ಸಪ್ತಪದಿ.. ಇದು ಏಳು ಹೆಜ್ಜೆಗಳ ಅನುಬಂಧ…

ಹಿಂದೂ ವಿವಾಹಗಳಲ್ಲಿ ಆಚರಿಸಲಾಗುವ ಸಪ್ತಪದಿ ಸಂಪ್ರದಾಯಕ್ಕೆ ಅದರದ್ದೇ ಅರ್ಥವಿದೆ, ಅದರದ್ದೇ ಆದ ಮಹತ್ವವಿದೆ. ಹಿಂದೂ ವಿವಾಹಗಳಲ್ಲಿ ಸಪ್ತಪದಿಯನ್ನು ಯಾಕೆ ಮಾಡಲಾಗುತ್ತದೆ ಗೊತ್ತಾ? ಸಪ್ತಪದಿಯಲ್ಲಿನ 7 ಹೆಜ್ಜೆಗಳ ಅರ್ಥವೇನು ನೋಡಿ.

ಮದುವೆಯೆಂದರೆ ಎರಡು ದೇಹಗಳ ನಡುವಿನ ಸಂಬಂಧವಲ್ಲ, ಅದುವೇ ಎರಡು ಆತ್ಮಗಳ ನಡುವಿನ ಸಂಬಂಧವಾಗಿದೆ. ಮದುವೆ ಕೇವಲ ಒಂದು ಗಂಡು ಹಾಗೂ ಒಂದು ಹೆಣ್ಣನ್ನು ಮಾತ್ರ ಒಳಗೊಂಡಿರುವುದಿಲ್ಲ, ಬದಲಾಗಿ ಸಂಪೂರ್ಣ ಒಂದು ಕುಟುಂಬವನ್ನೇ ಒಳಗೊಂಡಿರುತ್ತದೆ. ಹಿಂದೂ ವಿವಾಹಗಳಲ್ಲಿ ವಧು - ವರರು ಕೈ ಹಿಡಿದು ಅಗ್ನಿ ಕುಂಡಕ್ಕೆ 7 ಸುತ್ತು ಬರುವ ಆಚರಣೆಯು ವಧು - ವರರ ವೈವಾಹಿಕ ಜೀವನದ ಆರಂಭವನ್ನು ಸೂಚಿಸುತ್ತದೆ. ಈ 7 ಹೆಜ್ಜೆಗಳಲ್ಲಿ ಪ್ರತಿಯೊಂದು ಹೆಜ್ಜೆಯು ತನ್ನದೇ ಆದ ಮಹತ್ವವನ್ನು ಹೊಂದಿದೆ. ವಧು - ವರರು ಜೊತೆಯಾಗಿ ಇಡುವ 7 ಹೆಜ್ಜೆಗಳನ್ನು ಸಪ್ತಪದಿ ಎನ್ನಲಾಗುತ್ತದೆ. ಏಳು ಹೆಜ್ಜೆಗಳು ಏಳು ಪ್ರತಿಜ್ಞೆಯನ್ನು ಸೂಚಿಸುತ್ತದೆ. ಎಷ್ಟೇ ಕಠಿಣ ಸಂದರ್ಭದಲ್ಲೂ ಜೊತೆಯಾಗಿ ಹೆಜ್ಜೆಯಿಡುವೆ ಎನ್ನುವುದನ್ನು ಸೂಚಿಸುತ್ತದೆ. ಏಳೇಳು ಜನ್ಮದಲ್ಲೂ ನಿನ್ನ ಜೊತೆಯಾಗಿರುವ ಎನ್ನುವುದನ್ನು ಸಂಕೇತಿಸುತ್ತದೆ. ಸಪ್ತಪದಿಯ ಪ್ರಾಮುಖ್ಯತೆಯೇನು ಗೊತ್ತಾ..? ಈ ಏಳು ಹೆಜ್ಜೆಗಳು ಯಾವ ಸಂದೇಶವನ್ನು ನೀಡುತ್ತದೆ ಗೊತ್ತಾ?

​ಮೊದಲನೇ ಹೆಜ್ಜೆ: ಸಪ್ತಪದಿಯ ಮೊದಲ ಹೆಜ್ಜೆಯು ಬಹಳ ಪ್ರಮುಖವಾದ ಸಂದೇಶವನ್ನು ನೀಡುತ್ತದೆ. ಸಪ್ತಪದಿಯ ಮೊದಲ ಹೆಜ್ಜೆಯಲ್ಲಿ ವರನು ವಧುವಿಗೆ ನಿನ್ನೆಲ್ಲಾ ನೋವಿನಲ್ಲೂ, ನಗುವಿನಲ್ಲೂ ನಿನ್ನೊಂದಿಗಿರುವೆ ಎನ್ನುವ ಪ್ರತಿಜ್ಞೆಯನ್ನು ಮಾಡುತ್ತಾನೆ. ತನ್ನ ಹೆಂಡತಿ ಮತ್ತು ಮಕ್ಕಳಿಗೆ ಸಂತೋಷವನ್ನು ನೀಡುತ್ತೇನೆ, ಅವರ ಅಭಿವೃದ್ಧಿಯನ್ನು ಬಯಸುತ್ತೇನೆಂದು ಪ್ರತಿಜ್ಞೆಯನ್ನು ಮಾಡುತ್ತಾನೆ. ಹಾಗೇ ವಧು ಕೂಡ ವರನಿಗೆ ಕುಟುಂಬದವರನ್ನು ನೋಡಿಕೊಳ್ಳುವ ಜವಾಬ್ದಾರಿ ನನ್ನದು ಎಂದು ಭರವಸೆಯನ್ನು ನೀಡುತ್ತಾಳೆ.

