ಮ್ಯಾಂವ್ ಮ್ಯಾಂವ ಬೆಕ್ಕು (ಶಿಶುಗೀತೆ)

ಮ್ಯಾಂವ್ ಮ್ಯಾಂವ್ ಎನ್ನುತ ಬೆಕ್ಕು

ಕಿಟಕಿ ಬದಿಯಲಿ ಕುಳಿತಿತ್ತು||ಪ||

ಅಮ್ಮನು ಆರಿಸಿ ಇಟ್ಟಿಹ ಹಾಲು

ಮೆಲ್ಲಗೆ ಕುಡಿಯಲು ಕಾದಿತ್ತು

ಅಡುಗೆ ಮನೆಯನು ಸೇರುವ ತವಕ

ಬೆಕ್ಕಿನ ಮನದಲಿ ಬಂದಿತ್ತು||೧||

ಕಣ್ಣನು ಮುಚ್ಚುತ ಹಾಲನು ಕುಡಿದು

ಗರ್ವದಿ ಮೀಸೆಯ ತಿರುವಿತ್ತು

ಕರಿಬಿಳಿ ಬಣ್ಣದ ಹೊಳೆಯುವ ಕಣ್ಣು

ಮಿಂಚುತ ರೋಷದಿ ಬರುತಿತ್ತು||೨||

ಕಿಟ್ಟನು ಕೋಲಲಿ ಜೋರಲಿ ಬಡಿಯಲು

ಮ್ಯಾಂವ್ ಮ್ಯಾಂವ್ ಅಂತಿತ್ತು

ಮರುದಿನ ಕಿಟಕಿಯ ಬಳಿಯಲಿ ನಿಲಲು

ಬೆಕ್ಕಿನ ಮೊರೆಯು ಬಾಡಿತ್ತು||೩||

ಮುಖವದು ಹೊರಳಿಸಿ ಬಾಲವ ಆಡಿಸಿ

ಹಾಲನು ಕುಡಿಯದೆ ನಡೆದಿತ್ತು

ಬೆಕ್ಕಿನ ಮೇಲಿನ ಕವಿತೆಯ ಕೇಳಿ

ತುಟಿಯಲಿ ನಗುವದು ತೇಲಿತ್ತು||೪||

 -ಶಂಕರಾನಂದ ಹೆಬ್ಬಾಳ