ಭಾರತದಲ್ಲಿ ಗೂಗಲ್ ನ ಅತ್ಯಂತ ವಿಶಾಲ ಶಾಖೆ ಬೆಂಗಳೂರಿನಲ್ಲಿ!

'ಟೆಕ್' ಅಥವಾ ತಂತ್ರಜ್ಞಾನ ಜಗತ್ತಿನ ಸುಪ್ರಸಿದ್ಧ ಸಂಸ್ಥೆಗಳಲ್ಲಿ ಒಂದಾಗಿರುವ ಸಂಸ್ಥೆ 'ಗೂಗಲ್' ಆಗಿದೆ. ಸರ್ಚ್ ಎಂಜಿನ್ ದೈತ್ಯ ಗೂಗಲ್ ಇಂಡಿಯಾ ಸಂಸ್ಥೆಯು ಈಗ ಬೆಂಗಳೂರಿನ ಮಹದೇವಪುರದಲ್ಲಿ ನಮ್ಮ ದೇಶದ ಅತೀ ದೊಡ್ಡ ಕ್ಯಾಂಪಸ್ ಅನ್ನು ಪ್ರಾರಂಭಿಸಿದೆ. ಗೂಗಲ್ ಸಂಸ್ಥೆಯು ಈ ಶಾಖೆಯ ಆಕರ್ಷಕ ಭವನಕ್ಕೆ 'ಅನಂತ' ಎಂದು ಹೆಸರಿಸಿದೆ. 'ಅನಂತ' ಅಂದರೆ 'ಅಗಣಿತ' ಅಥವಾ 'ಅಳೆಯಲಾಗದ' ಎಂದರ್ಥ; ಹೆಸರಿಗೆ ತಕ್ಕಂತೆ  ಈ ಶಾಖೆಯು 16 ಲಕ್ಷ ಚದರ ಅಡಿ ವಿಸ್ತರಿಸಿದೆ ಮತ್ತು ಸರಿಸುಮಾರು 5000 ಉದ್ಯೋಗಾವಕಾಶ ನಿರ್ಮಿಸಲಿದೆ. ಬೆಂಗಳೂರಿನಲ್ಲಿ ಗೂಗಲಿನ ಈ ನಾಲ್ಕನೇ ಕಚೇರಿಯು ಗೂಗಲ್ ಸರ್ಚ್, ಮ್ಯಾಪ್ಸ್, AI, ಆಂಡ್ರಾಯ್ಡ್, ಗೂಗಲ್ ಪೇ, ಕ್ಲೌಡ್ ಮತ್ತು ಬಹು-ಇಲಾಖೆಯ ಸಹಯೋಗಕ್ಕಾಗಿ ಹೆಚ್ಚಿನ ಅಪ್ಲಿಕೇಶನ್ ಗಳು ಸೇರಿದಂತೆ ವಿವಿಧ ವಿಭಾಗಗಳಲ್ಲಿ ಕೆಲಸ ಮಾಡಲಿದೆ.

ಭಾರತವನ್ನು ತಂತ್ರಜ್ಞಾನ ಕ್ಷೇತ್ರದ ಕೇಂದ್ರಬಿಂದು ಎಂದು ಗುರುತಿಸಿರುವ ಟೆಕ್ ದೈತ್ಯವು, ಜಾಗತಿಕವಾಗಿ ಗೂಗಲ್ ನ ಅತೀ ದೊಡ್ಡ ಶಾಖೆಗಳಲ್ಲಿ ಒಂದಾಗಿರುವ 'ಅನಂತ'ದ ಉದ್ಘಾಟನೆಯೊಂದಿಗೆ, ಭಾರತದೊಂದಿಗೆ ತಮ್ಮ ನಿರಂತರ ಬದ್ಧತೆಯ ಮಗದೊಂದು ಪ್ರಮುಖ ಮೈಲಿಗಲ್ಲನ್ನು ಹಂಚಿಕೊಳ್ಳಲು ಉತ್ಸುಕ್ತರಾಗಿದ್ದೇವೆ ಎಂದು ಹೇಳಿಕೊಂಡಿದೆ. ಕಳೆದ ಹಲವಾರು ವರ್ಷಗಳಿಂದ, ಗೂಗಲ್ ಭಾರತದಲ್ಲಿ ಹೆಚ್ಚಿನ ಹೂಡಿಕೆ ಮಾಡುತ್ತಿದೆ ಮತ್ತು AI, ಕೃಷಿ, ಸುಸ್ಥಿರತೆ ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ಸ್ಥಳೀಯ ಸ್ಟಾರ್ಟ್‌ಅಪ್‌ಗಳು ಮತ್ತು ಸರ್ಕಾರಿ ಸಂಸ್ಥೆಗಳೊಂದಿಗೆ ಸಹಕರಿಸುತ್ತಿದೆ.

