಿಕೆ ಹಾಗೂ ಸಾವನ್ನು ಗೆಲ್ಲಬೇಕೆನ್ನುವ ನಿರಂತರ ಪ್ರಯತ್ನಗಳ ಸುಂದರ ಕಾವ್ಯಾತ್ಮಕ ನಿರೂಪಣೆಯಾಗಿದೆ. ಸಾವಿನ ಹೆದರಿಕೆ ಹಾಗೂ ಹೇಗಾದರೂ ಅದನ್ನು ಗೆಲ್ಲಬೇಕು, ಅಮರತ್ವ ಸಾಧಿಸಬೇಕೆಂದು ಹೊರಡುವ ಗಿಲ್ಗಮೆಶ್‌ನ ಚಡಪಡಿಕೆ ಮತ್ತು ಅವನಿಗೆ ಈ ಜಗತ್ತೇ ನಶ್ವರ, ಹುಟ್ಟಿದ ಕ್ಷಣವೇ ಸಾವೆಂಬುದು ಖಚಿತ ಎಂದು ಅವನಿಗೆ ತಿಳಿಹೇಳುವ, ಹುಟ್ಟು ಸಾವುಗಳ ನಡುವಿನ ಬದುಕಿನ ಪ್ರತಿಕ್ಷಣವನ್ನೂ ಸಹಬಾಳ್ವೆಯಿಂದ, ಪ್ರೀತಿ, ಪ್ರೇಮದಿಂದ ಬದುಕುವುದೇ ಸಾರ್ಥಕ ಜೀವನ ಎನ್ನುವುದನ್ನು ಸಹ ಆ ಕೃತಿ ಮನದಟ್ಟು ಮಾಡುತ್ತದೆ.

ಈ ಕೃತಿಯನ್ನು ಆಂಗ್ಲಭಾಷೆಯಿಂದ ಕನ್ನಡಕ್ಕೆ ಅನುವಾದ ಮಾಡಿದ್ದಾರೆ ವಿಶಿಷ್ಟ ಕೃತಿಕಾರ ಡಾ. ಜೆ. ಬಾಲಕೃಷ್ಣ. ಲೇಖಕ, ಅನುವಾದಕ ಹಾಗೂ ವ್ಯಂಗ್ಯಚಿತ್ರಕಾರರಾದ ಡಾ. ಜೆ. ಬಾಲಕೃಷ್ಣ ಅವರು ಬ್ಯಾಂಕ್ ಅಧಿಕಾರಿಯಾಗಿ ನಂತರ ಬೆಂಗಳೂರು ಕೃಷಿ ವಿ. ವಿ.ಯ ಕನ್ನಡ ಅಧ್ಯಯನ ವಿಭಾಗದ ಪ್ರಾಧ್ಯಾಪಕ/ಮುಖ್ಯಸ್ಥರಾಗಿ ಸೇವೆ ಸಲ್ಲಿಸಿದ್ದಾರೆ. 

ಗಿಲ್ಗಮೆಶ್ ಮಹಾಗಾಥೆ ನಮಗೆ ದಕ್ಕಿರುವ ಸಾವಿರಾರು ವರ್ಷಗಳ ಹಿಂದಿನ ಅತ್ಯಂತ ಹಳೆಯ ಕತೆಯೊಂದಾಗಿದೆ. ಅದು ಬೈಬಲ್, ಈಲಿಯಡ್ ಹಾಗೂ ಒಡಿಸ್ಸಿಗಳಿಗಿಂತ ಹಳೆಯದು. ಜರ್ಮನ್ ಕವಿ ರೈನರ್ ಮರಿಯಾ ರಿಲ್ಕ್ ೧೯೧೬ರಲ್ಲಿ "ಗಿಲ್ಗಮೆಶ್ ಒಂದು ಮಹಾನ್ ವಿಸ್ಮಯಕಾರಿ ಗಾಥೆ" ಎಂದು ಹೇಳಿದ್ದನಂತೆ. ರಿಲ್ಕ್ ಈ ಬ್ಯಾಬಿಲೋನಿಯನ್ ಮಹಾಗಾಥೆಯಿಂದ ಅದೆಷ್ಟು ಪ್ರಭಾವಿತನಾಗಿದ್ದನೆಂದರೆ ತಾನು ಭೇಟಿಯಾಗುವ ಎಲ್ಲರಿಗೂ ಅದರ ಕತೆಯನ್ನು ಉತ್ಸಾಹದಿಂದ ಹೇಳುತ್ತಿದ್ದ. ಆತನನ್ನೂ ಕಾಡಿದ್ದು ಆ ಮಹಾಕಾವ್ಯದ ಅಂತರಾಳವಾದ ಸಾವಿನ ಹೆದರಿಕೆ. ಸಾವು ಮತ್ತು ಅದನ್ನು ಗೆದ್ದು ಅಮರತ್ವ ಸಾಧಿಸುವ ಪ್ರಯತ್ನದ ಸೆಣಸಾಟ ಮಾನವನನ್ನು ಹಾಗೂ ಆ ಪ್ರಯತ್ನಗಳನ್ನು ವರ್ಣರಂಜಿತವಾಗಿ ದಾಖಲಿಸಿದ ಕವಿಗಳನ್ನು ಶತಶತಮಾನಗಳಿಂದ ಕಾಡುತ್ತಿದೆ. ಸಾವಿನ ಹೆದರಿಕೆ ಹಾಗೂ ಹೇಗಾದರೂ ಅದನ್ನು ಗೆಲ್ಲಬೇಕು, ಅಮರತ್ವ ಸಾಧಿಸಬೇಕೆಂದು ಹೊರಡುವ ಗಿಲ್ಲಮೆಶ್‌ನ ಚಡಪಡಿಕೆ ಮತ್ತು ಅವನಿಗೆ ಈ ಜಗತ್ತೇ ನಶ್ವರ, ಹುಟ್ಟಿದ ಕ್ಷಣವೇ ಸಾವೆಂಬುದು ಖಚಿತ ಎಂದು ಅವನಿಗೆ ತಿಳಿಹೇಳುವ, ಹುಟ್ಟು ಸಾವುಗಳ ನಡುವಿನ ಬದುಕಿನ ಪ್ರತಿಕ್ಷಣವನ್ನೂ ಸಹಬಾಳ್ವೆಯಿಂದ, ಪ್ರೀತಿ, ಪ್ರೇಮದಿಂದ ಬದುಕುವುದೇ ಸಾರ್ಥಕ ಜೀವನ ಎನ್ನುವುದನ್ನು ಸಹ ಆ ಕೃತಿ ಮನದಟ್ಟು ಮಾಡುತ್ತದೆ. ಸುಮಾರು ನಾಲ್ಕು ಸಾವಿರ ವರ್ಷಗಳ ಹಿಂದೆ ಮೆಸೊಪೊಟೇಮಿಯಾದಲ್ಲಿ (ಈಗಿನ ಇರಾಕ್ ಮತ್ತು ಸಿರಿಯಾ) ರಚಿತವಾದ ಗಿಲ್ಲಮೆಶ್ ಮಹಾಗಾಥೆ ಜಗತ್ತಿನ ಒಂದು ಅತ್ಯಂತ ಪ್ರಾಚೀನ ಮಹಾಕಾವ್ಯವಾಗಿದೆ. ಪ್ರಾರಂಭದಲ್ಲಿ ಈ ಮಹಾಕಾವ್ಯ ಮೌಖಿಕ ರೂಪದಲ್ಲಿತ್ತು ಹಾಗೂ ಸುಮಾರು ಎರಡು ಸಾವಿರದ ಏಳುನೂರು ವರ್ಷಗಳ ಹಿಂದೆ ಲಿಖಿತ ರೂಪದಲ್ಲಿ ದಾಖಲಾಯಿತು ಹಾಗೂ ಜಗತ್ತಿಗೆ ಕಣ್ಮರೆಯಾಗಿ ಸುಮಾರು ಎರಡು ಸಾವಿರ ವರ್ಷಗಳು ಜನಮಾನಸದಿಂದ ಮರೆಯಾಯಿತು ಹಾಗೂ ಪುನಃ ಹತ್ತೊಂಭತ್ತನೇ ಶತಮಾನದಲ್ಲಿ ನಮ್ಮ ಈಗಿನ ಜಗತ್ತಿಗೆ ಪುನಃ ಪರಿಚಯವಾಯಿತು.

