ದಿನಕರ ದೇಸಾಯಿಯವರ ಚುಟುಕುಗಳು

೧.

*ನನ್ನ ಕನ್ನಡ ನುಡಿಯೆ ನೀನೆಷ್ಟು ಚಂದ*

*ಏನು ಗೀಚಿದರು ಆಗುವುದು ಶ್ರೀಗಂಧ*

*ಸಿಂಗರದ ಗಣಿ ನಿನ್ನ ಶಬ್ದ ಸಂಪತ್ತು*

*ಬಂಗಾರಕ್ಕಿಂತಲೂ ಶ್ರೇಷ್ಠ ನುಡಿಮುತ್ತು*

೨

*ಸರ್ವಜ್ಞ ಹಿಡಿದದ್ದು ತ್ರಿಭುವನದ ಹಾದಿ*

*ನಾನು ಹಿಡಿದದ್ದು ನವಭಾರತದ ಬೀದಿ*

*ಸರ್ವಜ್ಞ ತ್ರಿಪದಿಯಲಿ ಮನುಕುಲದ ಕಾಳು*

*ನನ್ನ ಚೌಪದಿಯೊಳಗೆ ಮಾನವನ ಗೋಳು*

೩

*ಶೀಲವೆಂಬುದು ಮಗನೆ, ಜೀವನದ ಜೇನು*

*ಎಂದು ಕಾಗುಣಿತ ಕಲಿಸಿದೆ ನೀನು*

*ನೀನು ಕಲಿಸಿದ ವರ್ಣಮಾಲೆಯ ಸುವರ್ಣ*

*ಬಂಗಾರಕ್ಕಿಂತಲೂ ಶ್ರೇಷ್ಠ, ದತ್ತಣ್ಣ*

೪

*ಒಂದು ಬದಿ ಸಹ್ಯಾದ್ರಿ, ಒಂದು ಬದಿ ಕಡಲು*

*ನಡು ಮಧ್ಯದಲಿ ಅಡಕೆ ತೆಂಗುಗಳ ಮಡಲು*

*ಸಿರಿಗನ್ನಡದ ಚಪ್ಪರವೆ ನನ್ನ ಜಿಲ್ಲೆ*

*ಇಲ್ಲಿಯೇ ಇನ್ನೊಮ್ಮೆ ಹುಟ್ಟುವೆನು, ನಲ್ಲೆ*

೫

*ಎಲೆ ಕವಿಯೆ, ಸುಡು ನಿನ್ನ ಕವನಗಳ ಕೀರ್ತಿ*

*ತಿಳಿ ಬಾನು, ಗಿರಿಕಾನುಗಳೇ ನಿನ್ನ ಸ್ಪೂರ್ತಿ*

*ಕೇರಿ ಕೇರಿಗಳಲ್ಲಿ ಉರಿದರೂ ಜ್ವಾಲೆ*

*ಕವನ ಕಟ್ಟುವೆ ನೀನು ಮಲ್ಲಿಗೆಯ ಮೇಲೆ*

***

ಸೆಪ್ಟೆಂಬರ್ ಹತ್ತು, ದೇಸಾಯಿಯವರ ಜ‌ನ್ಮದಿನ. ಡಾ|| ದಿನಕರ ದೇಸಾಯಿ ಸ್ಮಾರಕ ಪ್ರತಿಷ್ಠಾನವು ಸೆಪ್ಟೆಂಬರ್ ತಿಂಗಳನ್ನು "ದಿನಕರ ಮಾಸ" ಎಂದು ಆಚರಿಸಲು ಕರೆನೀಡಿದೆ. ದಿನಕರ ಮಾಸದ ಸಲುವಾಗಿ ಓದುಗರಿಗಾಗಿ ದೇಸಾಯಿಯವರು ರಚಿಸಿದ ಈ ಮೇಲಿನ ಐದು ಚುಟುಕುಗಳನ್ನು ಇಲ್ಲಿ ಪ್ರಕಟಿಸಲಾಗಿದೆ.

~ ಶ್ರೀರಾಮ ದಿವಾಣ