ನಮ್ಮ ಹೆಮ್ಮೆಯ ಭಾರತ (ಭಾಗ 27 - 28)

೨೭.ಜಗತ್ತಿನ ಅತಿ ವಿಸ್ತಾರವಾದ ನದಿಬಯಲು
ಸಿಂಧೂ - ಗಂಗಾ - ಬ್ರಹ್ಮಪುತ್ರ ನದಿಬಯಲು ಜಗತ್ತಿನ ಅತಿ ವಿಸ್ತಾರವಾದ ನದಿಬಯಲು. ಇದರ ಉದ್ದ ೩,೨೦೦ ಕಿಮೀ. ಇದರ ಒಂದು ಭಾಗ ಭಾರತದಲ್ಲಿದ್ದರೆ, ಇನ್ನೊಂದು ಭಾಗ ಪಾಕಿಸ್ಥಾನದಲ್ಲಿದೆ. ಭಾರತದಲ್ಲಿರುವ ಭಾಗದ ಉದ್ದ ೨,೪೦೦ ಕಿಮೀ. ಮತ್ತು ಸರಾಸರಿ ಅಗಲ ೧೫೦ರಿಂದ ೩೦೦ ಕಿಮೀ. ಇದು ವ್ಯಾಪಿಸಿರುವ ಪ್ರದೇಶ ೭.೮ ಲಕ್ಷ ಚದರ ಕಿಮೀ.

ಈ ನದಿಬಯಲು ಸಿಂಧೂ, ಗಂಗಾ ಮತ್ತು ಬ್ರಹ್ಮಪುತ್ರ ನದಿಗಳ ಹಾಗೂ ಅವುಗಳ ಉಪನದಿಗಳ ಬಯಲುಗಳನ್ನು ಒಳಗೊಂಡಿದೆ. ಇದು ಜಗತ್ತಿನಲ್ಲೇ ಜನಸಾಂದ್ರತೆ ಅತ್ಯಂತ ಹೆಚ್ಚಾಗಿರುವ ಪ್ರದೇಶಗಳಲ್ಲಿ ಒಂದಾಗಿದೆ. ಹಾಗೂ ಇದು ಬಹಳ ಫಲವತ್ತಾದ ನದಿಬಯಲು. ಯಾಕೆಂದರೆ ಈ ನದಿಗಳೂ ಉಪನದಿಗಳೂ ಹೊತ್ತು ತರುವ ಮೆಕ್ಕಲು ಮಣ್ಣು ಇಲ್ಲಿ ತುಂಬಿಕೊಂಡಿದೆ.

ಜೊತೆಗೆ ಹಲವು ರಾಜ್ಯಗಳೂ ನಾಗರಿಕತೆಗಳೂ ಈ ನದಿಬಯಲಿನಲ್ಲಿ ಪ್ರಗತಿ ಹೊಂದಿದವು. ಯಾಕೆಂದರೆ, ಈ ನದಿಗಳೇ ವಾಣಿಜ್ಯ ಮತ್ತು ಸಾಗಾಟದ ಪಥಗಳಾಗಿದ್ದವು.

