ಮಕ್ಕಳಿಗೆ ರಜೆಯ ಓದು (ಭಾಗ ೪) - ಗಲಿವರನ ಯಾತ್ರೆಗಳು

ಗಲಿವರನ ಯಾತ್ರೆಗಳು (Gulliver’s Travels)

ಜಗತ್ತಿನಾದ್ಯಂತ ಮಕ್ಕಳ ಮನಗೆದ್ದ ಕಥಾ ಪುಸ್ತಕಗಳಲ್ಲಿ ಗಲಿವರನ ಯಾತ್ರೆಗಳು ಸಹಾ ಒಂದು. ಲೆಮ್ಯೂಲ್ ಗಲಿವರ್ ಎನ್ನುವ ಪಾತ್ರವನ್ನು ಸೃಷ್ಟಿಸಿದ್ದು ಜೋನಾಥನ್ ಸ್ವಿಫ್ಟ್ ಎಂಬಾತ. ಈತ ೧೭೨೬ರಲ್ಲಿ ಗಲಿವರನ ಯಾತ್ರೆಗಳು ಎಂಬ ಕಥೆಯನ್ನು ಬರೆದು ಖ್ಯಾತನಾದ. ಹಡಗಿನಲ್ಲಿ ಸರ್ಜನ್ ಆಗಿದ್ದ ಗಲಿವರ ಪ್ರಯಾಣ ಮಾಡುತ್ತಾ ಕಂಡುಕೊಂಡ ಅನುಭವಗಳ ಸಾರವೇ ಈ ಪುಸ್ತಕದ ಕಥಾ ವಸ್ತು. ಗಲಿವರನ ಯಾತ್ರೆಗಳಲ್ಲಿ ಆತ ಅನೇಕ ದ್ವೀಪ, ಕಾಡುಗಳಲ್ಲಿ ಸುತ್ತಾಡಿದ. ಅವನ ಕೈ ಬೆರಳಿನ ಗಾತ್ರದ ‘ಲಿಲಿಪುಟ್’ ಗಳನ್ನೂ, ಅವನಿಗಿಂತ ಹತ್ತು ಪಟ್ಟು ಎತ್ತರದ ದೈತ್ಯರನ್ನೂ ಕಂಡ.

ಒಮ್ಮೆ ಗಲಿವರ ಪ್ರಯಾಣ ಮಾಡುತ್ತಿರುವಾಗ ಆತನ ಹಡಗು ಅಪಘಾತಕ್ಕೀಡಾಗಿ ಆತ ನೀರುಪಾಲಾಗುತ್ತಾನೆ. ಸಮುದ್ರದಲ್ಲಿ ಈಜಾಡಿ ಸೋತ ಗಲಿವರ ಪ್ರಜ್ಞೆ ತಪ್ಪಿದಾಗ ಅಲೆಗಳು ಆತನನ್ನು ಒಂದು ವಿಚಿತ್ರ ದ್ವೀಪಕ್ಕೆ ಕರೆತರುತ್ತವೆ. ಆತ ಕಣ್ಣು ಬಿಟ್ಟಾಗ ಆತನ ದೇಹವನ್ನು ಸಣ್ಣದಾದ ನೂಲಿನಿಂದ ಕಟ್ಟಿಹಾಕಲಾಗಿತ್ತು. ಆತನ ಅಂಗೈ ಎತ್ತರದ ಪುಟ್ಟ ಪುಟ್ಟ ವ್ಯಕ್ತಿಗಳು ದೇಹದ ಮೇಲೆಲ್ಲಾ ಓಡಾಡುತ್ತಿದ್ದರು. ಅವರೆಲ್ಲಾ ತಮ್ಮದೇ ಆದ ವಿಚಿತ್ರ ಧ್ವನಿಯಲ್ಲಿ ಗಲಿವರನಿಗೆ ಪರಿಚಯವಿರದ ಭಾಷೆಯಲ್ಲಿ ಮಾತನಾಡಿಕೊಳ್ಳುತ್ತಿದ್ದರು. ಮುಂದೇನಾಯಿತು ಎಂದು ತಿಳಿಯಲು ನೀವು ಗಲಿವರನ ಯಾತ್ರೆಗಳು ಪುಸ್ತಕ ಓದಲೇ ಬೇಕು. ಈ ಪುಸ್ತಕ ಕನ್ನಡ ಭಾಷೆಗೂ ಅನುವಾದಗೊಂಡಿದೆ. 

***

ಅರೇಬಿಯನ್ ನೈಟ್ಸ್ (Arabians Night) 