ಗಿಲ್ಗಮೆಶ್ ಮಹಾಗಾಥೆ ಗಿಲ್ಗಮೆಶ್ ಎಂಬ ರಾಜನ ಕತೆ ಹೇಳುತ್ತದೆ. ಆತ ನಿನ್ಸುನ್ ಎಂಬ ಪವಿತ್ರ ಹಸುವಿನ ಮಗ. ಉರುಕ್ ಅವನ ರಾಜ್ಯ. ಬ್ಯಾಬಿಲೋನಿಯನ್ ಪುರಾಣಗಳ ಪ್ರಕಾರ ಏಳು ಋಷಿಗಳು ಮೆಸೊಪೊಟೇಮಿಯಾ ನಾಗರಿಕತೆಯ ನಿರ್ಮಾತೃಗಳು. ಆ ಮಹಾಗಾಥೆಯಲ್ಲಿ ಹೇಳಿರುವಂತೆ ಈ ಋಷಿಗಳು ಉರುಕ್ ನಗರವನ್ನು ನಿರ್ಮಿಸಿದರು. ಉರುಕ್‌ನ ಮೊದಲ ಸಾಮ್ರಾಜ್ಯದ (ಈಗಿನ ಇರಾಕ್) ಐದನೇ ದೊರೆಯೇ ಗಿಲ್ಲಮೆಶ್ ಹಾಗೂ ಪ್ರಾಚೀನ ಸುಮೆರಿಯನ್ ರಾಜರ ಪಟ್ಟಿಯ ಪ್ರಕಾರ ಈತ ಒಂದು ನೂರ ಇಪ್ಪತ್ತಾರು ವರ್ಷಗಳ ಕಾಲ ರಾಜ್ಯಭಾರ ಮಾಡಿದ್ದಾನೆ. ಗಿಲ್ಗಮೆಶ್ ಮಹಾಗಾಥೆಯನ್ನು ಮೊದಲಿಗೆ ಮಣ್ಣಿನ ಫಲಕಗಳ ಮೇಲೆ ಕ್ಯೂನೆಫಾರಂ ಲಿಪಿಯಲ್ಲಿ ಒಬ್ಬ ಅಜ್ಞಾತ ಲೇಖಕ ಸುಮೆರಿಯನ್ ಅವಧಿಯಲ್ಲಿ ದಾಖಲಿಸಿದ್ದಾನೆ ಹಾಗೂ ಇದನ್ನು ಮಾನವ ಸಾವನ್ನು ಗೆಲ್ಲಲು ಹಾಗೂ ಅಮರನಾಗಲು ನಡೆಸಿರುವ ನಿರಂತರ ಪ್ರಯತ್ನಗಳ ಕುರಿತಾದ ಮಹಾನ್ ಸಾಹಿತ್ಯ ಕೃತಿಗಳಲ್ಲೊಂದು ಎಂದು ಹೇಳಲಾಗುತ್ತದೆ. ರಾಜ ಗಿಲ್ಗಮೆಶ್ ಕ್ರಿ.ಪೂ. ೨೮೫೦ರಿಂದ ಕ್ರಿ.ಪೂ.೨೭೦೦ರ ಅವಧಿಯಲ್ಲಿ ಬದುಕಿದ್ದನೆಂದು ಹೇಳಲಾಗುತ್ತದೆ ಹಾಗೂ ನಂತರ ಒಬ್ಬ ಆರಾಧಕ ನಾಯಕನಂತೆ ಪೂಜಿಸಲಾಯಿತು. ಮೊಟ್ಟಮೊದಲ ಗಿಲ್ಲಮೆಶ್ ಪದ್ಯಗಳು, ಮೌಖಿಕ ರೂಪದಲ್ಲಿ ಸುಮಾರು ಕ್ರಿ.ಪೂ. ೨೨೦೦ರಲ್ಲಿ ಹಾಗೂ ಲಿಖಿತ ರೂಪದಲ್ಲಿ ಸುಮಾರು ಕ್ರಿ.ಪೂ. ೨೦೦೦ರಲ್ಲಿ ಕಾಣಿಸಿಕೊಂಡವೆಂದು ಹೇಳಲಾಗಿದೆ. ಇನ್ನು ಕೆಲವು ವಿದ್ವಾಂಸರು ಹೇಳುವಂತೆ ಸುಮಾರು ಕ್ರಿ.ಪೂ. ೧೩೦೦ರಿಂದ ೧೦೦೦ದ ಅವಧಿಯಲ್ಲಿ ಸಿನ್-ಲೆಖಿ-ಉನ್ನಿನ್ನಿ (ಇದರ ಅರ್ಥ ಚಂದ್ರ ದೇವ ಸಿನ್ ನನ್ನ ಪ್ರಾರ್ಥನೆಗಳನ್ನು ಕೇಳುತ್ತಾನೆ ಎಂದು) ಎಂಬಾತ ಬರೆದ ಎಂದೂ ಕೆಲವರು ಹೇಳುತ್ತಾರೆ. ಆ ವಿವಿಧ ಪದ್ಯರೂಪಗಳನ್ನು ಸಂಗ್ರಹಿಸಿ, ಸಂಪಾದಿಸಿ ತನ್ನ ಭಾಷೆಯಾದ ಅಕ್ಕೇಡಿಯನ್‌ನಲ್ಲಿ ದಾಖಲಿಸಿದ ಎನ್ನಲಾಗಿದೆ. ಈಗ ಎಲ್ಲೆಡೆ ಪ್ರಚಲಿತದಲ್ಲಿರುವ ಗಿಲ್ಲಮೆಶ್ ಕತೆ ಅವನದ್ದೇ ಸಂಕಲನದ ಪ್ರತಿ ಎನ್ನುತ್ತಾರೆ.

