ಮಾತಿನ ಮಾಧುರ್ಯ

ಲಯವುಂಟು ಚಾರಿತ್ರ್ಯವುಂಟು

ಗರ್ವವುಂಟು ಮಾಧುರ್ಯವುಂಟು

ಮಹತ್ವವುಂಟು ಮಾತಿಗೆ

ಎತ್ತಿಂದೆತ್ತಣ ಸಂಬಂಧದ ನಂಟು

ಬೆಸೆಯುವ ಸಾಧನವಯ್ಯ;

ಚಿತ್ತದೊಳಗಣ ಚಿಂತನಾಗುಟ್ಟು

ಮೆಲುಕು ಹಾಕುವ ಅಸ್ತ್ರವಯ್ಯ

ಮನಗಳ ಚಿಂತನಾಲಹರಿಗೆ

ಉತ್ತುಂಗದ ಏಣಿಯಯ್ಯ ;

ಮಾತು ಆಡಿದರೆ ಹೋಯಿತು

ಮುತ್ತು ಒಡೆದರೆ ಹೋಯಿತು

ಎಂದು ಅರಿತವರು ಸೊಲ್ಲಿದರಯ್ಯ ;

ಹಗೆಗೆ ಬಗೆಗೆ ನುಡಿಗಳೇ

ಸರಪಳಿ ಸೇತುವೆಯಯ್ಯ

ಮೂಳೆ ಇಲ್ಲದ ನಾಲಿಗೆಯ

ನುಡಿಗಳ ಮೇಲೆ ಅರಿವಿರಲಯ್ಯ ;

ಮನದ ಮಾತನ್ನು ಗಂಟಲಲ್ಲಿ

ಉದ್ಗರಿಸಿ ಭಾರ ತಣಿಸುವುದಯ್ಯ

ನೊಂದ ಮನಗಳಿಗೆ ಸಾಂತ್ವನದ

ಮಾತುಗಳೇ ಚಂದನದ ತೇರಯ್ಯ ;

ಅಸಂಖ್ಯಾ ಜನದೊಳಗೆ

ಎಣಿಸಲಾಗದ ಭಾಷೆಯುಂಟಯ್ಯ

ಹುದುಗಿರುವ ವಿಷಯಗಳು

ಚರ್ಚೆಯೊಳಗಣ ಹೊರಬರುವುದಯ್ಯ ;

ಸೃಷ್ಟಿಯೊಳಗೆ ಮಾತಿಲ್ಲದೆ

ಮೌನಿಯಾದವನ ಹೃದಯ ಭಾರವಯ್ಯ

ನಗುವನು ಚಿಮ್ಮಿಸುವ ಓಷ್ಟಕ್ಕೆ

ನುಡಿಯಿಲ್ಲದಿದ್ದರೆ ಕಳೆಯಿಲ್ಲವಯ್ಯ!!

- ಸಹನ. ಆರ್. ಎಂ, ಕೆ. ಆರ್. ಪೇಟೆ

ಚಿತ್ರ ಕೃಪೆ: ಇಂಟರ್ನೆಟ್ ತಾಣ