ದಿನಕರ ದೇಸಾಯಿಯವರ ಐದು ಚುಟುಕುಗಳು

೧

ವಿಶ್ವ ಪರಿಷತ್ತು ಸೇರಲು ನಿನ್ನೆ ಸಂಜೆ

ಮಾತಾಡಿ ಮಾತಾಡಿ ಭೂವಲಯ ಬಂಜೆ

ಮುಂಜಾನೆ ಗದ್ದೆ ಹೂಡಲು ಎರಡು ಎತ್ತು

ಸಂಜೆಯಾಗುವತನಕ ಬಾಯೊಳಗೆ ತುತ್ತು.

೨

ಮಂತ್ರಿಗಳು ನಮಗಿತ್ತ ಭರವಸೆಯ ನಂಬಿ

ಒಡೆದು ನೋಡಿದೆವು ಪ್ರತಿಯೊಂದು ಗೋಡಂಬಿ

ಒಂದರಲ್ಲೂ ಬೀಜ ಸಿಗಲಿಲ್ಲ ಪಾಪ !

ಎಲ್ಲವೂ ಒಣಬಾಯಿ ಮಾತಿನ ಪ್ರಲಾಪ.

೩

ಮನೆಯೊಳಗೆ ಖಾಲಿ ಇದ್ದರೆ ನಿಮ್ಮ ದುಡ್ಡು

ವೃದ್ಧನಾರಿಯ ಹಾಗೆ ಸಂಪೂರ್ಣ ಗೊಡ್ಡು

ಬ್ಯಾಂಕಿನಲಿ ತುಂಬಿದರೆ ಯೌವನದ ಪ್ರಾಯ

ಪ್ರತಿವರ್ಷ ಮರಿ ಹಾಕಿ ಭರ್ತಿ ಆದಾಯ.

೪

ಭಾಷಣಕೆ ನಿತ್ಯವೂ ಹಾಕಿದರೆ ಬಣ್ಣ

ನೀನೊಂದು ದಿನ ಮಂತ್ರಿಯಾಗಬಹುದಣ್ಣ

ಹಾಕಿದರೆ ಬಣ್ಣ ಬದಲಾಯಿಸಿದ ಕೋಟು

ನಿನ್ನ ಪೆಟ್ಟಿಗೆಯೊಳಗೆ ಸಾಕಷ್ಡು ಓಟು.

೫

ಮಂಗಳವ ಹಾಡಲಿಕೆ ನನಗಿಲ್ಲ ಬಾಯಿ

ಯಾವಾಗಲೂ ಕಾವಲಿಡಬೇಕು ನಾಯಿ

ಸ್ತುತಿಪಾಠ ಅತಿಯಾಗಿ ಹಾಳಾಯ್ತು ದೇಶ

ಬೊಗಳಬೇಕೆನ್ನುವುದೆ ನನ್ನ ಉದ್ಧೇಶ.

(ಸಂಗ್ರಹ)