ಭುವಿಯೇ ಸ್ವರ್ಗ
ಕವನ
ಬೆಳಗು ಮೂಡಲು ಬೆಳಕು ಆಗಲು
ಇಳೆಗೆ ಸ್ವರ್ಗ ಕಳೆ ಬರುವುದು... Iಪl
ಬಾನಲಿ ರವಿ ಮೂಡುತಿರಲು
ಭುವಿಯಲಿ ಬೆಳ್ಳಿ ಬೆಳಕಾಗಲು
ಲತೆಯಲಿ ಹೂವು ಅರಳುವುದು
ಹೂವು ಪರಿಮಳವ ಬೀರುತಿರಲು
ದುಂಬಿಯ ಪ್ರೀತಿಯಲಿ ಸೆಳೆಯಲು
ನೇಸರು ಪ್ರೇಮದೂಟ ಸವಿಯುವುದು
ನಸುಕಿನಲಿ ಬೆಳಗಾಗುತಿರಲು
ಹಕ್ಕಿಗಳ ಗಾನಸುಧೆ ನಡೆಯಲು
ನೇಸರ ಕಣಕಣದಲು ನಲಿವಾಗುವುದು
ಮುಂಜಾನೆ ಮಂಜು ಮೂಡಲು
ಹಿಮದ ರಾಶಿ ಎಲ್ಲೆಡೆ ಚಿಮ್ಮಲು
ಇಬ್ಬನಿಯು ಮುತ್ತಿನಹನಿಯಾಗುವುದು
ಗಿರಿಶಿಖರವು ಮಂಜು ಮೇಯಲು
ತಂಪಲಿ ಹಸಿರು ವನ ನಲಿಯಲು
ಎಲ್ಲರ ಹೃದಯ ತುಂಬಿ ಬರುವುದು
ಹೊತ್ತು ಮೂಡುತಾ ಬೆಳಕಾಗಲು
ರವಿ ಹೊಂಗಿರಣ ಎಲ್ಲೆಡೆ ಚೆಲ್ಲಲು
ಧರೆಯು ಸ್ವರ್ಗಕಳೆ ತುಂಬಿಕೊಳುವುದು
-ಬಂದ್ರಳ್ಳಿ ಚಂದ್ರು
ಚಿತ್ರ ಕೃಪೆ: ಇಂಟರ್ನೆಟ್ ತಾಣ
ಚಿತ್ರ್
- Log in to post comments