ಹಲವು ವೈಶಿಷ್ಟ್ಯಗಳಿರುವ 'ಅನಂತ' ಕ್ಯಾಂಪಸ್ : ಇತರ ಗೂಗಲ್ ಕಚೇರಿಗಳಂತೆಯೇ, 'ಅನಂತ' ಕ್ಯಾಂಪಸ್ ಸಹ ಪರಿಸರ ಸ್ನೇಹಿಯಾಗಿದೆ; ಈ ಕ್ಯಾಂಪಸ್ ನಲ್ಲಿ ಮಳೆನೀರನ್ನು ಮತ್ತು ತ್ಯಾಜ್ಯ ನೀರನ್ನು ಮರುಬಳಕೆ ಮಾಡಲಾಗುವುದು; ಮಳೆನೀರು ಕೊಯ್ಲು ಸೌಲಭ್ಯ ಕೂಡ ಇರಲಿದೆ ಎಂದು ಸಂಸ್ಥೆ ಮಾಧ್ಯಮಗಳಿಗೆ ಮಾಹಿತಿ ನೀಡಿದೆ. ವಿದ್ಯುತ್ ಬಳಕೆಯನ್ನು ಕಡಿಮೆ ಮಾಡಲು ಕಟ್ಟಡದ ಮೇಲೆ ದೊಡ್ಡ ಸ್ಮಾರ್ಟ್ ಎಲೆಕ್ಟ್ರೋ-ಕ್ರೋಮಿಕ್ ಗ್ಲಾಸ್ ಅನ್ನು ಅಳವಡಿಸಲಾಗಿದೆ. ಕಚೇರಿಯ ಒಳಾಂಗಣವನ್ನು ಬಹುತೇಕ ಸಂಪೂರ್ಣವಾಗಿ ಸ್ಥಳೀಯವಾಗಿ ದೊರೆಯುವ ವಸ್ತುಗಳಿಂದ ವಿನ್ಯಾಸಗೊಳಿಸಲಾಗಿದೆ. ಅಲ್ಲದೆ, ಇದು ದೃಷ್ಟಿಹೀನರ ನ್ಯಾವಿಗೇಷನ್‌ ಬೆಂಬಲಿಸುವ ಹೊಸ ಸ್ಪರ್ಶ ನೆಲಹಾಸನ್ನು ಹೊಂದಿದೆ, ಸುಲಭವಾಗಿ ಬಳಕೆ ಮಾಡುವ ಸೌಲಭ್ಯಗಳು ಮತ್ತು ಚಿಂತನಶೀಲ ಬ್ರೈಲ್ ವಿವರಗಳನ್ನೂ ಇರಿಸಲಾಗಿದೆ.

