ಶಂಕರಾನಂದ ಹೆಬ್ಬಾಳರ ಗಝಲ್ ಗಳ ಲೋಕ!

ಗಝಲ್-೧

ಜೀವನದ ನೌಕೆಯು ದೌರ್ಭಾಗ್ಯದಲಿ

ಸಾಗುತಲಿದೆ ದೇವರೆ|

ನೋವಿನೊಡಲ ಸುಮವದು ಕಿಚ್ಚಿನಲಿ

ಸುಡುತಲಿದೆ ದೇವರೆ||

ಕರಗಳು ಎನಗಿಲ್ಲ ಧಾಷ್ಟ್ರ್ಯದ

ವಿಧಿಯ ಆಟವಿದು|

ದುರದೃಷ್ಟ ಜೀವವು ಅಹರ್ನಿಶಿ

ಬಾಡುತಲಿದೆ ದೇವರೆ||

ಸತಿಸುತರ ಹಂಗಿಲ್ಲದೆ ಬದುಕಿನ

ಬಂಡಿಯ ಪಯಣವಿದು|

ಜತನವಾದ ಸೈಕಲಿನಲಿ ಆನಂದವು

ಸಿಗುತಲಿದೆ ದೇವರೆ||

ಉಪವಾಸ ಮಾಡದೆ ಬೇಡಿತಿನ್ನುವ

ಜಾಯಮಾನ ನನ್ನದಲ್ಲ|

ತಪಸಿ ವಿಶ್ವಾಮಿತ್ರನಂತಹ ಮನವ

ಕೇಳುತಲಿದೆ ದೇವರೆ||

ನಭದ ಕಾರ್ಮೋಡವು ಚಕ್ರದಂತೆ

ಕಂಗಳಿಗೆ ಆವರಿಸಿದೆ|

ಅಭಿನವನ ಪದ್ಯವು ಚರಮಗೀತೆಯ

ಹಾಡುತಲಿದೆ ದೇವರೆ||

*******

ಗಝಲ್-೨ (ತೀನ ಕಾಫಿಯಾ)

ಮೇಘರಾಜನ ಹೆಜ್ಜೆಯಲ್ಲಿ ಕುಣಿತ

ನೋಡುತಿರುವೆ ಗೆಳೆಯ|

ಒಲವಿನ ಭಾವದಲ್ಲಿ ನೋಡುತ

ಹಾಡುತಿರುವೆ ಗೆಳೆಯ||

ಓಡುತಿದೆ ಜೀವನದ ನೋವುಗಳು

ಅರಿವಿರದ ಬದುಕಲಿ|

ಮೇನೆಯ ಜೊತೆಯಲ್ಲಿ ಸಾಗುತ

ಓಡುತಿರುವೆ ಗೆಳೆಯ||

ಬಾನಿನಲಿ ಕಾರ್ಮೋಡ ಕತ್ತಲೆಯ

ಕವಿಯುತ್ತ ನಿಂತಿಹುದು|

ಸಂತಸದ ಚಣದಲ್ಲಿ ಬಾಗುತ

ನಗುತಿರುವೆ ಗೆಳೆಯ||

ನಭವನ್ನು ದಿಟ್ಟಿಸುತ ಚಿಣ್ಣರಲಿ

ತೋಷವದು ಉಕ್ಕುತಿದೆ|

ಮೋಡದ ಮರೆಯಲ್ಲಿ ಕಾಣುತ

ಹೇಳುತಿರುವೆ ಗೆಳೆಯ||

ಕಡಲಿನಂತೆ ಒಂದಾಗಿ ನಲಿವೆವು

ಅಭಿನವನಲ್ಲಿ ಇಂದು|

ಗರಿಕೆಯ ಹುಲ್ಲಿನಲ್ಲಿ ಕೂಗುತ

ಕಾಯುತಿರುವೆ ಗೆಳೆಯ||

-ಶಂಕರಾನಂದ ಹೆಬ್ಬಾಳ