ಮೋಹಕ ಮುಕ್ತಕಗಳು

ಸವಿಯಿರದ ನೆಲದೊಳಗೆ ದಿನದಿನವು ಕಹಿಯಿರಲು

ಕವಿಯೆನಿಸಿ ಬಾಳುವುದು ಗೆಲುವದುವು ನೋಡು|

ಕವನಗಳ ಬರೆಯುತಲೆ ವೇದನೆಯ ಮರೆಯುತಲಿ

ಭವದೊಳಗೆ ಬದುಕುವೆಯೊ -- ಛಲವಾದಿಯೆ||

***

ಮರೆತಿರುವ ಒಲುಮೆಯನು ಮರಳಿ ಪಡೆಯಲು ಬಹುದೆ

ಮರಳಿನಲಿ ಚಿತ್ರವನು ಬಿಡಿಸಿರುವ ರೀತಿ|

ಮರುಳನಾಗುತ ತಿರುಗೆ ವಿದ್ಯೆಯದು ಸಿದ್ಧಿಪುದೆ

ಕರಮುಗಿಯು ದೇವನಿಗೆ -- ಛಲವಾದಿಯೆ||

***

ಹಿರಿಯರನು ಗೌರವಿಸು ಜೀವನದಿ ಬೆಳಗುವೆ

ಕಿರಿಯರಿಗೆ ನೀತಿಯನು ಬೋಧಿಸುತ ಬದುಕು|

ಹರಿಹರನ ಭಜಿಸುತಲಿ ಬಾಳಿನಲಿ ಸಾಗಿದರೆ

ಪರಿಪೂರ್ಣ ನೀನಪ್ಪೆ -- ಛಲವಾದಿಯೆ||

***

ಸಾಲವದು ಶೂಲವೇ ತೀರಿಸುವ ಕೈಗಳಿರೆ

ಮೂಲವದು ದೊರಕುತಲೆ ಕೊಡುವನೈ ಮನುಜ|

ಬಾಲವಿರದಿಹ ಜನರು ದೂಷಣೆಯ ಮಾಡಿದರೆ

ಕಾಲಕಸವದುಯೆನ್ನು -- ಛಲವಾದಿಯೆ||

***

ಒಂಟಿತನ ಕಾಡುವುದು ಒಬ್ಬಂಟಿಯಾದರೇ

ಗಂಟು ಕಟ್ಟಿದರದರ ಕದಿಯುವರು ನೋಡು|

ನಂಟರಿಷ್ಟರುಯಿಲ್ಲ ದಿನದಿನವು ಅಲೆದಾಟ

ಕಂಟಕವು ಭವದೊಳಗೆ -- ಛಲವಾದಿಯೆ||

-ಹಾ ಮ ಸತೀಶ ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