ಮಧುರ ನೆನಪುಗಳು

ಅಪ್ಪನ ಹೆಗಲೇರಿ ಹಳ್ಳಿ ಮನೆಯಲ್ಲಿ

ಕೂಸುಮರಿ ಆಡಿದ ಸವಿನೆನಪು|

ತಾಯ ಸೆರಗಿನ  ಮಮತೆಯ ಮರೆಯಲ್ಲಿ

ವಾತ್ಸಲ್ಯದ ಜೋಗುಳ ಲಾಲಿ ಹಾಡಿನಲಿ||

ಗದ್ದೆ ಬಯಲು ತೋಟ ಹಳ್ಳದ ಹಾದಿಯಲಿ

ಗೆಳತಿಯರ ಜೊತೆಗೂಡಿ  ಶಾಲೆಗ್ಹೋದ ಪರಿಯಲ್ಲಿ|

ಮಗ್ಗಿ ಲೆಕ್ಕ ಪದ್ಯ ಬಾಯಿಪಾಠ ನೃತ್ಯದಲಿ

ಕಲಿಕೆಯ ಸಂಭ್ರಮದ ಚೆಲುಕೂಟದಲಿ||

ಸೀಬೆ ಬಾಳೆ ಸಿಹಿ ಮಾವು ಕಿತ್ತಳೆ

ಗಿಡಮರಕೆ ಹತ್ತಿಬಿದ್ದ ತರಚು ಗಾಯ|

ಕುಂಟಬಿಲ್ಲೆ ಕಲ್ಲು ನೋಂಡಿ ಟೊಪ್ಪಿಯಾಟ

ಮರೆಯುವುದೆಂತು ಮಧುರ ನೆನಪುಗಳ ಓಟ||

ಮಲ್ಲೆ ಮೊಗ್ಗನ್ನು ಮುಡಿಸಿದ ನಲ್ಲನ

ಸಪ್ತಪದಿ ಸಂಭ್ರಮದ ಓಕುಳಿಯಾಟ|

ಚಂದಿರನ ಹಾಲು ಬೆಳದಿಂಗಳ ತಂಪಿನಲಿ

ಬಿಗಿದಪ್ಪಿ ಪಿಸುಮಾತ ಉಸುರಿದ ಲಾಸ್ಯದಲಿ||

*ರತ್ನಾ ಕೆ.ಭಟ್, ತಲಂಜೇರಿ*