ನನ್ನ ಸಂಪದ-ಸಂಪದ

ಸಂಪದಕ್ಕೆ ಸೇರಿ ಕೆಲವೇ ದಿನಗಳಾದರೂ ಸಂಪದದ ಬಗ್ಗೆ ಬರೆಯಬೇಕೆಂಬ ಅದಮ್ಯ ಅಭಿಲಾಷೆ.ಇದೀಗ ಸೇರಿದವಳು ಸಂಪದದ ಬಗ್ಗೆ ಇನ್ನೇನು ಬರೆದಾಳು ಎಂದಿರೆ?ಅದೂ ನಿಜ ಅನ್ನಿ.ಆದರೆ ನನಗೀಗ ಸಂಪದಕ್ಕೆ ನಾನು ತೀರಾ ಹಳಬಳೆನ್ನಿಸುತ್ತಿದೆ.
 ಅನ್ನ ಬೆಂದಿದೆಯೇ ಎಂದು ನೋಡಲು ಅಗಳೊಂದನ್ನು ನೋಡಿದರೆ ಸಾಲದೆ?
            ನಾನು ಸಂಪದಕ್ಕೆ ಹೊಸಬಳು.ಅದಾಗ್ಯೂ ಸಂಪದ ನನ್ನನ್ನು ಅಕ್ಕರೆಯಿಂದ ಬರಮಾಡಿಕೊಂಡಿತು.ಇಲ್ಲಿನ ಪಾರದರ್ಶಕತೆ,ಸಹೃದಯತೆ,ಸೃಜನಶೀಲತೆ ನನ್ನ ಮನಸ್ಸನ್ನು ಗೆದ್ದಿತು.ಸಂಪದದ ಬಂಧುಗಳು ನಿಜಕ್ಕೂ ಸರಳ ಪ್ರವೃತ್ತಿಯವರು.
ಇನ್ನು ಸಂಪದದ ಬಗ್ಗೆ ಹೇಳಬೇಕೆಂದರೆ ಇದು ಸರಸ್ವತಿಯ ನಾಸಿಕದ ಮೌಕ್ತಿಕ.ಇದೊಂದು ಅತ್ತ್ಯುತ್ತಮ ವೇದಿಕೆ.ಬಹಳ ಹಿಂದೆ (೧೬ ವರ್ಷಗಳ )ಹೊಸದಿಗಂತ ಪತ್ರಿಕೆಯಲ್ಲಿ ನನ್ನ ಕಥೆ ಸಮೀಕ್ಷೆ ಪ್ರಕಟವಾಗಿತ್ತು.ತದನಂತರ ನಾನು ಬರೆದದ್ದು ಸಂಪದದಲ್ಲೇ.ಕನ್ನಡದಲ್ಲಿ ಟ್ಯೆಪ್ ಮಾಡಲು ಕಲಿತದ್ದೂ ಸಂಪದದಕ್ಕೆ ಬಂದಮೇಲೆ.ಪ್ರಪಂಚದ ಎಲ್ಲಾ ಕನ್ನಡ ಬಂಧುಗಳನ್ನು ಪ್ರೇಮ ತಂತುವಿನಿಂದ ಜೋಡಿಸಿದ ಸಂಪದದ ಪ್ರಯತ್ನ ನಿಜಕ್ಕು ಶ್ಲಾಘನೀಯವಾದದ್ದು.ಮುಖ್ಯವಾಗಿ ಹೇಳಬೇಕೆಂದರೆ ಇಲ್ಲಿ ಎಲ್ಲರಿಗೂ ಮುಕ್ತ ಅವಕಾಶ.ಇದರಿಂದ ಸಮಾಜದಲ್ಲಿ ಎಲೆಮರೆಯ ಕಾಯಾಗಿರುವ ಎಷ್ಟೋ ಪ್ರತಿಭಾನ್ವಿತ,ಉದಯೋನ್ಮುಖ ಲೇಖಕರನ್ನು ಜನ ಗುರುತಿಸುವಂತಾಗಿದೆ.ಮಾತ್ಸರ್ಯವನ್ನು ಮೀರಿ ನಿಂತಿರುವ ಸಂಪದಿಗರ ಸ್ವಭಾವ ಸಂಪದವನ್ನು ಗಗನಕ್ಕೇರಿಸಿದೆ.
ಇಂತಹ ಓಂದು ಸಾಹಿತ್ಯಾತ್ಮಕ ಮಾಧ್ಯಮವನ್ನು ಒದಗಿಸಿಕೊದುವ ಹಿಂದೆ ಸೂತ್ರಧಾರನ ಪಾತ್ರ ಬಹುಮುಖ್ಯ.ನಾನು ಸಂಪದದ ಹಣ್ಣನ್ನು ತಿನ್ನುತ್ತಿರುವವಳು.ಆದರೆ ಸಂಪದವೆಂಬ ಬೀಜವನ್ನು ಬಿತ್ತಿ ಅದನ್ನು ಪೋಷಿಸಿ ಬೆಳೆಸಿ ಅದು ಕಾಯಾಗಿ ಹೂವಾಗಿ ಹಣ್ಣಾಗುವ ವರೆಗೂ ಅದೆಷ್ಟು ಶ್ರಮ ಪಟ್ಟಿರಬಹುದೆಂದು ಯೋಚಿಸಿದಾಗ ಸಂಪದದ ನಿರ್ವಾಹಕರನ್ನು ಹೃತ್ಪೂರ್ವಕ ವಾಗಿ ಅಭಿನಂದಿಸ ಬೇಕೆನಿಸುತ್ತದೆ.
