ಸಂಸಾರ ಶರಧಿ

ಬೀಸುವ ಗಾಳಿಗೆ ಬೆದರದೆ ಸಾಗಲಿ

ಸಂಸಾರ ಶರಧಿಯ ಗುಡಿಯು|

ಭೋರ್ಗರೆವ ಜಲರಾಶಿಯ ಕಡಲಲಿ

ಬೆಳ್ನೊರೆ ಅಪ್ಪಳಿಸುವ ನಡೆಯು||

ದೂರದಲೆಲ್ಲೋ ಊಳಿಡುವ ನರಿಯು

ಬಾರದಿರಲಿ ಕದವ ತೆರೆದು|

ತಳಮಳಗೊಳ್ಳದೆ ಮನದ ನೆಮ್ಮದಿಯು

ಸ್ಥಿರತೆಯ ಚಾಪೆ ಹಾಸುತಲಿಂದು||

ಕತ್ತಲೆ ಬೆಳಕಿನ ಸೋಜಿಗ ನೋಟವು 

ಬಾಳಿನ ಹಾದಿಯ ಲೇಖನಿಯು|

ಏಳುತ ಬೀಳುತ ಸಾಗುವ ನಡೆಯು

ಹೆಣೆದಿಹ ಅಕ್ಷರ ಪುಟಪುಟವು||    

ಅಪ್ಪುತ ಒಪ್ಪುತ ಬದುಕಿನ ಬಂಡಿಯು

ಉರುಳುತ ಮುಂದಕೆ ನಗೆಯನು ಚಿಮ್ಮುತ|

ಸೋಲು ಗೆಲುವು ಸರಿಸಮವೆನುತ

ತನುವಲಿ ಒಲವನು ಬಿಂಬಿಸುತ  ||

-ರತ್ನಾ ಭಟ್ ತಲಂಜೇರಿ 

ಚಿತ್ರ ಕೃಪೆ: ಇಂಟರ್ನೆಟ್ ತಾಣ