ಟ್ರಂಪ್ ಕ್ಷಣ ಚಿತ್ತ, ಕ್ಷಣ ಪಿತ್ತ

ತೆರಿಗೆ ಅಸ್ತ್ರವನ್ನು ಮುಂಡಿಟ್ಟುಕೊಂಡು ಅಮೇರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜಗತ್ತಿನಲ್ಲೊಂದು ವ್ಯಾಪಾರ ಯುದ್ಧವನ್ನೇ ಆರಂಭಿಸಿರುವುದು ಸಾಕಷ್ಟು ಚರ್ಚೆ ಹುಟ್ಟು ಹಾಕಿದೆ. ಅವರ ಈ ಹೆಜ್ಜೆಯಲ್ಲಿ ಸಾಕಷ್ಟು ಗೊಂದಲಗಳೂ, ಅವೈಜ್ಞಾನಿಕ ನಿಲುವುಗಳೂ ಗೂಡು ಕಟ್ಟಿದಂತಿವೆ. ತನ್ನ ನೆರೆಯ ಕೆನಡಾ, ಮೆಕ್ಸಿಕೋವನ್ನು ಶಿಕ್ಷಿಸುವ ದೃಷ್ಟಿಯಿಂದ ಶೇ. ೨೫ದಷ್ಟು ಬೃಹತ್ ಸುಂಕವನ್ನು ವಿಧಿಸುವುದಾಗಿ ಭಾರಿ ಜೋರು ದನಿಯಲ್ಲಿ ಘೋಷಿಸಿದ್ದರು. ಫೆಬ್ರವರಿ ೧ರಿಂದಲೇ ಅದು ಜಾರಿಗೊಳ್ಳಬೇಕಿತ್ತು ಕೂಡ. ಆದರೆ, ಕೇವಲ ೨೪ ಗಂಟೆಗಳಲ್ಲಿ ಈ ನಿಷೇಧದಿಂದ ಹಿಂದೆ ಸರಿದಿದ್ದಾರೆ. ಆದರೆ, ಚೀನಾದ ಮೇಲೆ ಶೇ. ೧೦ರಷ್ಟು ಆಮದು ಸುಂಕವನ್ನು ವಿಧಿಸುವ ಘೋಷಣೆಯಿಂದ ಟ್ರಂಪ್ ಹಿಂದೆ ಸರಿದಿಲ್ಲ ಎನ್ನುವುದು ಗಮನಾರ್ಹ.

ಭಾರತ ತನಗೆ ಹೆಚ್ಚು ತೆರಿಗೆ ವಿಧಿಸುತ್ತಿದೆ ಎಂದು ಟ್ರಂಪ್ ಆರಂಭದಲ್ಲಿ ಗುಡುಗಿದ್ದರೂ, ಕಡೇಕ್ಷಣದಲ್ಲಿ ಈ ತೆರಿಗೆ ಸಮರದಿಂದ ಅವರು ಭಾರತವನ್ನು ಕೈಬಿಟ್ಟಿರುವುದು ತಾತ್ಕಾಲಿಕ ಸಮಾಧಾನವಷ್ಟೇ. ಟ್ರಂಪ್ ಉರುಳಿಸುತ್ತಿರುವ ದಾಳಗಳಿಗೆ ಭಾರತದ ದಿಕ್ಕಿನಿಂದ ಕೊಂಚ ಹಿನ್ನಡೆ ಕಂಡುಬಂದರೂ ಅಮೇರಿಕ ಕೈಗೆತ್ತಿಕೊಳ್ಳುವುದು ತೆರಿಗೆಯ ಏಟು ಎಂಬುದನ್ನು ಕೇಂದ್ರ ಸರಕಾರ ಮರೆಯಬಾರದು. ಭಾರತದಿಂದ ಪೂರೈಕೆಯಾಗುವ ಉತ್ಪನ್ನಗಳ ಮೇಲೆ ತೆರಿಗೆ ಇಳಿಸುವಂತೆ ಅಮೇರಿಕ ನಿರಂತ್ರ ಒತ್ತಡ ಹೇರುತ್ತಿದೆ. ಆದರೆ, ಭಾರತ ಕೇವಲ ಅಮೇರಿಕಕ್ಕೆ ಆಮದು ಸುಂಕದಲ್ಲಿ ರಿಯಾಯಿತಿ ನೀಡಿದರೆ ಅದು ವಿಶ್ವ ವ್ಯಾಪಾರ ಸಂಸ್ಥೆ (ಡಬ್ಲ್ಯೂ ಟಿ ಒ) ನಿಯಮಗಳಿಗೆ ವಿರುದ್ಧವಾಗುತ್ತದೆ. ಡಬ್ಲ್ಯೂಟಿಒ ನಿಯಮಗಳು ಎಲ್ಲಾ ದೇಶಗಳಿಗೂ ಸಮಾನ ಸುಂಕ ವಿಧಿಸಬೇಕು ಎಂದೇ ಹೇಳುತ್ತದೆ. ಆದರೆ, ಭಾರತವು ರಫ್ತು ಸುಂಕದಲ್ಲಿ ರಿಯಾಯಿತಿ ನೀಡಿದರೆ, ಕೇಂದ್ರ ಸರಕಾರದ ಆತ್ಮನಿರ್ಭರ ಭಾರತದ ಗುರಿಯೇ ದುರ್ಬಲವಾಗುತ್ತದೆ.

