ಬೊಗಸೆ ತುಂಬಾ ಹನಿಗಳು!

ಜೀವ ಸೆಲೆ

ಓ ನಯನಗಳೇ ನಿಮ್ಮಿಂದ

ಜಗದ ಸೌಂದರ್ಯ ಸವಿದೆ;

ಕಿವಿಗಳೇ ನಿಮ್ಮಿಂದ

ಮಧುರ ಗಾನವ ಕೇಳ್ದೆ;

ನಾಸಿಕವೇ ನಿನ್ನಿಂದ

ಸುವಾಸನೆಯ ಸವಿ ಕುಡಿದೆ;

ಜಿಹ್ವೆಯೇ ನಿನ್ನಿಂದ

ಸವಿರುಚಿಯ ಚಪ್ಪರಿಸಿದೆ;

ಚರ್ಮವೇ ನಿನ್ನಿಂದ

ಸ್ಪರ್ಶ ಸುಖವ ಪಡೆದೆ-

ಓ ಮಸ್ತಕವೇ ನೀನೆಲ್ಲರನು

ಹದವರಿತು ಮೇಳೈಸಿದೆ-

ಇದೆಲ್ಲಾ ಆ ಜೀವಸೆಲೆಯ

ಮಹತ್ವದ ಕೊಡುಗೆಯಲ್ತೇ;

ಎನ್ನ ಜೀವಿಯೆಂದೆನಿಸಿದುದಕೆ

ಶರಣು ಶರಣು ಜೀವನೆಲೆಯೇ!

***

ಮೌಲ್ಯ

ಮತ ಹಾಕಲು

ಹೋಗುವಾಗ

ನಾನು-

ಇರುವೆ ಮುತ್ತಿದ

ಬೆಲ್ಲ;

ಲಕ-ಲಕ ಹೊಳೆವ

ಚಲಾವಣೆಯ 

ನಾಣ್ಯ....

ಓಟನು ಒತ್ತಿ

ವಾಪಾಸ್

ಬರುವಾಗ-

ಜೇನು ತೊರೆದ

ಗೂಡು;

ಮೌಲ್ಯ 

ಕಳೆದುಕೊಂಡು

ನಗಣ್ಯ!

***

ಧನ್ಯವಾದಗಳು...

ಓ ಮತದಾನವೆಂಬ

ಪರಮ ಶ್ರೇಷ್ಠನೇ

ನಿನಗಿದೋ

ವಿನಮ್ರ ಗೌರವದ

ನಮಸ್ಕಾರ-

ನಮ್ಮನಾಳುವ

ಮಂತ್ರಿಗಳು

ಸರಳವಾಗಿ;

ಹೊಗಳು ಭಟ್ಟರ

ಪಟಾಲಂ ಇಲ್ಲದೆ;

ಬಾಜಾ ಭಜಂತ್ರಿಗಳ

ನರ್ತನವಿಲ್ಲದೆ;

ವಿನೀತರಾಗಿ

ಸರತಿ ಸಾಲಿನಲ್ಲಿ ನಿಂತು;

ಸರಳ ನಗುಮೊಗದ

ಸಾತ್ವಿಕನಂತೆ 

ಪೋಸ್ ಕೊಟ್ಟು;

ತನಗೆ ತಾನೇ

ಮತದಾನ

ಮಾಡಿಕೊಳ್ಳುವಂತೆ

ಮಾಡಿದ್ದಕ್ಕೆ....

ಧನ್ಯವಾದಗಳು ನಿನಗೆ

ಓ ಪ್ರಜಾ ಪ್ರಭುತ್ವದ

ಪರಮ ಶ್ರೇಷ್ಠನೇ!

-ಕೆ ನಟರಾಜ್, ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