ನಮ್ಮ ಹೆಮ್ಮೆಯ ಭಾರತ (ಭಾಗ 75 - 76)

೭೫.ಧ್ಯಾನ್ ಚಂದ್ - ಜಗತ್ತಿನ ಶ್ರೇಷ್ಠ ಹಾಕಿ ಆಟಗಾರ
ಧ್ಯಾನ್ ಚಂದ್ "ಹಾಕಿ ಮಾಂತ್ರಿಕ" ಎಂದೇ ಪ್ರಸಿದ್ಧರು. ತನ್ನ ೧೬ನೆಯ ವಯಸ್ಸಿನಲ್ಲಿ ಭಾರತೀಯ ಸೈನ್ಯ ಸೇರಿಕೊಂಡಾಗ ಅವರು ಹಾಕಿ ಆಟವಾಡಲು ಕಲಿತರು. ಅನಂತರ ಅವರು ಹಾಕಿ ಆಟದ ದಂತಕತೆಯಾದರು.

ಭಾರತದ ಹಾಕಿ ತಂಡವು, ನಿರಂತರ ಮೂರು ಒಲಿಂಪಿಕ್ ಸ್ಪರ್ಧೆಗಳಲ್ಲಿ ಚಿನ್ನದ ಪದಕ ಗಳಿಸಲು ಧ್ಯಾನ್ ಚಂದ್ ತಮ್ಮ ಹಾಕಿ ಪ್ರೌಡಿಮೆಯಿಂದ ಸಹಕರಿಸಿದರು. ೧೯೩೬ರ ಬರ್ಲಿನ್ ಒಲಿಂಪಿಕ್ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆದ್ದ ಭಾರತದ ಹಾಕಿ ತಂಡದ ನಾಯಕ ಧ್ಯಾನ್ ಚಂದ್. ತನ್ನ ಹಾಕಿ ಸ್ಪರ್ಧಾ ಜೀವನದಲ್ಲಿ ಅವರು ಗಳಿಸಿದ ಗೋಲುಗಳು ೧,೦೦೦ಕ್ಕಿಂತ ಅಧಿಕ.

ಹಾಕಿ ಕ್ರೀಡೆಯಲ್ಲಿ ಅವರ ಸಾಧನೆಗಾಗಿ ಅವರಿಗೆ ಪದ್ಮ ಭೂಷಣ ಪುರಸ್ಕಾರ ನೀಡಿ ಗೌರವಿಸಲಾಗಿದೆ. ಅವರ ಜನ್ಮದಿನವನ್ನು ರಾಷ್ಟ್ರೀಯ ಕ್ರೀಡಾ ದಿನವಾಗಿ ಆಚರಿಸಲಾಗುತ್ತಿದೆ. ೩ ಡಿಸೆಂಬರ್ ೧೯೭೯ರಂದು ಅವರು ವಿಧಿವಶರಾದರು.

೭೬.ವಿಶ್ವನಾಥನ್ ಆನಂದ್ - ಭಾರತೀಯ ಚದುರಂಗದ ದಂತಕತೆ
ಜಗತ್ತಿನ ಶ್ರೇಷ್ಠ ಚದುರಂಗ ಆಟಗಾರರಲ್ಲಿ ಒಬ್ಬರಾದ ಭಾರತದ ವಿಶ್ವನಾಥನ ಆನಂದ್ ಅವರನ್ನು "ಮಿಂಚಿನ ಚದುರಂಗ ಪಟು" ಎಂದು ಕರೆಯುತ್ತಾರೆ - ಅವರ ಚದುರಂಗದಾಟದ ವೇಗಕ್ಕಾಗಿ.

ತನ್ನ ತಾಯಿಯಿಂದ ಚದುರಂಗ ಕಲಿತ ವಿಶ್ವನಾಥನ್ ಆನಂದ್ ಕೇವಲ ೧೬ನೇ ವಯಸ್ಸಿನಲ್ಲಿ ರಾಷ್ಟ್ರೀಯ ಚದುರಂಗ ಚಾಂಪಿಯನ್ ಆದರು. ತನ್ನ ೧೮ನೇ ವಯಸ್ಸಿನಲ್ಲಿ, ಭಾರತದ ಪ್ರಪ್ರಥಮ ಚೆಸ್ ಗ್ರಾಂಡ್ ಮಾಸ್ಟರ್ ಆದರು. ೧೯೮೭ರಲ್ಲಿ, ಜಾಗತಿಕ ಜ್ಯೂನಿಯರ್ ಚೆಸ್ ಚಾಂಪಿಯನ್‌ಷಿಪ್ ಗೆದ್ದ ಮೊತ್ತಮೊದಲ ಏಷ್ಯಾದ ಚದುರಂಗ ಪಟು ಎನಿಸಿದರು.

ವರುಷ ೨೦೦೦ದಲ್ಲಿ ಚದುರಂಗ ಸ್ಪರ್ಧೆಯಲ್ಲಿ ವಿಶ್ವನಾಥನ್ ಆನಂದ್ ಜಾಗತಿಕ ಉತ್ತುಂಗಕ್ಕೆ ಏರಿದರು - ಜಾಗತಿಕ ಚೆಸ್ ಚಾಂಪಿಯನ್ ಆಗುವ ಮೂಲಕ. ಚದುರಂಗದಲ್ಲಿ ತನ್ನ ಅದ್ಭುತ ಸಾಧನೆಗಳಿಗಾಗಿ ಹಲವಾರು ಪ್ರಶಸ್ತಿಗಳನ್ನು ಗಳಿಸಿದ್ದಾರೆ. ಭಾರತದಲ್ಲಿ ಯುವಜನತೆಯಲ್ಲಿ ಚದುರಂಗವನ್ನು ಜನಪ್ರಿಯಗೊಳಿಸಲಿಕ್ಕಾಗಿ ಹಲವಾರು ಕಾರ್ಯಕ್ರಮಗಳಲ್ಲಿ ನಿರಂತರವಾಗಿ ಭಾಗವಹಿಸುತ್ತಿದ್ದಾರೆ ವಿಶ್ವನಾಥನ್ ಆನಂದ್.

ಫೋಟೋ ೧: ಧ್ಯಾನ್ ಚಂದ್

ಫೋಟೋ ೨: ವಿಶ್ವನಾಥನ್ ಆನಂದ್