ವಿನಾಶ ತರುವ ಪ್ಲಾಸ್ಟಿಕ್

ಪ್ಲಾಸ್ಟಿಕ್ ಒಂದು ಸಾವಿಲ್ಲದ ವಸ್ತು. ಇದು ಹುಟ್ಟುವಾಗ ಮಾಲಿನ್ಯಗಳಿಂದಲೇ ಹುಟ್ಟಿ, ಇರುವವರೆಗೂ ಮಾಲಿನ್ಯಗಳನ್ನು ಪರಿಸರಕ್ಕೆ ಬಿಡುಗಡೆ ಮಾಡುತ್ತಲೇ ಇರುತ್ತದೆ. ಪ್ಲಾಸ್ಟಿಕ್ ಅತ್ಯಂತ ವಿಷಕಾರಿ ಮಾಲಿನ್ಯಗಳನ್ನು ಬಿಡುಗಡೆ ಮಾಡುತ್ತದೆ. ಇದು ಕೊಳೆಯದ ವಸ್ತುವಾಗಿರುವುದರಿಂದ ಭೂಮಿಯಲ್ಲೂ ಹಾಗೆಯೇ ಉಳಿದುಬಿಡುತ್ತದೆ. ಪ್ಲಾಸ್ಟಿಕ್ ಭೂ ಮಾಲಿನ್ಯ, ವಾಯು ಮಾಲಿನ್ಯ ಮತ್ತು ಜಲ ಮಾಲಿನ್ಯಗಳನ್ನು ಉಂಟು ಮಾಡಿ ಅನೇಕ ಸಮಸ್ಯೆಗಳನ್ನು ತಂದೊಡ್ಡುತ್ತದೆ. ಸಾಮಾನ್ಯವಾಗಿ ಭೂಮಿಯಲ್ಲಿ ಹುಟ್ಟಿದ/ ತಯಾರಿಸಿದ ಎಲ್ಲಾ ವಸ್ತುಗಳೂ ಒಂದಲ್ಲಾ ಒಂದು ರೀತಿಯಲ್ಲಿ ಅಂತ್ಯ ಕಾಣುತ್ತದೆ. ಆದರೆ ಈ ಪ್ಲಾಸ್ಟಿಕ್ ಗೆ ಮಾತ್ರ ಸಾವಿಲ್ಲ !

ಪ್ಲಾಸ್ಟಿಕ್ ಏಕಿಷ್ಟು ಜನಪ್ರಿಯ: ಇದು ಅತೀ ಕಡಿಮೆ ಬೆಲೆಗೆ ದೊರಕುತ್ತದೆ. ಹೆಚ್ಚು ಬಲಯುತ ಮತ್ತು ಹೆಚ್ಚು ಬಾಳಿಕೆ ಬರುತ್ತದೆ. ಇದರ ಬಳಕೆ ಸುಲಭ. ಜತೆಗೆ ಅತ್ಯಂತ ಹಗುರ. ವಿವಿಧ ವಿನ್ಯಾಸ ಹಾಗೂ ಆಕರ್ಷಕ ಬಣ್ಣಗಳಲ್ಲಿ ದೊರೆಯುವ ಪ್ಲಾಸ್ಟಿಕ್ ನೀರು ಮತ್ತು ಗಾಳಿಯ ಹೊಡೆತಕ್ಕೂ ಹಾಳಾಗುವುದಿಲ್ಲ. ಪ್ಲಾಸ್ಟಿಕ್ ನ ಜನಪ್ರಿಯತೆಗೆ ಇವೇ ಮುಖ್ಯವಾದ ಕಾರಣಗಳು.

