ಬಿಡುಗಡೆಯ ಹಾಡುಗಳು (ಭಾಗ ೨೮) - ಬಿ. ನೀಲಕಂಠಯ್ಯ
ಬಿ. ನೀಲಕಂಠಯ್ಯನವರ ‘ಕಾಂಗ್ರೆಸ್ ಲಾವಣಿ’ ಯ ಕೊನೆಯ ಭಾಗವನ್ನು ಈ ವಾರ ಪ್ರಕಟ ಮಾಡಿದ್ದೇವೆ.
ಕಾಂಗ್ರೆಸ್ ಲಾವಣಿ -೩
ಚಾಲ್
ಕಾಂಗ್ರೆಸ್ ಒಂದನೆ ಬೆಂಗ್ಳೂರ್ ಮೂರನೆ ಜಂಗಾಯಿತು ಇದು ಎನುತೊಬ್ಬ ।
ಕಾಂಗ್ರೆಸ್ ಘನಸಂಗ್ರಾಮವ ಕೇಳಿದ ಆಂಗ್ಲರಿಗಾಯಿತು ಅಬ್ಬಬ್ಬಾ ॥
ಈ ಕರ್ನಾಟಕ ಸ್ವರಾಜ್ಯ ಪಕ್ಷದ ಕಾಂಗ್ರೆಸ್ಸಿನ ಘನ ಶೋಭಾನ ।
ಶ್ರೀ ಕೆ. ಚಂಗಲರಾಯರೆಡ್ಡಿಗಳ ಸರ್ವಾಧಿಕಾರದ ಸುಧಾರಣ ॥
ಲೋಕದಿ ವಿ ಎಸ್ ನಾರಾಯಣರಾಯರ ಕಾರ್ಯದರ್ಶಿತನ ಮಹಾಘನ ।
ಶ್ರೀಕರ ಹೆಚ್ ಸಿ ದಾಸಪ್ಪನವರಾ ಶೀಘ್ರಾಲೋಚನ ಸುಭಾಷಣ ॥
ಸ್ತ್ರೀಕುಲಭೂಷಿಣಿ ಶ್ರೀಮತಿ ಬಳ್ಳಾರಿ ಸಿದ್ದಮ್ಮನವರಾ ಧೀರತನ ।
ವ್ಯಾಕುಲವಳಿಯುವ ಬಂಧುಭಗಿನಿಯರ ಸ್ವದೇಶಭಕ್ತಿಯ ಅಭಿಮಾನ ॥
ದೊಡ್ಡುಡನ್
ದೇಶದ ಸೇವೆಯ ಮಾಡುವುದೆ ಈ ದೇಶಬಾಂಧವರ ಉದ್ದೇಶ ।
ದೇಶದ ಬಡತನ ನಾಶಮಾಡಲು ಹೇಸದೆ ದುಡಿಯುವದತಿ ಹರುಷ ॥
ದೇಶ ಪ್ರೀತಿಗಿದು ವಿಶೇಷಭೂಷಣ ಚಂದೂರರ ಮಹ ಉಪವಾಸ ।
ದೇಶದ ದುಸ್ಥಿತಿ ದೂಡುವದೇ ನಮ್ ಕಾಂಗ್ರೆಸ್ಸಿನ ಕಡೆ ಸಂದೇಶ ॥
ಉಡನ್
ರೈತಾಪಿಯ ಕಷ್ಟವೆ ತಮ್ಮಯ ಕಷ್ಟವೆಂದಿರುವರು ।
ರೈತಾಪಿಸುಧಾರಣೆ ಸಾಧಿಸುತಲಿರುತಿಹರು ॥
ರೈತಾಪಿಜನಾಂಗದ ಕುಂದುಕೊರತೆ ಅರಿತಿವರು ।
ರೈತಾಪಿಯ ಕಷ್ಟಗಳೆಲ್ಲ ಬಿಡದೆ ಹರಿಸುವರು ॥
ಗುಲ್ಲುಡನ್
ಇದುವೆ ನಿಜ ಬೂಟಕವೇನಲ್ಲ । ಬುಧರೆ ಇದು ಯೋಚಿಸಿ ನೀವೆಲ್ಲ ।
ಚದುರ ಸರಿಯಿಲ್ಲವರರಿಗೆ । ಮದರಾಸಿನ ಘನ ಪ್ರಧಾನಮಾತ್ಯರ ಉದಾರ ವ್ಯಾಕಿಲ್ಲಾ ॥
ಶ್ಲೋಕ
ವಾಕ್, ಸಭಾ ಮೇಣ್ ಪತ್ರಿಕಾಸ್ವಾತಂತ್ರ್ಯ ಮೈಸೂರ್ ಜನರಿಗೆ ।
ಬೇಕಾಗಿರುವುದು ಜಬಾಬ್ದಾರ್ ಸರಕಾರ ಘನ ಮೈಸೂರಿಗೆ ॥
ಚಾಲ್
ಮಂಗಳ ಸುಬ್ರಹ್ಮಣ್ಯ ಜೋಯಿಸ್ ರಂಗರಾಮರಿಗೆ ಏನುತೊಬ್ಬ ।
ಕಾಂಗ್ರೆಸ್ ಘನ ಸಂಗ್ರಾಮವ ಕೇಳಿದ ಆಂಗ್ಲರಿಗಾಯಿತು ಅಬ್ಬಬ್ಬಾ॥
ಘಾತಕ ಜನರಿಗೆ ನೀತಿಯ ಬೋಧಿಸಿ ಖ್ಯಾತಿಯವೊಂದಿದೆ ನಮ್ ಕಾಂಗ್ರೆಸ್ ।
ಬೋತೆರ ದೀನನಾಥರ ಪರಿಪರಿ ಯಾತನೆ ಕಳೆಯುವುದೀ ಕಾಂಗ್ರೆಸ್ ॥
ಪ್ರೀತಿಲಿ ಸರ್ವಜನಾಂಗದ ಹಿತವನೆ ಸಾಧಿಸುತ್ತಿರುವುದು ನಮ್ ಕಾಂಗ್ರೆಸ್ ।
ಕಾತುರದಿಂದಲಿ ನೂತನ ವ್ಯಥೆಗಳ ಘಾತಕ ಹರಿಸುವುದೀ ಕಾಂಗ್ರೆಸ್ ॥
ಜಾತಿಯ ಭೇದದ ರೀತಿಯ ವರ್ಜಿಸಿ ಕೀರ್ತಿಯವೊಂದಿದೆ ನಮ್ ಕಾಂಗ್ರೆಸ್ ।
ರೈತರು ಏಳಿಗೆ ಕರ್ತವ್ಯ ಲಾಲಿಸಿ ಪ್ರಾರ್ಥಿಸುತ್ತಿರುವುದು ನಮ್ ಕಾಂಗ್ರೆಸ್ ॥