ಮತ್ತೇರಿಸುವ ಚೆಲುವು

ಬಾನ ಚೆಂದಿರ ನೀನೆ ಸುಂದರ

ಅಂತರಂಗದ ಒಡೆಯನೆ

ಜಾಣ ಜಾಣರ ವೀರ ಶೂರನೆ

ಪಂದ್ಯ ಸೋಲದ ಚತುರನೆ||

ಸುತ್ತ ಹಳ್ಳಿಲಿ ಎಲ್ಲು ಕಾಣದ

ಚೆಲುವ ಚೆನ್ನಿಗ ರಾಯನೆ

ಮಾತು ಮಾತಲಿ ಮೋಡಿ ಮಾಡುವ

ಮೋಜುಗಾರನೆ ಇನಿಯನೆ||

ಶಿಸ್ತು ಬದ್ದದ ಚೆಂದ ಬದುಕನು

ನಡೆಸೊ ನನ್ನೆದೆ ಯೋಧನೆ

ಮಸ್ತು ಮಸ್ತಿನ ಮೈಯ ಕಟ್ಟಿನ

ಕುಸ್ತಿಯಾಡುವ ಧೀರನೆ

ಚಿತ್ತ ಚೋರನೆ ಕತ್ತು ತಿರಗಿಸಿ

ಇತ್ತ ಕೊಂಚವು ನೋಡಯ

ಮತ್ತು ಏರಿಸೊ ನಿನ್ನ ನಿಲುವನು

ಕಂಡು ಹಿಡಿದಿದೆ ಭ್ರಾಂತಿಯು||

ಪ್ರೇಮದರಮನೆ ಕದವು ತೆರೆದಿದೆ

ನಿನ್ನ ಬರುವಿಗೆ ಈ ದಿನ

ಶ್ಯಾಮನೊಲವನು ತೋರೆ ತನುವಿಗೆ

ಮಧುರ ಮೈತ್ರಿಯು ಈ ದಿನ||

-*ಶ್ರೀ ಈರಪ್ಪ ಬಿಜಲಿ*