ಮಾಮೂಲು ಮಹಾತ್ಮೆಯಿಂದ ಮೂರು ರೂಪ ತೆಳೆದ ಫೈಲು – ಧಟ್ಸ್, ಇಂಡಿಯಾ!

ಒಬ್ಬ ದೊಡ್ಡ ಉದ್ದಿಮೆದಾರನ ಫೈಲೊಂದು ಬಹಳ ದಿನಗಳಿಂದ ಸರ್ಕಾರಿ ಆಫೀಸಿನಲ್ಲಿ ಕೊಳೆಯುತ್ತಾ ಬಿದ್ದಿತ್ತು. ಆ ಉದ್ದಿಮೆದಾರ ತನ್ನ ಚೇಲಾನನ್ನು ಕಳುಹಿಸಿ ವಿಷಯವೇನೆಂದು ತಿಳಿದುಕೊಂಡು ಬರಲು ಹೇಳಿದ. ಅಲ್ಲಿ ಹೋಗಿ ಬಂದ ಅವನ ಚೇಲಾ ಅಲ್ಲಿ ಕೈಬೆಚ್ಚಗೆ ಮಾಡಿದರೆ ಕೆಲಸ ಆಗುವುದೆಂದೂ ಹೇಳಿದ, ಅದಕ್ಕೆ ಸಮ್ಮತಿಸಿದ ಆ ಉದ್ಯಮಪತಿ ಆಗಲಿ ಕೆಲಸ ಆದ ಮೇಲೆ ಅವರ ಮಾಮೂಲಿಯನ್ನು ಮುಟ್ಟಿಸೋಣವೆಂದು ಹೇಳಿದ. ಇದನ್ನು ಸಂಭಂದಪಟ್ಟ ಗುಮಾಸ್ತನಿಗೆ ಹೇಳಿದ್ದೇ ತಡ ಆ ಉದ್ಯಮಪತಿಯ ಕಡತ ಚಕಚಕನೆ ಓಡಾಡಿ ಸಂಭಂದಪಟ್ಟ ಅಧಿಕಾರಗಳೆಲ್ಲಾ ಅದಕ್ಕೆ ರುಜುಹಾಕಿ ಅಂತಿಮ ಆಣತಿಗಾಗಿ ಮುಖ್ಯಮಂತ್ರಿಗಳ ಟೇಬಲ್ ಮೇಲೆ ಕುಳಿತುಕೊಂಡಿತು. ಈ ಉದ್ದಿಮೆದಾರ ಅದಕ್ಕೆ ಸೂಕ್ತ ಸಂಭಾವನೆಯನ್ನು ಕೊಡುವ ವಿಷಯ ತಿಳಿದ ಮು.ಮ.ಯವರು ಅದಕ್ಕೆ SANCTIONED ಎಂದು ಆಮೋದ ಮುದ್ರೆಯನ್ನೊತ್ತಿದರು. ಈ ವಿಷಯ ತಿಳಿದ ಉದ್ಯಮಪತಿ ಇನ್ನೇನು ಕೆಲಸವಾಯಿತಲ್ಲ ಹಾಗಾಗಿ ರೊಕ್ಕ ಕೊಡುವ ಕೆಲಸವೇನಿದೆ ಎಂದು ಆ ಸಂಭಂದಪಟ್ಟ ಗುಮಾಸ್ತನ ಮುಂದೆ ನಕ್ಕು ಹೇಳಿದ. ಇವನು ಕೆಲಸ ಆದಮೇಲೆ ದುಡ್ಡು ಕೊಡದೆ ಕೈ ಎತ್ತುತ್ತಾನೆಂದು ಅರ್ಥಮಾಡಿಕೊಂಡ ಈ ಗುಮಾಸ್ತ ಅದನ್ನು ತನ್ನ ಮೇಲಧಿಕಾರಿಗೆ ತಿಳಿಸಿದ. ಕೂಡಲೇ ಆ ಮೇಲಧಿಕಾರಿ ಕಡತದ ಮೇಲಿದ್ದ SANCTIONED ಟಿಪ್ಪಣಿಯನ್ನು NOT SANCTIONED ಎಂದು ಮಾರ್ಪಡಿಸಿದ. ಇದನ್ನು ಆ ಗುಮಾಸ್ತನ ಮೂಲಕ ತಿಳಿದುಕೊಂಡ ಉದ್ಯಮಪತಿ ಬಾಯಿಮುಚ್ಚಿಕೊಂಡು ನಿಗಧಿಯಾಗಿದ್ದ ಹಣವನ್ನು ತಂದು ಕೊಟ್ಟ. ಇದನ್ನು ಪುನಃ ತನ್ನ ಮೇಲಧಿಕಾರಿಯ ಬಳಿಗೆ ಒಯ್ದ ಗುಮಾಸ್ತ, ಆಗ ಆ ಮೇಲಧಿಕಾರಿ ಅದೇ ಕಡತವನ್ನು ಈ ರೀತಿ ತಿದ್ದಿದ, NOTE: SANCTIONED. ಹೀಗೆ ಒಂದೇ ಕಡತ ಲಕ್ಷ್ಮೀಕಟಾಕ್ಷದಿಂದಾಗಿ ಮೂರು ರೂಪಗಳನ್ನು ತೆಳೆಯಿತು.
(ಇದು ನೀಲಂ ಸಂಜೀವ ರೆಡ್ಡಿಯವರು ಆಂಧ್ರ ಪ್ರದೇಶದ ಮುಖ್ಯಮಂತ್ರಿಯಾಗಿದ್ದಾಗ ನಡೆದ ಘಟನೆ ಎಂದು ಕೆಲವರು ಹೇಳುತ್ತಾರೆ.)