ಮಗು - ನಗು

ಮಗು - ನಗು
*********

ಮಗುವೆ ನೀನು ನಗುತಲಿರಲು
ಗೆಜ್ಜೆ ಘಲಿರು ಉಲಿಯುತಿರಲು
ಗಿಲಕಿ ಗಿಲಿರು ಗೀತವಿರಲು
ಬದುಕು ಬೆಳಕು ಬೆಳದಿಂಗಳು.

ಕಣ್ಣಿನಂದ ನೋಟ ಹೊಳಪು
ಕೆನ್ನೆ ನೋಡಿ ಎಷ್ಟು ನುಣುಪು!
ಕಾಲು ಬಡಿವ ಆಟ ಹುರುಪು
ಮುಗ್ಧ ಮನವು ಹಾಲು ಬಿಳುಪು.

ಅಂಬೆಗಾಲ ನಂದಲಾಲ
ಬೆಣ್ಣೆ ಮೆದ್ದ ತುಂಟಬಾಲ
ಕಣ್ಣಲೇಕೆ ನೀರ ಜಾಲ?
ಕೊಡಲೊಲ್ಲಳೆ ತಾಯಿ ಹಾಲ?

ಬೆಣ್ಣೆಗೆನ್ನೆ ಹಾಲುಗಲ್ಲ
ಜೇನುಹೊಳೆಯು ತುಟಿಯಲೆಲ್ಲ
ಎಂಥ ಸೊಗಸು ಕಾಣಿರೆಲ್ಲ
ಸುಳ್ಳು ಸುಳ್ಳೇ ಅಳುವ ಮಳ್ಳ.

ಬೊಚ್ಚುನಗು ಬಾಯಿತುಂಬ
ಹಚ್ಚಿದಂತೆ ದೀಪಸ್ತಂಭ.
ಚುಕ್ಕಿ ಚೆಲ್ಲಿ ಬಾನತುಂಬ
ಚಂದ್ರಮ ನಿನ್ನ ಪ್ರತಿಬಿಂಬ.

- ೦ -