ವಿಮಾನದ ಸಂಚಾರ ನಿಯಂತ್ರಣ ಹೇಗೆ ನಡೆಯುತ್ತದೆ?

ವೇಗದ ಪ್ರಯಾಣಕ್ಕೆ ಹಾಗೂ ದೂರ ಪ್ರಯಾಣಕ್ಕೆ ವಿಮಾನಯಾನ ಬಹಳ ಉತ್ತಮ ವಿಧಾನ. ಬಹಳಷ್ಟು ಮಂದಿ ವಿಮಾನದಲ್ಲಿ ಪ್ರಯಾಣ ಮಾಡಿರುತ್ತೀರಿ. ಇನ್ನು ಕೆಲವರಿಗೆ ವಿಮಾನಯಾನ ಗಗನ ಕುಸುಮ ಎನಿಸಿಬಿಡುತ್ತದೆ. ಆದರೂ ಕೆಲವು ವಿಮಾನಯಾನ ಸಂಸ್ಥೆಗಳು ಅತೀ ಕಡಿಮೆ ದರದಲ್ಲಿ ಅಂದರೆ ಎಸಿ ಬಸ್ ಅಥವಾ ಎಸಿ ರೈಲಿನ ದರಕ್ಕೆ ಸಮನಾದ ವಿಮಾನ ಟಿಕೆಟ್ ಕೊಡುತ್ತಾರೆ. ನೂರಾರು ಬಾರಿ ವಿಮಾನದಲ್ಲಿ ಪ್ರಯಾಣ ಮಾಡಿದವರಿಗೂ ವಿಮಾನದ ಸಂಚಾರ ನಿಯಂತ್ರಣ ಹೇಗೆ ನಡೆಯುತ್ತದೆ ಎನ್ನುವ ಸಂಗತಿ ಗೊತ್ತಿರುವುದಿಲ್ಲ. ಈ ವಿಚಾರವನ್ನು ಪತ್ರಕರ್ತರಾದ ಶ್ರೀ ವಿಶ್ವೇಶ್ವರ ಭಟ್ ಅವರು ತಮ್ಮ ‘ವಿಶ್ವವಾಣಿ’ ಪತ್ರಿಕೆಯಲ್ಲಿ ಬಹಳ ಚುಟುಕಾಗಿ ಆದರೆ ಮಾಹಿತಿ ಪೂರ್ಣವಾಗಿ ಬರೆದು ಪ್ರಕಟಿಸಿದ್ದಾರೆ. ಅದರ ಪೂರ್ಣ ಪಾಠ ಇಲ್ಲಿದೆ. ಓದಿ… 

“ವಿಮಾನ ಪ್ರಯಾಣ ಮಾಡುವ ಅನೇಕರಿಗೆ ವಿಮಾನ ಸಂಚಾರ ನಿಯಂತ್ರಣ (Air Traffic Control- ATC) ಎಂಬ ವ್ಯವಸ್ಥೆಯಿದೆ ಎಂಬುದು ಗೊತ್ತಿರುವುದಿಲ್ಲ. ಯಾವ ವಿಮಾನವೂ ಸ್ವತಂತ್ರವಲ್ಲ, ಅದು ಎಟಿಸಿ ನಿಯಂತ್ರಣಕ್ಕೆ ಒಳಪಟ್ಟಿರುತ್ತದೆ. ಎಟಿಸಿ ಸೂಚನೆಯಿಲ್ಲದೇ ವಿಮಾನ ಒಂದಂಗುಲ ಕದಲುವುದಿಲ್ಲ, ಯಾವ ವಿಮಾನ ರನ್ ವೇಯಿಂದ ಹೊರಡಬೇಕು, ಯಾವುದು ಟೇಕಾಫ್ ಆಗಬೇಕು, ಯಾವ ಮಾರ್ಗದಲ್ಲಿ ಚಲಿಸಬೇಕು. ಎಷ್ಟು ಎತ್ತರದಲ್ಲಿ ಹಾರಬೇಕು. ವಿಮಾನವನ್ನು ಎಲ್ಲಿ ಪಾರ್ಕ್‌ ಮಾಡಬೇಕು... ಈ ಎಲ್ಲ ಸೂಚನೆಗಳನ್ನು ಪೈಲಟ್‌ಗೆ ನೀಡುವುದು ಎಟಿಸಿಯೇ. ಹಾಗಾದರೆ ವಿಮಾನ ನಿಲ್ದಾಣದಲ್ಲಿ ಎಟಿಸಿ ಹೇಗೆ ಕಾರ್ಯನಿರ್ವಹಿಸುತ್ತದೆ? ಏರ್ ಟ್ರಾಫಿಕ್ ಕಂಟ್ರೋಲ್ ವ್ಯವಸ್ಥೆಯು ವಿಮಾನಗಳ ಸುರಕ್ಷಿತ ಮತ್ತು ಸಮರ್ಥ ನಿರ್ವಹಣೆಯಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ. ಇದು ವಿಮಾನಗಳ ಟೇಕಾಫ್, ಲ್ಯಾಂಡಿಂಗ್ ಮತ್ತು ವಿಮಾನದಲ್ಲಿನ ಚಲನವಲನಗಳನ್ನು ನಿರ್ವಹಿಸುತ್ತದೆ ಎಂದು ಸ್ಥೂಲವಾಗಿ ಹೇಳಬಹುದು. ವಿಮಾನ ಹೊರಡಲು ಸನ್ನದ್ದವಾಗುತ್ತಿದ್ದಂತೆ, ಅದು ಎಟಿಸಿ ನಿಯಂತ್ರಣಕ್ಕೆ ಒಳಪಡುತ್ತದೆ. ಅಲ್ಲಿಂದ ಮುಂದೆ ಅದು ಟೇಕಾಫ್ ಆಗಿ, ಲ್ಯಾಂಡ್ ಆದ ಬಳಿಕ ಪಾರ್ಕಿಂಗ್ ಜಾಗದಲ್ಲಿ ನಿಲ್ಲುವ ತನಕ ಎಟಿಸಿ ನಿಯಂತ್ರಣದಲ್ಲಿರುತ್ತದೆ. ಎಟಿಸಿ ಕಂಟ್ರೋಲರ್‌ಗಳು ವಿಮಾನಗಳ ಸ್ಥಾನವನ್ನು ನಿಖರವಾಗಿ ತಿಳಿಯಲು ರೇಡಾರ್ ವ್ಯವಸ್ಥೆಯನ್ನು ಬಳಸುತ್ತವೆ. 

