ದೇಶಾದ್ಯಂತ ಜಿಎಸ್ ಟಿ ಸಂಗ್ರಹದಲ್ಲಿ ಇನ್ನಷ್ಟು ಹೆಚ್ಚಳವಾಗಲಿ

ಸತತ ಆರನೇ ತಿಂಗಳು ಸರಕು ಮತ್ತು ಸೇವೆ ತೆರಿಗೆ ಸಂಗ್ರಹದಲ್ಲಿ ದಾಖಲೆಯಾಗಿದ್ದು, ೧.೪೦ ಲಕ್ಷ ಕೋಟಿ ರೂ. ಗ಼ಳಿಗಿಂತಲೂ ಹೆಚ್ಚಿನ ತೆರಿಗೆ ಕೇಂದ್ರ ಮತ್ತು ರಾಜ್ಯ ಸರಕಾರಗಳ ಬೊಕ್ಕಸಕ್ಕೆ ಬಂದು ಬಿದ್ದಿದೆ. ಆಗಸ್ಟ್ ನಲ್ಲಿ ೧,೪೩,೬೧೨ ಕೋಟಿ ರೂ. ಜಿ ಎಸ್ ಟಿ ಸಂಗ್ರಹವಾಗಿದೆ. ಕಳೆದ ವರ್ಷದ ಆಗಸ್ಟ್ ಗೆ ಹೋಲಿಸಿದರೆ ಇದು ಶೇ. ೨೮ರಷ್ಟು ಹೆಚ್ಚಳವಾಗಿರುವುದು ಗೋಚರಿಸಿದೆ.

ಹಬ್ಬಗಳ ಹಿನ್ನಲೆಯಲ್ಲಿ ಜನರಿಂದ ಹೆಚ್ಚು ಖರೀದಿ ಮತ್ತು ಕೋರೋನೋತ್ತರದಲ್ಲಿ ದೇಶದ ಕೈಗಾರಿಕೆಗಳು, ಉದ್ಯಮಗಳ ಚೇತರಿಕೆಯಿಂದಾಗಿ ಜಿ ಎಸ್ ಟಿ ಸಂಗ್ರಹದಲ್ಲಿಯೂ ಹೆಚ್ಚಳವಾಗಿದೆ ಎಂದು ವಿತ್ತ ಸಚಿವಾಲಯ ಅಭಿಪ್ರಾಯಪಟ್ಟಿದೆ. ಆರ್ಥಿಕತೆ ದೃಷ್ಟಿಯಿಂದ ನೋಡುವುದಾದರೆ ಇದು ನಿಜವೇ ಸರಿ. ಕೊರೋನೋತ್ತರದಲ್ಲಿ ದೇಶದ ಆರ್ಥಿಕತೆ ಬೆಳವಣಿಗೆಯಾಗುತ್ತಿರುವುದು ಜಿ ಎಸ್ ಟಿ ಸಂಗ್ರಹದಲ್ಲಿ ಹೆಚ್ಚಳವಾಗುತ್ತಿರುವುದೇ ಇದಕ್ಕೆ ಸಾಕ್ಷಿಯಾಗಿದೆ.

ಆಗಸ್ಟ್  ತಿಂಗಳಲ್ಲಿ ಒಟ್ಟು ೧,೪೩,೬೧೩ ಕೋಟಿ ರೂ. ಜಿ ಎಸ್ ಟಿ ಸಂಗ್ರಹವಾಗಿದೆ. ಕಳೆದ ವರ್ಷದ ಇದೇ ಅವಧಿಯ ಜಿ ಎಸ್ ಟಿ ಮೊತ್ತ ೧.೧೨ ಲಕ್ಷ ಕೋಟಿ ರೂ. ಗ಼ಳಾಗಿತ್ತು. ಹೀಗಾಗಿ ಅಲ್ಲಿಂದ ಇಲ್ಲಿಗೆ ಹೆಚ್ಚಳವಾಗಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಕಳೆದ ಆರು ತಿಂಗಳಿಂದಲೂ ಜಿ ಎಸ್ ಟಿ ಸಂಗ್ರಹ ೧.೪೦ ಲಕ್ಷ ಕೋಟಿ ರೂ. ಗಳಿಗಿಂತ ಹೆಚ್ಚೇ ಇದೆ ಎಂಬುದು ಸಮಾಧಾನಕರ ಸಂಗತಿ. ಅದರಲ್ಲೂ ಎಪ್ರಿಲ್ ತಿಂಗಳಲ್ಲಿ ದಾಖಲೆ ಪ್ರಮಾಣದ ೧.೬೭ ಲಕ್ಷ ಕೋಟಿ ರೂ. ಸಂಗ್ರಹವಾಗಿತ್ತು. ಮಾರ್ಚ್ ನಲ್ಲಿ ೧.೪೨ ಲಕ್ಷ ಕೋಟಿ ರೂ. ಜೂನ್ ನಲ್ಲಿ ೧.೪೪ ಲಕ್ಷ ಕೋಟಿ ರೂ. ಜುಲೈನಲ್ಲಿ ೧.೪೮ ಲಕ್ಷ ಕೋಟಿ ರೂ. ಸಂಗ್ರಹವಾಗಿತ್ತು. ಹಿಂದಿನ ತಿಂಗಳಿಗೆ ಹೋಲಿಸಿದರೆ ಈ ತಿಂಗಳಿನದ್ದು ಕೊಂಚ ಕಡಿಮೆಯೇ ಇದೆ. ಆದರೆ ೧.೪೦ ಲಕ್ಷ ಕೋಟಿ ರೂ. ಮೀರಿದೆ ಎಂಬುದು ಸಮಾಧಾನ.

