ನನಗೂ ಬದುಕುವ ಹಕ್ಕಿಲ್ಲವೇ ?

ಹುಟ್ಟುತ್ತಲೇ ಹೆಣ್ಣೇ

ಎಂದು ಮೂಗು ಮುರಿಯುವಿರಿ 

ವ್ಯಂಗ್ಯ ನಗುವಿನ ಸುಳಿಮಿಂಚು

ಹಾಯ್ದು ಹೋಯಿತು

ಮೊಗದ ಮೇಲೆ

ಬೆಳೆಯುತ್ತಲೇ

ನೀನು ಹುಡುಗಿ

ಹಾರಾಡದಿರು

ಬುದ್ಧಿಮಾತುಗಳ ಕೇಳಿ

ಕಿವಿ ಜಡ್ಡುಗಟ್ಟಿತು

ಕುಹಕಕ್ಕೆ ಕೊನೆಯಿಲ್ಲದಾಯಿತು

ಅರಳುವ ಮುನ್ನವೇ

ಹೊಸಕಿ ಹಾಕದಿರಿ

ಪಾದದಡಿಯಲಿ ತುಳಿಯದಿರಿ

ನಾನೇನು ಅಪರಾಧ ಮಾಡಿದ್ದೆ

*ನನಗೂ ಬದುಕುವ ಹಕ್ಕಿಲ್ಲವೇ?*

ನಾನು ನೆಮ್ಮದಿಯ

ಉಸಿರಾಟ ನಡೆಸಲು

ಯಾಕೆ ತಡೆಯೊಡ್ಡುವಿರಿ

ಎರಡೂ ಕಣ್ಣುಗಳು

ನಮಗೆ ಬೇಕಲ್ಲವೇ

ನಾನು ಒಂದು ಕಣ್ಣಲ್ಲವೇ

ಕ್ಷಮಯಾಧರಿತ್ರಿ ಎನ್ನುವಿರಿ

ಅಮ್ಮಾ ಎಂದು ಕೂಗುವಿರಿ

ಹೆಣ್ಣು ಸಂಸಾರದ ಕಣ್ಣು

ಅರಿತು ಬಾಳಿರಿ ಬಾಳಿಸಿರಿ

ಆಗ ಧರೆಗೆ ಸ್ವರ್ಗ ಇಳಿವುದು

***

ಗಝಲ್

ಮನುಜನ ಹಸಿವನ್ನು ತಣಿಸಲು ಅನ್ನ ನೀಡುವವ ರೈತ

ಕಣಜದಿ ಬೆಳೆದ ಕಾಳುಗಳ ಒಟ್ಟಾಗಿಸಿ ತುಂಬುವವ ರೈತ  

ನೊಗಕೆ ಹೆಗಲು ಕೊಡಲು ಎತ್ತುಗಳು ಜೊತೆಗೆ ಇರಬೇಕಲ್ಲವೇ

ಮೊಗದ ಬೆವರ ಲೆಕ್ಕಿಸದೆ ಹಗಲಿರುಳು ದುಡಿವವ ರೈತ

ಇಳೆಗೆ ಕಾಲಕ್ಕೆ ಸರಿಯಾಗಿ ಮಳೆ ಸುರಿಯದಿದ್ದಾಗ ಬೇಸರಿಸುವನು 

ಫಸಲಿಗೆ ಸರಿಯಾದ ಬೆಲೆ ಸಿಗದಿದ್ದಾಗ ಅಳುವವ ರೈತ

ಕೆಸರು ಗದ್ದೆಯ ಕೆಲಸಗಾರರಿಂದ ಕೇಳುವ  ಓಬೇಲೆ ಚಂದ 

ಹಸಿರು ತೆನೆ ಬಾಗಿದಾಗ ನೋಡಿ ನಗುವವ ರೈತ

ಕಾಯಕ ಯೋಗಿಯ ತನುವಿನಾಳದ ನೋವ ಅರಿವು ರತುನಾಳಿಗಿದೆ

ದೇಹವ ದಂಡಿಸಿ ದೇಶಕ್ಕಾಗಿ ತ್ಯಾಗ ಮಾಡುವವ ರೈತ

-ರತ್ನಾ ಕೆ.ಭಟ್, ತಲಂಜೇರಿ

ಚಿತ್ರ ಕೃಪೆ: ಇಂಟರ್ನೆಟ್ ತಾಣ