ಜೀವನದ ಸತ್ಯ

ಪೆಟ್ಟು ತಿಂದಿಹ ನೊಂದ ಮನಸಿದು

ಜೀವಯಾನದ ಪಥದಲಿ

ಕೆಟ್ಟ ಮನಗಳ ಮೋಹ ಪಾಶಕೆ 

ಮೋಸ ಹೋದೆನು ಬಾಳಲಿ||

ಅಣ್ಣ ತಮ್ಮರು ಅಕ್ಕ ತಂಗಿಯು

ಕರುಳು ಬಂಧನ ಮಿಥ್ಯವು

ಅಪ್ಪ ಅಮ್ಮರು ಸುತರು ಪತ್ನಿಯು

ಜಾದುಗಾರರು ನಿತ್ಯವು

ಕೊಳೆತು ನಾರುವ ಬೀಗ ಬಿಜ್ಜರು

ಅಣುಕನಾಡುವ ನರಿಗಳು

ಬೆರೆತು ಕಷ್ಟಕೆ ಹೆಗಲು ಕೊಡುವರು

ಸ್ನೇಹ ಬಂಧದ ಹುಲಿಗಳು||

ಇಳೆಗೆ ಬರುತಿಹ ಪಿಂಡ ಒಂಟಿಯು

ಹೋಗೊ ಸಮಯದಿ ಒಂಟಿಯೆ

ಬಿಜಲಿ ಕವಿತೆಯ ಪದವು ಹಾಡಲು

ನಾದ ಮೊಳಗಿತು ಗಂಟೆಯ||

ಮೂರು ದಿನಗಳ ಸಂತೆಯೊಳಗಡೆ

ಪಾಪ ಪುಣ್ಯದ ಲೆಕ್ಕವು

ಮೂಲೆ ಮೂಲೆಗು ದಾನ ಧರ್ಮವ

ಮಾಡೆ ಜೀವನ ಚೊಕ್ಕವು||

-*ಶ್ರೀ ಈರಪ್ಪ ಬಿಜಲಿ*