ಆರ್ಥಿಕ ಕ್ಷೇತ್ರದ ಪರಿಣಿತರ ಪ್ರಕಾರ ಈ ಮಟ್ಟದ ಜಿ ಎಸ್ ಟಿ ಸಂಗ್ರಹ ಆಶಾದಾಯಕ ಬೆಳವಣಿಗೆ. ಏಕೆಂದರೆ ಹೆಚ್ಚು ಜಿ ಎಸ್ ಟಿ ಸಂಗ್ರಹವಾದಂತೆ ಆರ್ಥಿಕತೆಯ ಚಟುವಟಿಕೆ ಚೆನ್ನಾಗಿದೆ ಎಂದೇ ಅರ್ಥ. ಅಂದರೆ ಜನ ಹೆಚ್ಚೆಚ್ಚು ಖರೀದಿ ಮಾಡುತ್ತಿದ್ದಾರೆ, ಅವರ ಬೇಡಿಕೆ ತಕ್ಕಂತೆ ಉತ್ಪಾದಕ ವಲಯವೂ ಪೂರೈಕೆ ಮಾಡುತ್ತಿದೆ. ಈ ಕಾರಣದಿಂದಲೇ ದೇಶದ ಮೊದಲ ತ್ರೈಮಾಸಿಕ ಜಿಡಿಪಿ ಕೂಡ ಶೇ ೧೩.೫ರಷ್ಟು ಪ್ರಗತಿಯಾಗಿದೆ ಎಂದೇ ವಿಶ್ಲೇಷಿಸಲಾಗಿದೆ.

ಸದ್ಯ ಸರಕಾರದ ಆಶಯದಂತೆಯೇ ಮಾರುಕಟ್ಟೆ ಕೂಡ ಸಹಕರಿಸುತ್ತಿದ್ದು ಹೆಚ್ಚು ತೆರಿಗೆ ಸಂಗ್ರಹವಾಗುತ್ತಿದೆ. ಇನ್ನು ಮುಂದೆ ಕೇಂದ್ರ ಸರಕಾರ ತಡ ಮಾಡದೇ ರಾಜ್ಯ ಸರಕಾರಗಳ ಪಾಲನ್ನು ನೀಡಬೇಕು. ರಾಜ್ಯಗಳಿಗೆ ಸರಿಯಾದ ಸಮಯಕ್ಕೆ ಜಿ ಎಸ್ ಟಿ ಪಾವತಿ ಮಾಡಿದರೆ ಅವುಗಳ ಬೊಕ್ಕಸಕ್ಕೂ ಹಣ ಸಂದಾಯವಾದಂತೆ ಆಗಿ, ರಾಜ್ಯಗಳಲ್ಲಿ ಹೆಚ್ಚೆಚ್ಚು ಅಭಿವೃದ್ಧಿ ಕೆಲಸಗಳನ್ನು ಮಾಡಬಹುದು. 

ಇದರ ನಡುವೆಯೇ ಜಿಡಿಪಿಯ ಪ್ರಗತಿಯೂ ಆಶಾದಾಯಕವಾಗಿಯೇ ಇದೆ. ಆದರೆ ಇದು ರಿಜರ್ವ್ ಬ್ಯಾಂಕ್ ಆಫ್ ಇಂಡಿಯಾದ ನಿರೀಕ್ಷೆಯನ್ನು ಮುಟ್ಟಿಲ್ಲ ಎಂಬುದು ಮಾತ್ರ ಬೇಸರದ ಸಂಗತಿ. ಈ ಮೊದಲ ತ್ರೈಮಾಸಿಕದಲ್ಲಿ ಜಿಡಿಪಿ ಬೆಳವಣಿಗೆ ದರ ಶೇ. ೧೬.೨ ರಷ್ಟಿರುತ್ತದೆ ಎಂದು ಆರ್ ಬಿ ಐ ಅಂದಾಜಿಸಲಾಗಿತ್ತು. ನಾವು ಎಲ್ಲಿ ಎಡವಿದ್ದೇವೆ ಎಂಬುದನ್ನು ಆರ್ಥಿಕ ತಜ್ಞರು ವಿಶ್ಲೇಷಿಸಬೇಕಾಗಿದೆ.

ಕೃಪೆ: ಉದಯವಾಣಿ, ಸಂಪಾದಕೀಯ, ದಿ:೦೨-೦೯-೨೦೨೨

ಚಿತ್ರ ಕೃಪೆ: ಇಂಟರ್ನೆಟ್ ತಾಣ