ಅರೇಬಿಯನ್ ನೈಟ್ಸ್ ಅಥವಾ ಸಾವಿರದ ಒಂದು ಕಥೆಗಳು ಬಗ್ಗೆ ಈಗಾಗಲೇ ನಿಮಗೆ ತಿಳಿದೇ ಇದೆ. ಮಧ್ಯ ಪೂರ್ವ ರಾಷ್ಟ್ರಗಳ ಈ ಕತೆಯು ರಾಜ ಮತ್ತು ರಾಣಿಗೆ ಸಂಬಂಧಿಸಿದ್ದು. ತನ್ನ ಮೊದಲ ಪತ್ನಿ ಮಾಡಿದ ದ್ರೋಹವನ್ನು ಮರೆಯದ ಸುಲ್ತಾನ ಶಾಹರ್ಯಾರ್ ನಂತರದ ದಿನಗಳಲ್ಲಿ ಆತ ಮದುವೆಯಾಗುತ್ತಿದ್ದ ಯುವತಿಯರನ್ನು ಮೊದಲ ರಾತ್ರಿಯ ಬಳಿಕ ಕೊಲ್ಲುತ್ತಿದ್ದ. ಆದರೆ ಬುದ್ಧಿವಂತ ಯುವತಿಯಾದ ಶೆಹರ್ಜಾದೆ ಸುಲ್ತಾನನಿಗೆ ಮೊದಲ ರಾತ್ರಿಯಂದು ಒಂದು ಕಥೆಯನ್ನು ಹೇಳಲು ಪ್ರಾರಂಭಿಸುತ್ತಾಳೆ. ಆ ಕಥೆ ಸ್ವಾರಸ್ಯಕರವಾದ ಘಟ್ಟದಲ್ಲಿರುವಾಗ ಅದನ್ನು ನಿಲ್ಲಿಸಿ ಮಲಗಿ ಬಿಡುತ್ತಾಳೆ. ಕಥೆಯ ಮುಂದಿನ ಭಾಗ ಕೇಳುವ ಉದ್ದೇಶದಿಂದ ಸುಲ್ತಾನ ಆಕೆಯ ಸಾವನ್ನು ಮುಂದೆ ಹಾಕುತ್ತಾನೆ. ಹೀಗೆ ಪ್ರತೀ ದಿನ ಕಥೆಯನ್ನು ಹೇಳುತ್ತಾ ಹೇಳುತ್ತಾ ರಾಜನ ಮನಃಪರಿವರ್ತನೆಯಾಗುವಂತೆ ನೋಡುತ್ತಾಳೆ. ಹೀಗೆ ಸಾವಿರದ ಒಂದು ದಿನಗಳು ಕಳೆದು ಹೋಗುತ್ತವೆ. 

ಈ ಕಥೆಗಳು ಒಬ್ಬರಿಂದ ಒಬ್ಬರಿಗೆ ಹರಡಿಕೊಂಡೇ ಪ್ರಸಿದ್ಧಿಯಾಗಿವೆ. ಇದೇ ಸರಣಿಯಲ್ಲಿ ಬರುವ ಅಲ್ಲಾದ್ದೀನ್ ಮತ್ತು ಆತನ ಮ್ಯಾಜಿಕ್ ದೀಪ ಹಾಗೂ ಆಲಿ ಬಾಬಾ ಮತ್ತು ನಲವತ್ತು ಕಳ್ಳರು ಈ ಕಥೆಗಳು ತುಂಬಾ ಪ್ರಸಿದ್ಧಿಯಾಗಿವೆ. ಆದರೆ ಈ ಕಥೆಗಳು ಮೂಲ ಸರಣಿಯಲ್ಲಿ ಇರಲಿಲ್ಲ. ಇದನ್ನು ಫ್ರೆಂಚ್ ಅನುವಾದಕರಾದ ಆಂಟೋನಿ ಗಲಾಂಡ್ ಅವರು ತಾವು ಅರೇಬಿಯನ್ ನೈಟ್ಸ್ ಕಥೆಗಳನ್ನು ಅನುವಾದ ಮಾಡುವಾಗ ಸೇರಿಸಿದ್ದು ಎಂದು ಹೇಳಲಾಗಿದೆ. ಈಗಲೂ ಅರೇಬಿಯನ್ ನೈಟ್ಸ್ ಅಥವಾ ಸಾವಿರದ ಒಂದು ರಾತ್ರಿಗಳು ಕಥೆಗಳನ್ನು ಓದಲು ಬಹಳಷ್ಟು ಮಂದಿ ಇಚ್ಛೆ ಪಡುತ್ತಾರೆ. ಕನ್ನಡ ಸಹಿತ ಜಗತ್ತಿನ ಅತ್ಯಂತ ಅಧಿಕ ಭಾಷೆಗೆ ಅನುವಾದಗೊಂಡ ಹಿರಿಮೆ ಅರೇಬಿಯನ್ ನೈಟ್ಸ್ ಕಥೆಗೆ ಇದೆ.

ಈ ಮೇಲಿನ ಕಥೆಗಳ ಜೊತೆಗೆ ೧೮೧೯ರಲ್ಲಿ ಪ್ರಕಟವಾದ ‘ರಿಪ್ ವ್ಯಾನ್ ವಿಂಕಲ್’ (Rip Van Winkle) ಹಾಗೂ ಚಾರ್ಲ್ಸ್ ಡಿಕನ್ಸ್ ೧೮೩೭-೩೯ರ ಸಮಯದಲ್ಲಿ ಬರೆದ ಒಲಿವೆರ್ ಟ್ವಿಸ್ಟ್ (Oliver Twist) ಕಥೆಯನ್ನು ಮಕ್ಕಳು ತಮ್ಮ ಬೇಸಿಗೆ ರಜೆಯ ಓದಿಗೆ ಬಳಸಿಕೊಳ್ಳಬಹುದು

(ಆಧಾರ)

ಚಿತ್ರ ಕೃಪೆ: ಅಂತರ್ಜಾಲ ತಾಣ