ಪ್ಲಾಸ್ಟಿಕ್ ನಲ್ಲಿರುವ ವಿಷಕಾರಿ ಮಾಲಿನ್ಯಗಳು: ಪ್ಲಾಸ್ಟಿಕ್ ನಲ್ಲಿರುವ ಮೂಲವಸ್ತುಗಳಾದ ಬೆಂಝೀನ್ ಹಾಗೂ ವಿನೈಲ್ ಕ್ಲೋರೈಡ್ ಗಳು ಮನುಷ್ಯರಿಗೆ ಕ್ಯಾನ್ಸರ್ ರೋಗ ತರಬಲ್ಲವು. ಇದರ ತಯಾರಿಕೆಯಲ್ಲಿ ಬಿಡುಗಡೆಯಾಗುವ ರಾಸಾಯನಿಕಗಳಾದ ಇಥಲೀನ್ ಆಕ್ಸೈಡ್, ಬೆಂಝೀನ್ ಮತ್ತು ಕ್ಸೈಲಿನ್ ಗಳು ನರವ್ಯೂಹದ ಮೇಲೆ ದುಷ್ಪರಿಣಾಮಗಳನ್ನು ಬೀರುವುದಲ್ಲದೆ, ದೇಹದ ರಕ್ಷಣಾ ವ್ಯವಸ್ಥೆಯನ್ನೇ ನಾಶ ಮಾಡಿಬಿಡುತ್ತದೆ. ಇವು ಗಾಳಿಯಲ್ಲಿ ಬಿಡುಗಡೆ ಮಾಡುವ ವಿಷಕಾರಿಗಳಿಂದ ಶ್ವಾಸಕೋಶದ ಕ್ಯಾನ್ಸರ್ ಕೂಡ ಬರಬಹುದು. ನೀರಿನಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯ ವಸ್ತುವಾಗಿ ಉಳಿಯುವುದರಿಂದ ಇವು ಬಿಡುಗಡೆ ಮಾಡುವ ಕ್ಯಾಡ್ಮಿಯಂ ಮತ್ತು ಸೀಸದಂತಹ ಅಪಾಯಕಾರಿ ಮಾಲಿನ್ಯಗಳು ನೀರಿಗೆ ಸೇರುತ್ತವೆ. ಈ ರಾಸಾಯನಿಕಗಳನ್ನು ಸೇವಿಸುವುದರಿಂದ ರತ್ಕ ವಿಷಮಯಗೊಂಡು ಮೂತ್ರಪಿಂಡಗಳಿಗೆ ಹಾನಿಯಾಗುತ್ತದೆ.

ಪುನರ್ಬಳಕೆ: ಒಮ್ಮೆ ಬಳಸಿದ ವಸ್ತುಗಳು ಹಾಳಾದರೆ, ಅವನ್ನು ಕರಗಿಸಿ ಹೊಸ ವಸ್ತುಗಳನ್ನು ಉತ್ಪಾದಿಸುವುದೇ ಪುನರ್ ಬಳಕೆ. ಪ್ಲಾಸ್ಟಿಕ್ ಅನ್ನು ಪುನರ್ಬಳಕೆ ಮಾಡಬಹುದಾದರೂ ಅದರಿಂದ ಯಾವುದೇ ರೀತಿಯ ಮಾಲಿನ್ಯ ನಿಯಂತ್ರಣ ಸಾಧ್ಯವಿಲ್ಲ. ಪುನರ್ಬಳಕೆಯಿಂದ ಇನ್ನೂ ಹೆಚ್ಚು ಹೆಚ್ಚು ಪ್ಲಾಸ್ಟಿಕ್ ನ ಬಳಕೆಯಾಗುತ್ತದೆ. ಪುನರ್ಬಳಕೆಯ ಪ್ಲಾಸ್ಟಿಕ್ ಕಡಿಮೆ ಬೆಲೆಗೆ ಸಿಗುವುದರಿಂದ ಇವುಗಳ ಬಳಕೆ ಹೆಚ್ಚುತ್ತದೆ. ಆದರೆ ಈ ಪ್ಲಾಸ್ಟಿಕ್ ನ ಗುಣಮಟ್ಟ ಕಳಪೆಯಾಗಿರುತ್ತದೆ. ಪುನರ್ಬಳಕೆಯಿಂದ ಹೆಚ್ಚೆಚ್ಚು ಪ್ಲಾಸ್ಟಿಕ್ ನ ಬಳಕೆಯಾಗಿ ಮಾಲಿನ್ಯ ಇನ್ನೂ ಹೆಚ್ಚುವುದಲ್ಲದೆ ಹಣದ ಪೋಲೂ ಆಗುತ್ತದೆ. ಆದ್ದರಿಂದ ಈ ವಿದಾನದ ವಿಲೇವಾರಿ ಸರಿಯಲ್ಲ.

