ಬಾಳ ಗೆಳತಿ

ಚಿಂತಿಸದಿರು ಗೆಳತಿ ಹೀಗೆ

ನಲ್ಲ ಜೊತೆಗೆ ಜೊತೆಯೆ ಇಲ್ಲೆ

ಕೊಡವ ಹಿಡಿದು ನಡೆದೆಯಲ್ಲೆ

ಕಾಲಿಗೆಂಥ ಆಯಿತೇನೊ

ಹೊಕ್ಕ ಮುಳ್ಳ ತೆಗೆಯಲೇನೊ

ನೋವ ತಿನುತ ನಡೆದೆಯಲ್ಲೆ

ಜೀವನದ ಬದುಕಿನೊಳಗೆ

ಜೀವ ಭಾವ ಸೇರಿದಾಗ

ನೋವ ಪಡೆದು ನಡೆದೆಯಲ್ಲೆ

ಕೊಡದಿ ಜಲವು ತುಂಬಿದಾಗ

ಮುಸಿಯ ನಗುವ ಸೂಸುತಲಿ

ಗೆಲುವಿನೊಡನೆ ನಡೆದೆಯಲ್ಲೆ

ತಂಪು ಹೊತ್ತು ನೀರ ತರುತ

ಬಿರು ಬಿಸಿಲಿಗೆ ಮನೆಯ ಸೇರೆ

ಚೆಲುವ ಹೊತ್ತು ನಡೆದೆಯಲ್ಲೆ

ಮನದ ತುಂಬ ನೀನೆ ನೀರೆ

ಕೈಯ ಹಿಡಿದೆ ಬಳಿಗೆ ಬಾರೆ 

ಬಾಳಿನೊಳಗೆ ನಡೆದೆಯಲ್ಲೆ 

-ಹಾ ಮ ಸತೀಶ ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