ಅಮೇರಿಕವು ಟ್ರಂಪ್ ಆಡಳಿತದಲ್ಲಿ ಡಬ್ಲ್ಯೂಟಿಒ ಒಪ್ಪಂದಗಳನ್ನು ಮನಸೋ ಇಚ್ಛೆ ಉಲ್ಲಂಘಿಸುತ್ತಿದೆ. ಒಂದೊಂದು ರಾಷ್ಟ್ರಕ್ಕೆ ಒಂದೊಂದು ತೆರಿಗೆ ಎನ್ನುವುದು ಅಸಂಬದ್ಧವಲ್ಲದೆ ಮತ್ತೇನು? ಅಮೇರಿಕ ಫಸ್ಟ್ ನೀತಿಯ ಪರಿಣಾಮವಾಗಿ ಯಾವುದೇ ಒಂದು ರಾಷ್ಟ್ರದ ಮೇಲೆ ತೆರಿಗೆ ಬರೆ ಎಳೆದರೂ, ಕಾಲಕ್ರಮೇಣ ಅದರಿಂದ ಏಳುವ ತರಂಗಗಳು ಜಾಗತಿಕ ಆರ್ಥಿಕತೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಈ ತರಂಗಗಳನ್ನು ಚೀನಾವೇ ತೀವ್ರಗೊಳಿಸುವುದರಲ್ಲಿ ಯಾವ ಅನುಮಾನವೂ ಇಲ್ಲ. ಈಗಾಗಲೇ ಚೀನಾವು ಅಮೇರಿಕದ ಕಲ್ಲಿದ್ದಲ್ಲು, ದ್ರವೀಕೃತ ನೈಸರ್ಗಿಕ ಅನಿಲದ ಮೇಲೆ ಸುಂಕ ವಿಧಿಸಲು ಆರಂಭಿಸಿದೆ. ನಿಧಾನಕ್ಕೆ ಚೀನಾದ ಮಿತ್ರ ರಾಷ್ಟ್ರಗಳೂ ಇದೇ ಹೆಜ್ಜೆ ಅನುಸರಿಸಲು ಶುರು ಮಾಡಿದರೆ, ಅಮೇರಿಕ ಮತ್ತಷ್ಟು ಕೆರಳಲೂ ಬಹುದು. ತತ್ಪರಿಣಾಮ, ಅಮೇರಿಕ-ಚೀನಾದ ತೆರಿಗೆ ಯುದ್ಧದಿಂದ ಬಡವಾಗುವುದು ಏಷ್ಯಾದ,ಆಫ್ರಿಕಾದ ಅಭಿವೃದ್ಧಿಶೀಲ ಹಾಗೂ ಬಡರಾಷ್ಟ್ರಗಳು ಮಾತ್ರ.

ರಾಷ್ಟ್ರ-ರಾಷ್ಟ್ರಗಳ ನಡುವಿನ ವಾಣಿಜ್ಯಿಕ ಸಂಬಂಧ ಹೇಗಿರಬೇಕೆನ್ನುವ ಡಬ್ಲ್ಯೂಟಿಒ ಸೂತ್ರಕ್ಕೆ ವಿಶ್ವ ತಲೆಬಾಗಿದೆ. ಇಲ್ಲಿಯ ತನಕ ಹೇಳಿಕೊಳ್ಳುವಂಥ ಅಂಥ ಗೊಂದಲಗಳೂ ಕಂಡುಬಂದಿಲ್ಲ. ಎಲ್ಲರಿಗೂ ಬುದ್ಧಿ ಹೇಳುವ ಅಮೇರಿಕವೇ ಡಬ್ಲ್ಯೂಟಿಒ ಆಶಯಗಳನ್ನು ಗಾಳಿಗೆ ತೂರಿಸುತ್ತಾ ಸಾಗಿದರೆ, ಬೇಲಿಯೇ ಎದ್ದು ಹೊಲ ಮೇಯ್ದಂತೆ ಆಗುತ್ತದಷ್ಟೇ. ಅಮೇರಿಕ - ಚೀನಾ ನಡುವೆ ಭೌಗೋಳಿಕ, ರಾಜತಾಂತ್ರಿಕ ವೈರತ್ವಗಳು ತಾರಕಕ್ಕೇರಿ ಈಗಾಗಲೇ ಸಾಕಷ್ಟು ಬಿಸಿ ಸೃಷ್ಟಿಸಿದೆ. ಇನ್ನು ವ್ಯವಹಾರಿಕವಾಗಿ ಈ ವೈರತ್ವ ಸೋಂಕಾಗಿ ಪರಿಣಮಿಸಿದರೆ ಅದಕ್ಕೆ ಚಿಕಿತ್ಸೆ ದುಬಾರಿಯೇ ಆಗಬಹುದು. 

ಅಮೇರಿಕ ಪ್ರತಿ ಹೆಜ್ಜೆ ಕ್ಷಣ ಚಿತ್ತ ಕ್ಷಣ ಪಿತ್ತ ಎನ್ನುವಂತಾಗಬಾರದು. ಟ್ರಂಪ್ ತನ್ನ ನೀತಿಗಳ ಬಗ್ಗೆ ಸ್ಪಷ್ಟತೆ ಹೊಂದುವುದು ಅತಿ ಮುಖ್ಯ. ಆರ್ಥಿಕ ಹಿಂಜರಿತದ ಈ ಕಾಲದಲ್ಲಿ ಯಾರಿಗೋ ಬುದ್ದಿ ಕಲಿಸಲು ಹೋಗಿ, ವ್ಯಾಪಾರ ಯುದ್ಧ ಎಬ್ಬಿಸುವುದು ಅಷ್ಟು ಸಮಂಜಸವಲ್ಲ.

ಕೃಪೆ: ವಿಜಯ ಕರ್ನಾಟಕ, ಸಂಪಾದಕೀಯ, ದಿ: ೦೬-೦೨-೨೦೨೫

ಚಿತ್ರ ಕೃಪೆ: ಅಂತರ್ಜಾಲ ತಾಣ