ಪ್ಲಾಸ್ಟಿಕನ್ನು ಸುಡುವುದು: ಪ್ಲಾಸ್ಟಿಕ್ ಅನ್ನು ಸುಡುವುದರಿಂದ ವಿಲೇವಾರಿ ಮಾಡಬಹುದು ಎಂದು ನೀವಂದುಕೊಂಡರೆ ನೀವು ಇನ್ನೂ ಹೆಚ್ಚು ಅಪಾಯಕ್ಕೆ ಸಿಲುಕುತ್ತೀರಿ. ಜೀವಂತ ಪ್ಲಾಸ್ಟಿಕ್ ನಿಧಾನವಾಗಿ ಮಾಲಿನ್ಯಗಳನ್ನು ಬಿಡುಗಡೆ ಮಾಡಿದರೆ, ಸುಡುತ್ತಿರುವ ಪ್ಲಾಸ್ಟಿಕ್ ಕ್ಷಣಮಾತ್ರದಲ್ಲಿ ಮಾಲಿನ್ಯಗಳನ್ನು ವಾತಾವರಣಕ್ಕೆ ಬಿಡುಗಡೆ ಮಾಡಿ ಬಿಡುತ್ತದೆ. ಇವು ಬಿಡುಗಡೆ ಮಾಡುವ ವಿಷಕಾರಿ ಅನಿಲಗಳಿಂದ ಶ್ವಾಸಕೋಶದ ಕ್ಯಾನ್ಸರ್, ಉಸಿರಾಟದ ತೊಂದರೆ ಮತ್ತು ಬಗೆಬಗೆಯ ಅಲರ್ಜಿಗಳನ್ನು ಎದುರಿಸಬೇಕಾಗುತ್ತದೆ.

ಭೂಮಿಯಲ್ಲಿ ಹೂಳುವುದು: ಕೆಲವರು ಪ್ಲಾಸ್ಟಿಕ್ ಅನ್ನು ಭೂಮಿಯಲ್ಲಿ ಹೂಳಿದರೆ ಮಾಲಿನ್ಯ ತಪ್ಪಿಸಬಹುದು ಎಂದು ಭಾವಿಸಿದ್ದಾರೆ. ಇದು ತುಂಬಾ ತಪ್ಪು. ಇದು ಭೂಮಾಲಿನ್ಯ ಹಾಗೂ ನೀರಿನ ಮಾಲಿನ್ಯಗಳನ್ನು ಉಂಟುಮಾಡಿ ಅಪಾಯವನ್ನು ತರಬಲ್ಲದು. ಇಂದು ಪ್ಲಾಸ್ಟಿಕ್ ನ ಸಾಮಾನ್ಯ ವಿಲೇವಾರಿ ಎಂದರೆ ಎಲ್ಲೆ ಬೇಕೆಂದರಲ್ಲಿ ಎಸೆಯುವುದು, ಹೀಗಾಗಿ ವಾಸಿಸುವ ಸ್ಥಳಗಳೂ ಪ್ಲಾಸ್ಟಿಕ್ ನಿಂದ ತುಂಬಿಹೋಗಿದೆ. ರಸ್ತೆ-ಚರಂಡಿಗಳಿಗೂ ಇದೇ ದುರ್ಗತಿ ಬಂದಿದೆ. ಭೂಮಿಯಲ್ಲಿ ಉಳಿದ ಪ್ಲಾಸ್ಟಿಕ್ ಶಾಶ್ವತ ಮಾಲಿನ್ಯವಾಗಿ ಉಳಿದು ಬಿಡುತ್ತದೆ. ಈ ಪ್ಲಾಸ್ಟಿಕ್ ಭೂಮಿಯಲ್ಲಿ ಕ್ಯಾಡ್ಮಿಯಂ, ಸೀಸದಂತಹ ವಿಷಕಾರಿಗಳನ್ನು ಭೂಮಿಗೆ ವರ್ಗಾಯಿಸುತ್ತದೆ. ಹರಿಯುವ ನೀರಿನಲ್ಲೂ ಈ ಮಾಲಿನ್ಯಗಳು ಸುಲಭವಾಗಿ ಸೇರಿ ನೀರು ಮಲಿನಗೊಳ್ಳುತ್ತದೆ. ಇಂಥ ನೀರನ್ನು ಕುಡಿದಾಗ ಕರುಳಿನ ಕ್ಯಾನ್ಸರ್ ನಂತಹ ಭಯಾನಕ ಕಾಯಿಲೆಗಳು ಬರಬಹುದು. 