ಕ್ರಿ.ಪೂ. ಸುಮಾರು ೫೦೦೦ದಲ್ಲಿ ಸ್ಥಾಪಿತವಾಗಿರುವ ಪ್ರಾಚೀನ ಸುಮೆರ್ ಬಹುಶಃ ಚರಿತ್ರೆಯಲ್ಲಿ ದಾಖಲಾಗಿರುವ ಮೊಟ್ಟಮೊದಲ ನಾಗರಿಕತೆಯಾಗಿರಬಹುದು. ಅಧ್ಯಯನಗಳ ಪ್ರಕಾರ ಕ್ರಿ.ಪೂ. ೩೫0೦ರಲ್ಲಿ ಆ ಸಮಾಜದಲ್ಲಿ ಲಿಪಿ ಪ್ರಾರಂಭವಾಗಿದ್ದು ಲಿಖಿತ ಭಾಷೆಯನ್ನು ಹೊಂದಿದ್ದ ಮೊಟ್ಟ ಮೊದಲ ಸಮಾಜವೂ ಅದಾಗಿದೆ. ಸುಮೆರಿಯನ್ನರು ಸೆಮಿಟಿಕ್ ಜನಾಂಗಕ್ಕೆ ಸೇರಿಲ್ಲದವರು ಹಾಗೂ ಬಹುಶಃ ಅವರ ಮೂಲ ಉತ್ತರ ಮೆಸೊಪೊಟೇಮಿಯಾ ಆಗಿತ್ತು. ಸುಮೆರಿಯನ್ ಭಾಷೆ ಒಂದು ವಿಶಿಷ್ಟ ಭಾಷೆಯಾಗಿದ್ದು ಅದು ತಿಳಿದಿರುವ ಹಾಗೂ ಅಸ್ತಿತ್ವದಲ್ಲಿರುವ ಯಾವುದೇ ಭಾಷೆಯೊಂದಿಗೆ ಯಾವುದೇ ರೀತಿಯ ಸಂಬಂಧ ಹೊಂದಿಲ್ಲ.

ಕ್ರಿ.ಪೂ. ೨೦೦೦ ವರ್ಷಗಳ ಹಿಂದೆ ಅಕ್ಕೇಡಿಯನ್ ಭಾಷೆ ಕ್ರಮೇಣ ಸುಮೆರಿಯನ್ ಭಾಷೆಯ ಸ್ಥಾನವನ್ನು ಆಕ್ರಮಿಸತೊಡಗಿತಾದರೂ ಧಾರ್ಮಿಕ, ಕಾನೂನು, ಸಂಪ್ರದಾಯ, ಆಚರಣೆಗಳಲ್ಲಿ, ವಿದ್ವತ್ತಿನ ಹಾಗೂ ವೈಜ್ಞಾನಿಕ ವಿಷಯಗಳಲ್ಲಿ ಕ್ರಿ.ಪೂ. 1800ರವರೆಗೂ ಸುಮೆರಿಯನ್ ಭಾಷೆ ಬಳಕೆಯಲ್ಲಿತ್ತು. ಪಶ್ಚಿಮದಿಂದ ಬಂದ ಸೆಮಿಟಿಕ್ ಜನಾಂಗದವರಾದ ಅಕ್ಕೇಡಿಯನ್ನರು ಸುಮಾರು ಕ್ರಿ.ಪೂ. ೨೩೦೦ಲ್ಲಿ ಸುಮೆರ್ ಸಾಮ್ರಾಜ್ಯವನ್ನು ಗೆದ್ದು ತಮ್ಮದಾಗಿಸಿಕೊಂಡರು. ಇನ್ನುಳಿದ ಕಥೆಯನ್ನು ಓದಿಯೇ ತಿಳಿದುಕೊಳ್ಳಬೇಕು. ೧೦೪ ಪುಟಗಳ ಈ ಪುಟ್ಟ ಪುಸ್ತಕದ ಇತಿಹಾಸದಲ್ಲಿ ಆಸಕ್ತಿ ಹೊಂದಿದವರಿಗೆ ಉಪಯುಕ್ತ ಎನ್ನುವುದರಲ್ಲಿ ಸಂಶಯವಿಲ್ಲ.