'ಜಗಕೆಲ್ಲಾ ಅವನೇ ಹರಿತಾನೆ'

ಜಗದಲ್ಲೂ ನೀನೇ ಜಗವೆಲ್ಲಾ ನೀನೇ

ನಮ್ಮಲ್ಲೂ ನೀನೇ ಎಲ್ಲೆಲ್ಲೂ ನೀನೇ

ಜಡದಲ್ಲೂ ನೀನೇ ಗಿಡದಲ್ಲೂ ನೀನೇ

ಬುಡವೆಲ್ಲಾ ನೀನೇ ಜಗದಗಲ ನೀನೇ II 1 II

ಸಕಲಕೆಲ್ಲವೂ ನೀನೇ ಅಕಳಂಕಕೂ ನೀನೇ

ಹರಿಯೂ ನೀನೇ ಹರಿಯುತಿಹೆ ನೀನೇ

ವಿಶ್ವರೂಪನೂ ನೀನೇ ವಿಶ್ವಭೂಪನೂ ನೀನೇ

ನುಡಿಯಲ್ಲೂ ನೀನೇ ನನ್ನ ಧ್ವನಿಯಲ್ಲೂ ನೀನೇ II 2 II

ದಿಕ್ಕೆಲ್ಲಾ ನೀನೇ ದಿಸೆಯೆಲ್ಲಾ ನೀನೇ

ಭುವಿ ಚರಣ ನೀನೇ ಬಾನ ಮುಕುಟ ನೀನೇ

ಈ ಕೃತಿಯೂ ನೀನೇ ಈ ಸ್ತುತಿಯೂ ನೀನೇ

ಕಣ ಕಣವೂ ನೀನೇ ಋಣ ಋಣವೂ ನೀನೇ II 3 II

ತಗುಲೆ ನಿನ್ನ ಚರಣ ಪಡೆವೆ ಅಂತಃಕರಣ

ಮಾಡೆ ನಿನ್ನ ನಮನ ಧುರಿತವೆಲ್ಲಾ ಶಮನ

ನಿತ್ಯ ನಿನ್ನ ಸ್ಮರಣೆ ಹರಿದು ತಂತು ಕರುಣೆ

ಆ ನಿನ್ನ ಕಾಯ ಆಹಾ ಎಂತಾ ಮಾಯ II 4 II

ಹರಿಯೇ ನಿನ್ನ ನಾಮ ಆನಂದಧಾಮ

ಹರಿಯೇ ನಿನ್ನ ಧ್ಯಾನ ಸೌಂದರ್ಯಪಾನ

ಹರಿಯ ಕೇಳಿ ನಡೆದೆ ಒಳಿತನೆಲ್ಲ ಪಡೆದೆ

ಹರಿಯೆ ಪರಂಧಾಮ ನೀಲಮೇಘಶ್ಯಾಮ II 5 II

ಹರಿಯೆ ಸೂತ್ರದಾರ ಹರಿಯೆ ಜಗದೋದ್ಧಾರ

ಪ್ರಭಾಕರ ಶರ್ಮನು ಮಾಡಿಹ ಈ ಹರಿ ಓಂಕಾರ

ಹರಿಗೆ ನಮಿಸುತ ಹರಿಯ ಸ್ತುತಿಸುತ ಆಗಿ ಉದ್ಧಾರ

ಜಗವೆಲ್ಲಾ ಅವನೇ ಜಗಕೆಲ್ಲಾ ಅವನೇ ಹರಿತಾನೆ II 6 II

ಕರ್ತೃ: ಡಾ. ಪ್ರಭಾಕರ್ ಬೆಳವಾಡಿ