ಬೇವರ್ಸಿ ದೇವರು !!

ಗುಡಿ ಮುಂದಿನ ಬಿಕ್ಷುಕಿ ಬಿಕ್ಕುತಿಹಳು ,,,,,,,

ದಿನವೂ ಇಲ್ಲಿಯೇ 
ದೇವನ ಭಜಿಸಿ
ದಕ್ಕಿದ್ದೆರಡು  ಉರೂಟು ಪಾವಲಿಯಲಿ 
ಹೊಟ್ಟೆಗಿಲ್ಲದೆ ಕಿರುಚುವಾಗ 

ಎಲ್ಲಿದ್ದ ನನ್ನ ದೇವರು ?
ಆ ಬೇವರ್ಸಿ ದೇವರು ?

ಕಣ್ಣಿರದ ನನ್ನ ಕಂದಾ 
ಅವ್ವಾ ಎಂದು ಕಿರುಚಿ 
ಗುಡಿ ಎದುರಲ್ಲೇ 
ಗಾಡಿಗೆ ಸಿಕ್ಕಿ ಸತ್ತಾಗ 

ಎಲ್ಲಿದ್ದ ನನ್ನ ದೇವರು ?
ಆ ಬೇವರ್ಸಿ ದೇವರು ?

ರಾತ್ರಿ, ಗುಡಿಯಾ ಮಗ್ಗುಲಲಿ 
ಕುಡುಕನೊಬ್ಬ  ಅವನ 
ಪುರುಷತ್ವದ ಖದ್ಗಡಲಿ 
ಹೆಣ್ತನವ ಇರಿಯಲು ಬಂದಾಗ 

ಎಲ್ಲಿದ್ದ ನನ್ನ ದೇವರು ?
ಆ ಬೇವರ್ಸಿ ದೇವರು ?

ಸತ್ತವರಿಗೆಸೆದ 
ತೆಂಗಿನ ಚೂರನು 
ನಾಯಿಗೆ ಪೈಪೋಟಿಯಲಿ 
ನಾ ಕಚ್ಚಿ ತಿನ್ನುವಾಗ 

ಎಲ್ಲಿದ್ದ ನನ್ನ ದೇವರು ?
ಆ ಬೇವರ್ಸಿ ದೇವರು ?

ನನ್ನ ಗರ್ಭದೊಳಗೆ 
ಯಾರದೋ ವೀರ್ಯದ ಆತ್ಮ  
ಅನ್ನವಿಲ್ಲದೆ ಕರಕಲಾಗಿರುವಾಗ 
ಅವನು,,, ಗರ್ಭ ಗುಡಿಯೊಳಗೆ 
ಬೆಚ್ಚಗೆ ಮಲಗಿಹನು 

ಅವನಾವ ದೇವರು?
ಬಿಕ್ನಾಸಿ ದೇವರು?

ಅವ್ವ-ಅಪ್ಪ ಅಂತ ದೈನ್ಯವಾಗಿ 
ನಾ ಬೇಡಿದರೂ 
ಕೆಂಗಣ್ಣು ಬೀರಿ ಹೋಗುವ ಜನ 
ಅವನ ಹುಂಡಿಯೊಳಗೆ 
ಲಕ್ಷ ಲಕ್ಷ ಸುರಿದು ಸುಡುವಾಗ 

ಅವನೇನಾ ದೇವರು?
ಅಡ್ನಾಡಿ ದೇವರು ?

ಭಕ್ಷಕರ ರಕ್ಷಕ ಅಷ್ಟೇ ಆತ !
ಕುತಂತ್ರಿಗಳ ಮಂತ್ರಿ ಅಷ್ಟೇ ಆತ !

ಇದ್ದವರ ಗದ್ದಕ್ಕೆ ಮುತ್ತಿಟ್ಟು ರಮಿಸುವವ,,,
ಪುರುಷ ಪುಂಗವ ಆತ,,,,

-- ನಾನೆಂಬ ಅಹಂಕಾರ