೨೮.ಅದ್ಭುತ ಪ್ರಾಣಿ ರಾಯಲ್ ಬೆಂಗಾಲ್ ಹುಲಿ
ದೊಡ್ಡ ಬೆಕ್ಕುಗಳಲ್ಲಿ ಭಾರೀ ಗಾತ್ರದ ಪ್ರಾಣಿ ರಾಯಲ್ ಬೆಂಗಾಲ್ ಹುಲಿ. ಕಿತ್ತಳೆ ಬಣ್ಣದಲ್ಲಿ ಕಪ್ಪು ಪಟ್ಟಿಗಳಿರುವ ಇದರ ಚರ್ಮ ಮನಮೋಹಕ. ಇದರ ಹೊಟ್ಟೆಯ ಕೆಳಭಾಗದ ಬಣ್ಣ ಬಿಳಿ; ಉದ್ದ ಬಾಲ; ಶಕ್ತಿಯುತ ಪಂಜಗಳು; ಹರಿತ ಹಲ್ಲುಗಳಿಂದಾಗಿ ಭಯಾನಕ ಪ್ರಾಣಿಯಾಗಿ ಕಾಣಿಸುತ್ತದೆ. ಬುದ್ಧಿವಂತಿಕೆ ಮತ್ತು ವೇಗದ ಧಾಳಿಗಳಿಂದಾಗಿ ಇವು ಚತುರ ಬೇಟೆಗಾರರೆಂದು ಹೆಸರಾಗಿವೆ. ಹುಲಿಗಳ ತೀಕ್ಷ್ಣ ದೃಷ್ಟಿ ಮತ್ತು ಸೂಕ್ಷ್ಮ ಶ್ರವಣಶಕ್ತಿ ಇವುಗಳಿಗೆ ತಮ್ಮ ಮಿಕಗಳನ್ನು ಬೇಟೆಯಾಡಲು ಸಹಕರಿಸುತ್ತದೆ. ಹಲವು ಶತಮಾನಗಳಿಂದ ಹುಲಿಗಳು ಭಾರತೀಯ ಜನಪದದ ಭಾಗವಾಗಿವೆ.

ಎರಡು ಶತಮಾನಗಳ ಮುಂಚೆ ಭಾರತದಲ್ಲಿ ಸಾವಿರಾರು ಹುಲಿಗಳಿದ್ದವು. ಬ್ರಿಟಿಷರ ಕಾಲದಲ್ಲಿ ಇವನ್ನು ಬೇಟಿಯಾಡುವುದೇ ಒಂದು ಕ್ರೀಡೆಯಾಯಿತು. ಅದಲ್ಲದೆ, ಹುಲಿಗಳ ಚರ್ಮ, ಉಗುರು ಮತ್ತು ಎಲುಬುಗಳಿಗಾಗಿ ಇವನ್ನು  ಗೊತ್ತುಗುರಿಯಿಲ್ಲದೆ ಕೊಲ್ಲಲಾಯಿತು. ಈಗಲೂ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇವುಗಳ ಚರ್ಮ ಮತ್ತು ಉಗುರುಗಳಿಗೆ ಲಕ್ಷಗಟ್ಟಲೆ ರೂಪಾಯಿ ಬೆಲೆಯಿದೆ. ಈ ಕಾರಣಗಳಿಂದಾಗಿ ಇವುಗಳ ಸಂಖ್ಯೆ ಕಡಿಮೆಯಾಗುತ್ತಾ ಹುಲಿಗಳು ಅಳಿವಿನಂಚಿಗೆ ತಲಪಿದವು. ಆಗ ಭಾರತ ಸರಕಾರ ಎಚ್ಚೆತ್ತುಕೊಂಡು ಹುಲಿ ಸಂರಕ್ಷಣಾ ವಲಯಗಳನ್ನು ಮತ್ತು ಯೋಜನೆಗಳನ್ನು ಘೋಷಿಸಿತು. ಸಂಘಟಿತ ಪ್ರಯತ್ನಗಳಿಂದಾಗಿ, ಇತ್ತೀಚೆಗಿನ ವರುಷಗಳಲ್ಲಿ ಹುಲಿಗಳ ಸಂಖ್ಯೆಯಲ್ಲಿ ಹೆಚ್ಚಳವಾಗಿದೆ.

ಫೋಟೋ ೧: ಭಾರತದ ಅತ್ಯಂತ ಉದ್ದದ ಗಂಗಾನದಿಯ ಸೇತುವೆ

ಫೋಟೋ ೨: ಸುಂದರಬನದಲ್ಲಿ ರಾಯಲ್ ಬೆಂಗಾಲ್ ಹುಲಿ