ಪುಗಸಟ್ಟೆ ಬಾಳು-ಚೆಂದಾಗಿ ಬಾಳು

ಪುಗಸಟ್ಟೆ ಬಾಳಲ್ಲಿ ಕೆಲ್ಸಗೆಟ್ಟು ಕೂಡಬ್ಯಾಡ್ರಿ

ಬೊಗಸೀಗೆ ಸಿಕ್ಕಷ್ಟು ಶ್ರಮಿಸೋಣ್ರಿ | ಬನ್ನೀರಿ

ಮುಗಿಲಾಗ ನಮ್ಹೆಸ್ರು ಹೊಳೆತೈತ್ರೀ ||

ಹಸಿರಾಗ ಉಸಿರೈತಿs ಹೆಸರಾಗ ಏನುಐತಿs

ಖುಷಿಯಾಗ ಹಸಿರನ್ನ ಬೆಳೆಸೋಣ್ರಿ | ಬನ್ನೀರಿ

ಹಸಿಹಸಿಯ ವೃಕ್ಷವ ಕಡಿಬ್ಯಾಡ್ರಿss ||

ಹುಸಿಬಿಟ್ಟು ಮರ್ಗಬ್ಯಾಡ್ರಿ ಕಸುವೀಲೆ ದುಡಿದ್ಬಿಡ್ರಿ

ಕಸದಲ್ಲಿ ರಸವಾss ತಗಿಯೋಣ್ರಿ | ಬನ್ನೀರಿ

ಕಾಸಿದ್ರದು ಕೈಲಾಸ ಮರೀಬ್ಯಾಡ್ರಿ||

ಕುಳಿತುಂಡ್ರೆ ಕುಡ್ಕಿಹೊನ್ನು ಸಾಲ್ದಂಗ ಆಗತೈತಿ

ತಿಳುಕೊಂಡು ದುಡಿಮೆ‌ ಮಾಡೋಣ್ರಿ | ಬನ್ನೀರಿ

ಬಳುಕೊಳ್ಳಿ ಮನಃಶ್ಯಾಂತಿ ಎದೆಯಾಗ್ರೀ ||

ಆಲಸ್ಯ ತರವಲ್ಲ ಮನುಸ್ಯಾನ ಜನುಮಾಕs

ಕಲ್ಲರಳಿ ಹೂವಾಗಿ ಬೆಳಗ್ತೈತ್ರಿ | ಜಗದೊಳ್ಗ

ಜಲದಂತೆ ಯಾವತ್ತೂ ಬಾಳಬೇಕ್ರೀ ||

-ಈರಪ್ಪ ಬಿಜಲಿ ಕೊಪ್ಪಳ