ಬೆಂಗಳೂರಿನ ಉದ್ಯಾನ ನಗರಿ ಎಂಬ ಹೆಸರಿನಿಂದ ಕ್ಯಾಂಪಸ್ ಮೈದಾನವು ಸ್ಪೂರ್ತಿ ಪಡೆದಿದೆ; ನಡಿಗೆಗೆ ಟ್ರ್ಯಾಕ್ ಹಾಗು ಅದ್ಭುತ ಭೂದೃಶ್ಯವನ್ನು ಈ ಕ್ಯಾಂಪಸ್ ಒಳಗೊಂಡಿದೆ. ಜಾಗಿಂಗ್ ಪಾಥ್ ಗಳು, ವರ್ಣರಂಜಿತ ಸೀಟಿಂಗ್ ಏರಿಯಾಗಳು, ಸಾಮಾನ್ಯ ಭೇಟಿಗಳಿಗೆ ಮತ್ತು ಮಾತುಕತೆಗಳಿಗೆ ಈ ಜಾಗ ಸೂಕ್ತವಾಗುವಂತೆ ನಿರ್ಮಿಸಲಾಗಿದೆ. "ಅನಂತದಲ್ಲಿರುವ ಪ್ರತಿಯೊಂದು ವರ್ಕಿಂಗ್‌ ಫ್ಲೋರ್‌ಅನ್ನು ನಗರ ಗ್ರಿಡ್‌ನಂತೆ ಆಯೋಜಿಸಲಾಗಿದೆ, ಸುಲಭ ಸಂಚರಣೆಗಾಗಿ ಬೀದಿಗಳ ಜಾಲವಿದೆ. ವೈಯಕ್ತಿಕ 'ನೆರೆಹೊರೆಗಳು' ಸಹಯೋಗವನ್ನು ಬೆಳೆಸುತ್ತವೆ ಮತ್ತು ವ್ಯಕ್ತಿಗಳಿಗೆ ಸಣ್ಣ ಮೂಲೆಗಳು ಮತ್ತು ಬೂತ್‌ಗಳಲ್ಲಿ ಗಮನಹರಿಸುವ ಸ್ವಾತಂತ್ರ್ಯವನ್ನು ನೀಡುತ್ತವೆ" ಎಂದು ಕಂಪನಿ ಹೇಳಿಕೊಂಡಿದೆ.

ಉದ್ಯೋಗಿಗಳಿಗಾಗಿ, ಗೂಗಲ್ ಅನಂತವು ವಿಶೇಷ ಮಕ್ಕಳ ಡೇಕೇರ್ ಕೇಂದ್ರವನ್ನು (6 ತಿಂಗಳಿಂದ 6 ವರ್ಷ ವಯಸ್ಸಿನ ಮಕ್ಕಳಿಗೆ), ಮಾನಸಿಕ ಸ್ವಾಸ್ಥ್ಯಕ್ಕಾಗಿ ಮೀಸಲಾದ ಸ್ಥಳಗಳು, ದೈಹಿಕ ಸದೃಢತೆಗಾಗಿ 1000 ಚದರ ಅಡಿ ವಿಸ್ತೀರ್ಣದ ಜಿಮ್, ಬ್ಯಾಡ್ಮಿಂಟನ್, ಪಿಕಲ್‌ಬಾಲ್, ವಾಲಿಬಾಲ್, ಕ್ರಿಕೆಟ್ ಮತ್ತು ಇತರವುಗಳಿಗಾಗಿ ಕೋರ್ಟ್‌ಗಳನ್ನು ಹೊಂದಿರುವ ಆಟದ ಪ್ರದೇಶವನ್ನು ಹೊಂದಿದೆ. "ಭಾರತವು ತನ್ನ ನಾಗರಿಕರಿಗೆ ತಂತ್ರಜ್ಞಾನದೊಂದಿಗೆ ಮಹತ್ವಾಕಾಂಕ್ಷೆಯ ಹೊಸ ವಾಸ್ತವವನ್ನು ರೂಪಿಸುತ್ತಿರುವುದರಿಂದ, ಕಳೆದ 20 ವರ್ಷಗಳಿಂದ ಗೂಗಲ್ ಅದರ ಹೆಮ್ಮೆಯ ಪಾಲುದಾರರಾಗಿದೆ. ಬೆಂಗಳೂರಿನಲ್ಲಿರುವ ಹೊಸ 'ಅನಂತ' ಕ್ಯಾಂಪಸ್ ನಮ್ಮ ಪ್ರಯಾಣದಲ್ಲಿ ಮಹತ್ವದ ಮೈಲಿಗಲ್ಲನ್ನು ಗುರುತಿಸುತ್ತದೆ; ಇದು AI ಯೊಂದಿಗೆ ನಡೆಯುತ್ತಿರುವ ತಾಂತ್ರಿಕ ಮಾದರಿ ಬದಲಾವಣೆಯನ್ನು ಗುರುತಿಸುತ್ತದೆ. ಭವಿಷ್ಯದಲ್ಲಿ ನಾವು ಕೆಲವು ಪ್ರಮುಖ ಕ್ಷೇತ್ರಗಳ ಮೇಲೆ ಕೇಂದ್ರೀಕರಿಸಿದ್ದೇವೆ. ವ್ಯಾಪಕವಾದ AI ಅಳವಡಿಕೆಯ ಮೂಲಕ ವ್ಯವಹಾರಗಳು ಮತ್ತು ವ್ಯಕ್ತಿಗಳನ್ನು ಸಬಲೀಕರಣಗೊಳಿಸುವುದು, ಕೃಷಿ, ಆರೋಗ್ಯ ಮತ್ತು ಫಿನ್‌ಟೆಕ್‌ನಂತಹ ಅದರ ವ್ಯವಸ್ಥಿತ ಕ್ಷೇತ್ರಗಳಲ್ಲಿ ಎಐ ಪ್ರಭಾವವನ್ನು ಇನ್ನಷ್ಟು ಹೆಚ್ಚಿಸುವ ಗುರಿ ಹೊಂದಿದ್ದೇವೆ' ಎಂದು ಗೂಗಲ್ ಇಂಡಿಯಾದ ಉಪಾಧ್ಯಕ್ಷೆ ಮತ್ತು ದೇಶ ವ್ಯವಸ್ಥಾಪಕಿ ಪ್ರೀತಿ ಲೋಬನಾ ಹೇಳಿದ್ದಾರೆ.

