ಮಳೆ ಬಿಸಿಲಿನ ಇದು ನಾಟಕ
ಕವನ
ಕಡು ದುಗುಡದ ಬಿರು ಬೇಗೆಗೆ
ಕುದಿಯಿತು ಎದೆಗಡಲು!
ಸದ್ದಿಲ್ಲದೆ ಮೇಲೆದ್ದಿತು
ನಿಟ್ಟುಸಿರಿನ ಮುಗಿಲು
ಹನಿ ಗೂಡಿತು ಮಳೆ ಮೂಡಿತು
ಹೊಮ್ಮಿತು ಜಲಧಾರೆ!
ಬಾಳೊಡಲಲಿ ಪುಟಿದುಕ್ಕಿತು
ಕಂಬನಿ ತುಂಬು ನೆರೆ
೨
ಮುಗಿಲಳಿಯಿತು ಬಾನ್ ತಿಳಿಯಿತು
ಚಿಮ್ಮಿತು ಹೂ ಬಿಸಿಲು
ನೆರೆಯಿಳಿಯಿತು ಹೊಗರೇರಿತು
ಬಾಳಿನ ಹೆಬ್ಬಯಲು!
ಎಲೆ ಎಲೆಯಲಿ ನೀರುದುರಿತು
ನಳನಳಿಸಿತು ಬನವು
ಒಳ ಜೀವದ ಹದ ಕುದುರಿತು
ಥಳಥಳಿಸಿತು ಮನವು!
೩
ಮತ್ತಲ್ಲಿಯೆ ನಗೆ ನಲ್ಮೆಯ
ಕಾಮನ ಬಿಲ್ಲರಳಿ
ನಲಿನಲಿವುದು ನವರಂಗಿನ
ರಸದೋಕುಳಿ ಚೆಲ್ಲಿ!
ಇದು ಬದುಕಿನ ಮಳೆ ಬಿಸಿಲಿನ
ನಾಟಕ ಬಗೆಯೊಳಗೆ
ನೋಡುತ್ತಿರೆ ಒಳಗಣ್ಣಿಗೆ
ಮೌನದ ಬಯಲೊಳಗೆ!
(ಹೊಗರೇರಿತು =ಕಂಗೊಳಿಸಿತು
ಬಗೆ=ಮನಸ್ಸು)
ಚಿತ್ರ ಕೃಪೆ: ಅಂತರ್ಜಾಲ ತಾಣ
ಚಿತ್ರ್