ರೇಡಾರ್ ಸಿಗ್ನಲ್‌ಗಳು ವಿಮಾನದಿಂದ ಪ್ರತಿಫಲಿಸುತ್ತವೆ ಮತ್ತು ಕಂಟ್ರೋಲ್ ಟವರ್‌ನಲ್ಲಿರುವ ಸ್ಟೀನ್‌ನಲ್ಲಿ ಪ್ರದರ್ಶಿಸಲ್ಪಡುತ್ತವೆ. ಎಟಿಸಿ ಕಂಟ್ರೋಲರ್‌ಗಳು ಪೈಲಟ್‌ಗಳೊಂದಿಗೆ ರೇಡಿಯೋ ಮೂಲಕ ಸಂವಹನ ನಡೆಸುತ್ತಾರೆ. ಈ ಸಂವಹನದಲ್ಲಿ ವಿಮಾನದ ಎತ್ತರ, ವೇಗ, ಮಾರ್ಗ ಮತ್ತು ಇತರ ಪ್ರಮುಖ ಮಾಹಿತಿಯನ್ನು ವಿನಿಮಯ ಮಾಡಿಕೊಳ್ಳಲಾಗುತ್ತದೆ. ಕಂಟ್ರೋಲರ್‌ಗಳು ವಿಮಾನಗಳಿಗೆ ಟೇಕಾಫ್ ಮತ್ತು ಲ್ಯಾಂಡಿಂಗ್‌ ಗಾಗಿ ನಿರ್ದೇಶನಗಳನ್ನು ನೀಡುತ್ತಾರೆ. ಅವರು ವಿಮಾನಗಳನ್ನು ಸುರಕ್ಷಿತ ಅಂತರದಲ್ಲಿ ಇಡಲು ಮತ್ತು ಘರ್ಷ ಣೆಯನ್ನು ತಪ್ಪಿಸಲು ಮಾರ್ಗಗಳನ್ನು ನಿರ್ಧರಿಸುತ್ತಾರೆ. ಕಂಟ್ರೋಲರ್‌ಗಳು ವೈಲಟ್‌ಗಳಿಗೆ ಹವಾಮಾನ, ವಿಮಾನ ನಿಲ್ದಾಣದಲ್ಲಿನ ಸ್ಥಿತಿ, ಸನಿಹವಿರುವ ಇತರ ವಿಮಾನ, ಮಾರ್ಗಸೂಚನೆ ಮತ್ತು ಇತರ ಪ್ರಮುಖ ಮಾಹಿತಿಯನ್ನು ಒದಗಿಸುತ್ತಾರೆ. ವಿಮಾನ ನಿಲ್ದಾಣದಲ್ಲಿ ಏರೋಡೋಮ್ ಕಂಟ್ರೋಲ್ ಟವರ್ ಇರುತ್ತದೆ. ಇಲ್ಲಿಂದ ವಿಮಾನಗಳ ಟೇಕಾಫ್, ಲ್ಯಾಂಡಿಂಗ್ ಮತ್ತು ಗೌಂಡ್ ಚಲನವಲನಗಳನ್ನು ನಿಯಂತ್ರಿಸಲಾಗುತ್ತದೆ. ಇನ್ನೊಂದು ಏಪ್ರಾನ್ ಕಂಟ್ರೋಲ್. ಏಪ್ರಾನ್ ಎಂಬುದು ವಿಮಾನ ನಿಲ್ದಾಣದಲ್ಲಿ ವಿಮಾನಗಳು ನಿಲ್ಲುವ ಪ್ರದೇಶವಾಗಿದೆ. ವಿಪ್ರಾನ್ ಕಂಟ್ರೋಲ್ ವಿಮಾನಗಳನ್ನು ವಿಪ್ರಾನ್‌ನಲ್ಲಿ ಸುರಕ್ಷಿತವಾಗಿ ಚಲಿಸುವಂತೆ ಮಾಡುತ್ತದೆ. ಮತ್ತೊಂದು ಟರ್ಮಿನಲ್ ಕಂಟ್ರೋಲ್, ಇದು ವಿಮಾನ ನಿಲ್ದಾಣದ ಟರ್ಮಿನಲ್‌ನಲ್ಲಿನ ಚಟುವಟಿಕೆಗಳನ್ನು ನಿರ್ವಹಿಸುತ್ತದೆ. ಇದು ವಿಮಾನಗಳ ಬೋರ್ಡಿಂಗ್ ಮತ್ತು ಡಿಬೋರ್ಡಿಂಗ್‌ನಲ್ಲಿ ಸಹಾಯ ಮಾಡುತ್ತದೆ. ಹಾಗೆ ಏರಿಯಾ ಕಂಟ್ರೋಲ್ ಎನ್ನುವ ಇನ್ನೊಂದು ವ್ಯವಸ್ಥೆ ಇರುತ್ತದೆ. ಇದು ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ವಾಯುಪ್ರದೇಶವನ್ನು ನಿಯಂತ್ರಿಸುತ್ತದೆ.

