ಶಿಶಿಲೇಶ್ವರ ದೇಗುಲ ಶಿಶಿಲಾ

ಎಂಥ ಚಂದ ಕ್ಷೇತ್ರವಿಲ್ಲಿ ಎನಿತು ಸುಂದರ

ಮರೆತು ಹೋದೆ ನನ್ನ ನಾನೆ ಶಿಶಿಲೇಶ್ವರ||ಪ||

ಪುಣ್ಯನಾಡು ಹರನು ಇಲ್ಲಿ ಆಗಿ ಉದ್ಭವ

ನಂಬಿದವರ ಬಿಡದೆ ಪೊರೆವ ಶಿಶಿಲೇಶ್ವರ

ಭಕ್ತಿಯಲ್ಲಿ ಬರುವ ಮಂದಿ ಅರುಹೆ ಕಷ್ಟವ

ಕಳೆದುಬಿಡುವ ಒಲವಿನಿಂದ ದೇವ ಈಶ್ವರ||

ಕಪಿಲ ನದಿಗೆ ತಾಗಿದಂತೆ ದಿವ್ಯ ದೇಗುಲ

ಗುಡಿಯ ಸುತ್ತ ಹಸಿರು ಸಿರಿಯ ಭವ್ಯ ವರ್ತುಲ

ಮತ್ಸ್ಯ ತೀರ್ಥ ಮತ್ಸ್ಯ ರಾಶಿ ಮನವ ಸೆಳೆವುದು

ತಿನಿಸು ಕೊಡಲು ತಿನ್ನಲದನು ನೃತ್ಯಗೈವುದು||

ಕಾಣುತಿಹುದು ಗುಡ್ಡ ಬೆಟ್ಟ ಸೆಳೆದು ಮೈಮನ

ಬೆಟ್ಟವನ್ನು ಅಪ್ಪಿಕೊಂಡ ದಟ್ಟ ಕಾನನ

ಕೊಡಲು ಉಸಿರು ಚಿಗುರು,ಹಸಿರು ಶುದ್ಧ ಪರಿಸರ

ಮರಳಿ ತೆರಳೆ ಮನವು ಬರದು ಸಗ್ಗದಾತರ||

ಶುದ್ಧ ಮನದಿ ಇಲ್ಲಿ ಕಂಡೆ ಹರನ ಸನ್ನಿಧಿ

ಪುಳಕಗೊಂಡೆ ಕಳೆದುಕೊಂಡೆ ಮನದ ಬೇಗುದಿ

ಹಿತವು ಎನಿಸಿ ನಿಜಕು ದೊರೆತು ಬಹಳ ನೆಮ್ಮದಿ

ಮತ್ತೆ ಹೊತ್ತು ಕಳೆಯುವಾಸೆ ಬುವಿಯ ಸಗ್ಗದಿ||

-ಪೆರ್ಮುಖ ಸುಬ್ರಹ್ಮಣ್ಯ ಭಟ್