ಮಹಾಕವಿ ಕಾಳಿದಾಸನ ಶಾಕುಂತಲದಲ್ಲಿನ ಸೂತ್ರಧಾರನ ಶ್ಲೋಕವೊಂದು ನೆನಪಾಗುತ್ತಿದೆ.
"ಆಪರಿತೋಷಾದ್ವಿದುಷಾಮ್ ನ ಸಾಧು ಮನ್ಯೇ ಪ್ರಯೋಗ ವಿಜ್ಞಾನಮ್"
ವಿದ್ವಾಂಸರು ನನ್ನ ಈ ನಾಟಕವನ್ನು ನೋಡಿ ಪರಿತುಷ್ಟರಾಗುವ ತನಕ ನನ್ನ ಈಪ್ರಯೋಗವು ಸರಿಯಾಗಿದೆಯೆಂದು ನಾನು ಭಾವಿಸುವುದಿಲ್ಲ ಎಂದು.
ಸಂಪದದಲ್ಲಿ ಬರುತ್ತಿರುವ ಅನೇಕ ವಿದ್ವತ್ಪೂರ್ಣ ಲೇಖನಗಳು,ಕವನಗಳು ಸಂಪದದ ಗರಿಮೆಯನ್ನು ಹೆಚ್ಚಿಸಿವೆ.ಇವತ್ತು ಸಂಪದ ವಿದ್ವಜ್ಜನರಿಗೆ ಅತ್ಯಂತ ಪ್ರಿಯವಾಗಿದೆ.ಸರಸ್ವತಿಯ ಸೇವೆ ಅಹರ್ನಿಶಿ ನಡೆಯುತ್ತಿದೆ.
  ಶ್ರೀ ಶಂಕರಾಚಾರ್ಯರಿಂದ ರಚಿತವಾದ ಸೌಂದರ್ಯ ಲಹರಿಯ ಕೊನೆಯ ಶ್ಲೋಕದ ಕೊನೆಯ ಸಾಲಿನಲ್ಲಿ-
"ತ್ವದೀಯಾಭಿರ್ವಾಗ್ಭಿಸ್ತವಜನನಿ ವಾಚಾಂ ಸ್ತುತಿರಿಯಮ್"
ಆ ಭಗವತಿಯಿಂದ ಪ್ರದತ್ತವಾದ ವಾಕ್ಕುಗಳಿಂದಲೇ ಅವಳಿಗೆ ಸೇವೆ.
ಅದೇ ಸಾಹಿತ್ಯ ಸರಸ್ವತಿಯ ಸೇವೆ ಇಲ್ಲಿ ಪ್ರತಿದಿನವೂ ನಡೆಯುತ್ತಿದೆ.
ಸಂಪದಕ್ಕಾಗಿ ಹಗಲಿರುಳುಶ್ರಮಿಸಿದ ರೂವಾರಿಗಳಿಗೆ ಹೃತ್ಪೂರ್ವಕ ಅಭಿನಂದನೆಗಳು.ನಾನು ಸಂಪದಕ್ಕೆ ಇತ್ತಿಚೆಗೆ ಸೇರ್ಪಡೆಯಾಗಿದ್ದರೂ ಇದೀಗ ಸಂಪದ ನನ್ನ ಜೀವನದ ಅವಿಭಾಜ್ಯ ಅಂಗವಾಗಿಬಿಟ್ಟಿದೆ.ಸಂಪದಕ್ಕೆ ನನ್ನನ್ನು ಪರಿಚಯಿಸಿದ ಸ್ನೇಹಿತೆ ಜಯಲಕ್ಶ್ಮಿ ಜ್ಞಾನಶೇಖರ್ ಳಿಗೆ ನಾನು ಚಿರಋಣಿ.
ವಿಪದೋ ನೈವ ವಿಪದಃ
ಸಂಪದೋ ನೈವ ಸಂಪದಃ
ವಿಪದ್ವಿಸ್ಮರಣಂ ವಿಷ್ಣೋಃ
ಸಂಪನ್ನಾರಾಯಣಸ್ಮೃತಿಃ
ಇದು ಒಂದು ತರಹದಲ್ಲಿ ಸಂಪದಕ್ಕೂ ಅನ್ವಯಿಸುವುದು.
ವಿಪತ್ಸಂಪದ ವಿಸ್ಮರಣಮ್
ಸಂಪತ್ಸಂಪದ ಲೇಖನಂ
ಸಂಪದದ ಬಳಗಕ್ಕೆ ಸಂಪದದ ವಿಸ್ಮರಣೆಯೇ ವಿಪತ್ತು
ಸಂಪದ ಲೇಖನವೇ ಸಂಪತ್ತು.