ಪಂಜೆಯವರ ಮಕ್ಕಳ ಪದ್ಯಗಳು - ಭಾಗ ೧೦

ಕಳೆದ ವಾರ ಪಂಜೆಯವರ ‘ಹಳೆಯ ಹಾಡು’ ಸಂಕಲನದಿಂದ ಜೋಗುಳ ಎನ್ನುವ ಕವನವನ್ನು ಪ್ರಕಟ ಮಾಡಿದ್ದೆವು. ಈ ವಾರ ‘ಆನಂದ' ಎನ್ನುವ ಕವನ ಸಂಕಲನದಿಂದ ‘ಜೋಗುಳ ಹಾಡು ಎನ್ನುವ ಕವನವನ್ನು ಆಯ್ದು ಪ್ರಕಟ ಮಾಡುತ್ತಿದ್ದೇವೆ.

‘ಜೋಗುಳ ಹಾಡು'

ಜೋಗುಳ ಹಾಡನ್ನು ಲಾಲಿಸು, ಜೋ ! ಜೋ!

ತೂಗುವೆ ತೊಟ್ಟಿಲ, ಮಲಗಿರು, ಜೋ ! ಜೋ !

ಸುಮಲತೆಗಳ ಪರಿಮಳವ ಬಿತ್ತರಿಸಿ

ಕಮಲದ ಕೋಮಲ ಗಂಧವ ಬೆರಸಿ,

ಮಂದ ಮಾರುತವು ಬೀಸುತ್ತಿರಲಿನಿಸು,

ತಂದೆ, ತಂದಿಹೆನೊಂದು ಮುದ್ದಿನ ಕನಸು.

ಮೊದಲೆವೆಗಳನು ಮುಕುಳಿಸೆನ್ನ ಸಿರಿಯೇ !

ತೊದಲನ್ನು ನಿಲ್ಲಿಸೆನ್ನಯ ಹೊನ್ನ ಮರಿಯೇ !

ಸದ್ದು ಮಾಡಲು ಬೇಡ ನೀ ಶಾಂತನನಿಸು !

ಕದ್ದು ತಂದಿಹೆನೊಂದು ಮುದ್ದಿನ ಕನಸು !

ರವಿ ಮುಳುಗಿಹನು, ಕಂದಿತು ಸಂಜೆಗಿಂಪು ;

ಸವಿಯಾಗಿ ಕಾಂಬುದು ಚಂದ್ರನ ಸೊಂಪು.

ನೊಂದಿಸು ನಿನ್ನಯ ಮಾಯೆಯ ಮುನಿಸು !

ತಂದೆನಿಗೋ, ಚಿಕ್ಕ ಮುದ್ದಿನ ಕನಸು !

ತನುಮನ ಧನವನರ್ಪಿಸಿ ಮೋದದಿಂದಾ

ವಿನಿಯೋಗಿಸುತ ಬಲು ಸಾಸಿಗನೆನಿಸು !

ಜನನ ಭೂಮಿಯ ಸೇವೆಯನು ಮಾಡೊ ಕಂದಾ !

ಜನುಮ ಎಂಬುದು ಪುಟ್ಟ ಮುದ್ದಿನ ಕನಸು.

ಮಲಗೊ! ವಿಶ್ರಮಿಸೆನ್ನ ಮೋಹದ ಗೊಂಬೆ !

ಮಲಗೊ ! ಗಲ್ಲವನೊತ್ತಿ ನಾ ಬೇಡಿಕೊಂಬೆ,

ರಂಗನಾಥನೆ ! ಸರ್ವದಾ ನೀ ಸಮನಿಸು,

ಮಂಗಳಕರವಾದ ಮುದ್ದಿನ ಕನಸು.

(‘ಆನಂದ' ಕವನ ಸಂಕಲನದಿಂದ ಸಂಗ್ರಹಿತ)