ಸಂಕ್ರಾಂತಿ ಸಂಭ್ರಮಕ್ಕೆ ಎರಡು ಗೀತೆಗಳು

ಸಂಕ್ರಾಂತಿ ಮಕರ ಸಂಕ್ರಾಂತಿ ಬಂತು

ನಾಡಿನಗಲಕೆ ಜನರ ಪಾಲಿಗೆ ತಂತು//

ಪಥವ ಬದಲಿಸುತ ಬಂತೇ ಬಂತು

ಭಾಸ್ಕರನ ಹೊಂಗಿರಣ ಪ್ರಭೆಯ ಬೀರಿತು//

ರೈತ ಮಂದಿಯು ಪೈರ ಬೆಳೆಯುತ

ಮನೆಯ ಮುಂದೆ ರಾಶಿ ಹಾಕುತ/

ಸುಗ್ಗಿಯ ಮಾಡುತ ಹಿಗ್ಗಲಿ ಕುಣಿಯುತ

ಹುಗ್ಗಿಯ ಪಾಯಸ ಮಾಡುತ ಸವಿಯುತ//

ರಂಗು ರಂಗಿನ ರಂಗವಲ್ಲಿ ಬಿಡಿಸುತ

ಎಳ್ಳುಬೆಲ್ಲ ಮೆದ್ದು ಒಳ್ಳೆಯ ಮಾತನಾಡುತ/

ಸುಖ ಶಾಂತಿ ಆರೋಗ್ಯ ಬೇಡುತ

ಕಳೆ ಕೊಳೆಗಳ ಹೊರದೂಡಿ ಮೆರೆಯುತ//

ಸಕ್ಕರೆ ಅಚ್ಚು ಕಡಲೆ ಶೇಂಗ ಮೆಲ್ಲುತ

ಸಂಕ್ರಾಂತಿ ಸಂಭ್ರಮ ಆಚರಣೆ ಮಾಡುತ/

ಉತ್ತರಾಯಣದ ಪುಣ್ಯ ಕಾಲಕೆ ಕಾಲಿಡುತ

ಸಪ್ತಾಶ್ವ ರಥವೇರಿದ ರವಿಯ ಪೂಜೆ ಮಾಡುತ//

ರಾಸುಗಳ ಕೋಡಿಗೆ ಬಣ್ಣ ಬಳಿಯುತ

ಉರಿವ ಕೆಂಡದಿ ಓಡೋಡಿ ಹಾಯಿಸುತ/

ಬದಲಾವಣೆಯ ಹೊಸ ಗಾಳಿ ಬೀಸಿತು

ತನುಮನದಿ ನವಪುಷ್ಪವರಳಿತು//

***

ಜಾನಪದ ಶೈಲಿಗೀತೆ

ತವರಿಗೆ ಬಂದೀನಿ ಸಂಕ್ರಾಂತಿ ಹಬ್ಬಕೆ

ಗೆಳತಿಯರ ಜೊತೆಸೇರಿ ಜೋಕಾಲಿ/

ಜೀಕುತ ಖುಷಿಯನ್ನು ಹೊಂದೋಣ ಬನ್ನಿರೇ--/

ಆಲದ ಮರಕೆ ತೂಗು ಹಾಕೋಣ

ಸರದಿಯಲಿ ಉಯ್ಯಾಲೆ  ಆಡೋಣ

ಸಂಭ್ರಮದಿ ಹಾಡೋಣ ಬನ್ನಿರೇ--/

ಲಂಗ ದಾವಣಿಯ ಧರಿಸಿಹೆವು ನಾವಿಂದು

ಮಾರುದ್ದ ಜಡೆಯ ಹೆಣೆದಿಹೆವು

ಮುಡಿಗೆ ಕಾಕಡವ ಮುಡಿಯೋಣ ಬನ್ನಿರೇ-/

ಊರ ತೋಪಿನಲಿ ಪ್ರಕೃತಿಯ ಚೆಲುವಿನಲಿ

ಒಟ್ಟಾಗಿ ಸೇರಿ ಸಂತಸವ ಹಂಚೋಣ

ಬಾಲ್ಯ ಕಾಲವ ನೆನಪು ಮಾಡೋಣ ಬನ್ನಿರೇ--/

ಜೋಕಾಲಿಯಲಿ ಗೆಳತಿ ನೀ ಮೊದಲು ಜೀಕುತ

ಆನಂದ ಹೊಂದಿ ನಲಿಯುತ

ಜೀವನದ ಕಹಿಗಳ ಮರೆಯೋಣ ಬನ್ನಿರೇ--/

ಉಯ್ಯಾಲೆಯ ಏರಿಳಿತ ಬದುಕಿನ ಆಟ

ತವರು ಮನೆಯು ಸುಖವಾಗಿರಲಿ

ನೆನೆಯೋಣ ದ್ಯಾವರ ಒಂದಾಗಿ ಬನ್ನಿರೇ--/

-ರತ್ನಾ ಕೆ. ಭಟ್ ತಲಂಜೇರಿ

ಚಿತ್ರ ಕೃಪೆ: ಇಂಟರ್ನೆಟ್ ತಾಣ