ಇದು ತನ್ನ ಮಧುಮೇಹ ರೆಟಿನೋಪತಿ AI ಮಾದರಿಯನ್ನು ಭಾರತದಲ್ಲಿ ಆರೋಗ್ಯ ಪೂರೈಕೆದಾರರು ಮತ್ತು ಆರೋಗ್ಯ-ತಂತ್ರಜ್ಞಾನ ಪಾಲುದಾರರಾದ ಫೋರಸ್ ಹೆಲ್ತ್ ಮತ್ತು ಆರೊಲ್ಯಾಬ್‌ಗೆ ಪರವಾನಗಿ ನೀಡಿತು. ಇದಲ್ಲದೆ, ಗೂಗಲ್ ಬೆಂಗಳೂರು ಮೂಲದ ಪರಿಸರ ಮತ್ತು ಸಾಮಾಜಿಕ ಉದ್ಯಮವಾದ ಸಾಹಸ್ ಝೀರೋ ವೇಸ್ಟ್ (SZW) ಗೆ ಓಪನ್ ಸೋರ್ಸ್ ಮೆಷಿನ್-ಲರ್ನಿಂಗ್ ಕಂಪ್ಯೂಟರ್ ವಿಷನ್ ಮಾದರಿಯಾದ ಸರ್ಕ್ಯುಲರ್ ನೆಟ್ ಅನ್ನು ನೀಡಿತು. ಬೆಂಗಳೂರು ಸೇರಿಕೊಂಡಂತೆ, ಗೂಗಲ್ ಭಾರತದಲ್ಲಿ ಗುರಗಾಂವ್, ಹೈದರಾಬಾದ್, ಮುಂಬೈ ಮತ್ತು ಪುಣೆ ಸೇರಿದಂತೆ ಹಲವಾರು ನಗರಗಳಲ್ಲಿ ತಮ್ಮ ಕಚೇರಿ ಕ್ಯಾಂಪಸ್‌ಗಳನ್ನು ಹೊಂದಿದ್ದು, 11,000 ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿದೆ.

-ಶಿಕ್ರಾನ್ ಶರ್ಫುದ್ದೀನ್ ಎಂ., ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