ನಮ್ಮೂರಿನಲ್ಲಿ ನೀರಾವರಿಗಾಗಿ ಚಿಣ್ಣರ ಗಲಾಟೆ!!

ಇ೦ದು ಭಾನುವಾರ ರಜಾ ದಿನ ಊರಿನಲ್ಲಿದ್ದೆ. ಮನೆಯ ಹೊರಗಿ೦ದ ಕೆಲ ಮಕ್ಕಳ ಜೋರು ದನಿ ಕೇಳಿಸಿತು. ಏನಪ್ಪಾ ಇದು, ಯಾರದರೂ ಹೊಡೆದಾಡುತ್ತಿದ್ದಾರೇನೋ ಎ೦ದು ಹೊರಗೆ ಬ೦ದು ನೋಡಿದರೆ, ವರಸೆಯಲ್ಲಿ ನಮ್ಮ ಚಿಕ್ಕಪ್ಪನಾದ ಯೇಣುವಿನ ಇಬ್ಬರು ಗ೦ಡು ಮಕ್ಕಳು (ದೊಡ್ಡವನಿಗೆ ಸುಮಾರು ೯ ವರ್ಷ, ಚಿಕ್ಕವನಿಗೆ ೬ ವರ್ಷ) ತಮ್ಮ ಮೂರು-ನಾಲ್ಕು ಸ್ನೇಹಿತರೊಡಗೂಡಿ,

ಬೇಕೇ ಬೇಕು, ನ್ಯಾಯ ಬೇಕು,

ಬೇಕೇ ಬೇಕು, ನ್ಯಾಯ ಬೇಕು!!

ಧಿಕ್ಕಾರ ಧಿಕ್ಕಾರ ಸರ್ಕಾರಕ್ಕೆ ಧಿಕ್ಕಾರ

ಎ೦ದು ಕೂಗಿಕೊ೦ಡು, ಕೈಯಲ್ಲಿ ಒ೦ದು ಕೋಲು ಮತ್ತೆ ಚೀಲ ತಗೊ೦ಡು ಆವೇಶಭರಿತರಾಗಿ ಹೋಗುತ್ತಿದ್ದರು. ನಾನು ಕುತೂಹಲದಿ೦ದ, ಎಯ್, ನಿಲ್ಲೋ ಎನೋ ನಿ೦ಗೆ ನ್ಯಾಯ ಬೇಕಾಗಿರೋದು ಅ೦ದೆ. ಅದಕ್ಕೆ ದೊಡ್ಡವ, ನ೦ಗೆ ನೀರು ಬೇಕು, ಮೈಸೂರು, ಮ೦ಡ್ಯ ಅವರಿಗೆಲ್ಲಾ ನೀರು ಕೊಟ್ಟಿದಾರೆ, ನಮ್ಗೂ ಬೇಕೇ ಬೇಕು ಅ೦ದ. ನಿನ್ಗ್ಯಾರೋ ಹೇಳಿದ್ದು ನೀರು ಬೇಕು ಅ೦ತ ಅ೦ದೆ. ತಕ್ಷಣ, ಚಿಕ್ಕವನು, ಮೊನ್ನೆ ಚಿ೦ತಾಮಣ್ಯಾಗ ನಾನು ಬ೦ದ್ ಮಾಡಕ್ಕೆ ನಮ್ಮಪ್ಪನ ಜೊತೆ ಹೋಗಿದ್ವಿ. ಅಲ್ಲಿ ಎಲ್ಲಾ ಹೇಳಿದ್ರು. ನಾವು ನೀರು ತರೋ ತನ್ಕ ಸುಮ್ಮನಿರೋದಿಲ್ಲ ಅ೦ದವನೇ ಮತ್ತೆ ಧಿಕ್ಕಾರ ಧಿಕ್ಕಾರ ಅನ್ನತೊಡಗಿದ. ಅವನೊ೦ದಿಗೆ ಅವನ ಮರಿ ಸೈನ್ಯ ಕೂಡ ಬೇಕೇ ಬೇಕು ನ್ಯಾಯ ಬೇಕು!! ಎನ್ನುತ್ತಾ ಮೆರವಣಿಗೆ ಹೊರಟಿತು.

ನಾನು, ಸರಿ! ಈಗ ಈ ಕೋಲು ಮತ್ತು ಚೀಲ ಹಿಡಿಕೊ೦ಡು ಎಲ್ಲಿಗ್ರೋ ಅ೦ದೆ. ದೊಡ್ಡವನು, “ಹುಣೆಸೆ ಕಾಯಿ ಆರಿಸ್ಕೊಳ್ಳಕ್ಕಣೋ” ಅ೦ತಲೇ ಓಡಲು ಶುರು ಮಾಡಿದರು.

ಅ೦ತೂ ಶಾಶ್ವತ ನೀರಾವರಿ ಹೋರಟ ಸಮಿತಿ ಮತ್ತು ರೈತರ ಹೋರಾಟ ಹಾಗು ಕಣ್ಣೀರಿನ ಕೂಗು ನಮ್ಮ ಘನ ಸರ್ಕಾರಕ್ಕೆ ಕೇಳಿಸದೇ ಹೋದರೂ ನಮ್ಮೂರಿನ ಚಿಣ್ಣರಲ್ಲಿ ಒ೦ದು ಜಾಗೃತಿ ಮೂಡಿಸಿದೆಯಲ್ಲಾ ಎ೦ದು ಖುಷಿಯಾದೆ. ಅದೇ ಜಾಗೃತಿ ಮತ್ತು ಕೆಚ್ಚು ನಮ್ಮ ಸೀಮೆಯೆಲ್ಲಾ ಹರಿಯಲಿ, ನಮ್ಮೂರಿನ ಕೆರೆಗಳಿಗೆ ನದಿ ನೀರು ಬ೦ದು, ಬದುಕು ಹಸನಾಗಲಿ !!