ಪ್ಲಾಸ್ಟಿಕ್ ಇತರೆ ಸಮಸ್ಯೆಗಳು: ಭಾರತದಲ್ಲಿ ನಗರಸಭೆಗಳು ವಿಲೇವಾರಿ ಮಾಡುವ ಘನತ್ಯಾಜ್ಯಗಳಲ್ಲಿ ಶೇ. ೨೦ರಷ್ಟು ಪ್ಲಾಸ್ಟಿಕ್ ತ್ಯಾಜ್ಯ. ಇಂದು ಇಡೀ ಪ್ರಪಂಚದಲ್ಲಿ ಪ್ರತಿ ವರ್ಷಕ್ಕೆ ೧೦೦ ದಶಲಕ್ಷ ಟನ್ ಪ್ಲಾಸ್ಟಿಕ್ ಉತ್ಪಾದಿಸಲಾಗುತ್ತಿದೆ. ಭಾರತದಲ್ಲಿ ಪ್ರತಿಯೊಬ್ಬ ಮನುಷ್ಯ ಒಂದು ವರ್ಷಕ್ಕೆ ೩ ಕೆ ಜಿ ಯಷ್ಟು ಪ್ಲಾಸ್ಟಿಕ್ ಬಳಸುತ್ತಿದ್ದಾನೆ. ಇಂದು ನಗರ ಸಭೆಗಳಿಗೆ ಪ್ಲಾಸ್ಟಿಕ್ ತ್ಯಾಜ್ಯ ವಿಲೇವಾರಿ ತಲೆನೋವಿನ ಸಂಗತಿಯಾಗಿದೆ. ಹೀಗಾಗಿಯೇ ಇಂದು ಸಣ್ಣ ಸಣ್ಣ ಪೇಟೆ, ಪಟ್ಟಣ, ನಗರಗಳ ಸುತ್ತಮುತ್ತಲೆಲ್ಲ ಪ್ಲಾಸ್ಟಿಕ್ ಕಸದ ಬೆಟ್ಟವೇ ಸೃಷ್ಟಿಯಾಗಿದೆ. ದನಕರುಗಳು ಪ್ಲಾಸ್ಟಿಕ್ ನಲ್ಲಿ ಕಟ್ಟಿ ಎಸೆದ ಆಹಾರ ಪದಾರ್ಥಗಳನ್ನು ತಿನ್ನುವಾಗ ಪ್ಲಾಸ್ಟಿಕ್ ನೊಂದಿಗೇ ತಿಂದುಬಿಡುತ್ತವೆ. ಇದರಿಂದ ಅಮಾಯಕ ಪ್ರಾಣಿಗಳು ತೀವ್ರ ತೊಂದರೆಯನ್ನು ಅನುಭವಿಸುತ್ತವೆ. ಕೆಲವು ವರ್ಷಗಳ ಹಿಂದೆ ಉತ್ತರಪ್ರದೇಶದ ಹಳ್ಳಿಯೊಂದರಲ್ಲಿ ದನದ ಹೊಟ್ಟೆಯನ್ನು ಶಸ್ತ್ರಕ್ರಿಯೆ ಮಾಡಿ ೩೫ ಕಿಲೋಗ್ರಾಂ ಪ್ಲಾಸ್ಟಿಕ್ ಅನ್ನು ಹೊರತೆಗೆಯಲಾಯಿತು. ಈ ಸಂಗತಿ ಈಗ ಸರ್ವೇ ಸಾಮಾನ್ಯವಾಗುತ್ತಿದೆ.

ಪರಿಹಾರ ಏನು? : ಪ್ಲಾಸ್ಟಿಕ್ ತ್ಯಾಜ್ಯಗಳಿಂದ ಉಂಟಾಗುವ ಮಾಲಿನ್ಯವನ್ನು ತಡೆಯುವ ಒಂದೇ ಒಂದು ಉಪಾಯವೆಂದರೆ, ಪ್ಲಾಸ್ಟಿಕ್ ಬಳಕೆಯನ್ನು ನಿಲ್ಲಿಸುವುದು. ವಸ್ತುಗಳನ್ನು ಕೊಳ್ಳುವಾಗ ಬಟ್ಟೆಯ/ನಾರಿನ ಕೈಚೀಲಗಳನ್ನು ಬಳಸಿ. ನಿಮ್ಮ ಮಕ್ಕಳು, ಮೊಮ್ಮಕ್ಕಳು ನೆಮ್ಮದಿಯಿಂದ ಇರಬೇಕೆಂಬ ಕನಸು ನಿಮಗಿದ್ದರೆ ನೀವು ಪ್ಲಾಸ್ಟಿಕ್ ಗೆ ಗುಡ್ ಬೈ ಹೇಳಲೇಬೇಕು.

-ಕೆ. ನಟರಾಜ್, ಬೆಂಗಳೂರು  

ಚಿತ್ರ ಕೃಪೆ: ಇಂಟರ್ನೆಟ್ ತಾಣ