ಇದು ವಿಮಾನಗಳನ್ನು ಸುರಕ್ಷಿತ ಮಾರ್ಗಗಳಲ್ಲಿ ಮಾರ್ಗದರ್ಶಿಸುತ್ತದೆ. ಸುರಕ್ಷತೆ ಮತ್ತು ಪೈಲಟ್‌ ಗಳಿಗೆ ಮಾರ್ಗದರ್ಶಕವಾಗಿ ಕೆಲಸ ಮಾಡುವುದು ಎಟಿಸಿಯ ಪ್ರಮುಖ ಹೊಣೆಗಾರಿಕೆ. ಎಟಿಸಿ ವ್ಯವಸ್ಥೆಯು ವಿಮಾನಗಳ ಸುರಕ್ಷತೆಯನ್ನು ಖಚಿತಪಡಿಸುತ್ತದೆ. ಒಟ್ಟಾರೆ ಈ ವ್ಯವಸ್ಥೆಯು ವಿಮಾನಗಳ ದಕ್ಷ ಚಲನವಲನವನ್ನು ಖಚಿತಪಡಿಸುತ್ತದೆ. ಎಟಿಸಿ ವ್ಯವಸ್ಥೆಯು ವಿಮಾನಗಳ ವಿಳಂಬಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಇದು ವಿಮಾನಗಳು ಸಮಯಕ್ಕೆ ಸರಿಯಾಗಿ ತಲುಪಲು ಅನುವು ಮಾಡಿಕೊಡುತ್ತದೆ. ಎಟಿಸಿಯು ವಿಮಾನ ನಿಲ್ದಾಣ ಮತ್ತು ಆಗಸದಲ್ಲಿರುವ ಪ್ರತಿ ವಿಮಾನದ ಮೇಲೆಯೂ ಕಣ್ಣಿಟ್ಟಿರುತ್ತದೆ. ಅಲ್ಲಿ ಕೆಲಸ ಮಾಡುವವರು ಸದಾ ಜಾಗೃತರಾಗಿರಬೇಕಾಗುತ್ತದೆ ಮತ್ತು ಸ್ವಲ್ಪವೂ ಮೈಮರೆಯುವಂತಿಲ್ಲ.”

ಮಾಹಿತಿ ಕೃಪೆ: ವಿಶ್ವವಾಣಿ

ಚಿತ್ರ ಕೃಪೆ: ಅಂತರ್ಜಾಲ ತಾಣ