​ಎರಡನೇ ಹೆಜ್ಜೆ: ಸಪ್ತಪದಿಯ ಎರಡನೇ ಹೆಜ್ಜೆಯಲ್ಲಿ ವರನು ತನ್ನ ವಧುವಿಗೆ ಜೀವನದಲ್ಲಿ ನಂಬಿಕೆಗೆ ಅರ್ಹನಾಗಿ, ನಿಷ್ಠಾವಂತನಾಗಿ ಇರುತ್ತೇನೆ ಎನ್ನುವ ಭರವಸೆಯನ್ನು ನೀಡುತ್ತಾನೆ. ಹೆಂಡತಿಯ ಸಂತೋಷ ಮತ್ತು ದುಃಖ ಈ ಎರಡರಲ್ಲೂ ನಿನ್ನ ಬೆನ್ನೆಲುಬಾಗಿ ಇರುತ್ತೇನೆಂದು ಹೇಳುತ್ತಾನೆ. ವರನು ವಧುವಿನ ಕುಟುಂಬಕ್ಕೆ ಮಾನಸಿಕ, ದೈಹಿಕ ಮತ್ತು ಆರ್ಥಿಕ ಸ್ಥಿರತೆಯನ್ನು ಹಾಗೂ ಸುರಕ್ಷತೆಯನ್ನು ನೀಡುತ್ತೇನೆಂದು ಭರವಸೆಯನ್ನು ನಿಡುತ್ತಾನೆ. ವಧು ತನ್ನ ಎರಡನೇ ಹೆಜ್ಜೆಯಲ್ಲಿ ವರನೊಂದಿಗೆ ತನ್ನೆಲ್ಲಾ ಜವಬ್ದಾರಿಗಳನ್ನು ಹಂಚಿಕೊಳ್ಳುತ್ತೇನೆ ಮತ್ತು ಪ್ರತಿಯೊಂದು ಸಂದರ್ಭದಲ್ಲೂ ಅವನೊಂದಿಗೆ ಇರುತ್ತೇನೆಂಬ ಪ್ರತಿಜ್ಞೆಯನ್ನು ಮಾಡುತ್ತಾಳೆ.

​ಮೂರನೇ ಹೆಜ್ಜೆ: ಸಪ್ತಪದಿಯ ಮೂರನೇ ಹೆಜ್ಜೆಯಲ್ಲಿ ವರ ತನ್ನ ಪತ್ನಿಗೆ ತಾನು ಕಷ್ಟಪಟ್ಟು ಕೆಲಸವನ್ನು ಮಾಡುತ್ತೇನೆ. ಹಾಗೂ ಮನೆಯಲ್ಲಿ ಸಿರಿ, ಸಂಪತ್ತು, ಸಮೃದ್ಧಿಯನ್ನು ತರಲು, ಮಕ್ಕಳಿಗೆ ಉತ್ತಮ ಶಿಕ್ಷಣವನ್ನು ನೀಡಲು ತನ್ನ ಕೈಲಾದ ಪ್ರಯತ್ನವನ್ನು ಮಾಡುತ್ತೇನೆಂದು ಭರವಸೆಯನ್ನು ನೀಡುತ್ತಾನೆ. ವಧು ತನ್ನ ಮೂರನೇ ಹೆಜ್ಜೆಯಲ್ಲಿ ತಾನು ತನ್ನ ಗಂಡನಿಗೆ ನಿಷ್ಠಳಾಗುರುತ್ತೇನೆಂದು ಹೇಳುತ್ತಾಳೆ. ಪತಿ ಕಷ್ಟ ಪಟ್ಟು ಸಂಪಾದಿಸಿದ ಸಂಪತ್ತನ್ನು ಜವಾಬ್ದಾರಿಯಿಂದ ನೋಡಿಕೊಳ್ಳುತ್ತೇನೆಂಬ ಭರವಸೆಯನ್ನು ನೀಡುತ್ತಾಳೆ.

​ನಾಲ್ಕನೇ ಹೆಜ್ಜೆ: ಸಪ್ತಪದಿಯ ನಾಲ್ಕನೇ ಹೆಜ್ಜೆಯಲ್ಲಿ ವರನು ವಧುವಿಗೆ ತನ್ನ ಜೀವನವನ್ನು ಸುಂದರಗೊಳಿಸಿದ್ದಕ್ಕೆ ಹಾಗೂ ಪರಿಪೂರ್ಣಗೊಳಿಸಿದ್ದಕ್ಕೆ ಕೃತಜ್ಞತೆಯನ್ನು ಸಲ್ಲಿಸುತ್ತಾನೆ. ವರನು ಪತ್ನಿಗೆ ತನ್ನ ಎರಡೂ ಕುಟುಂಬವನ್ನು ಅಂದರೆ ತನ್ನ ಕುಟುಂಬವನ್ನು ಹಾಗೂ ವಧುವಿನ ಕುಟುಂಬವನ್ನು ಗೌರವಿಸುವುದಾಗಿ ಮತ್ತು ಅವರ ಎಲ್ಲಾ ಆಸೆಗಳನ್ನು ಪೂರೈಸುವುದಾಗಿ ಹಾಗೂ ತಾನು ತೆಗೆದುಕೊಳ್ಳುವ ಪ್ರಮುಖ ನಿರ್ಧಾರಗಳಲ್ಲಿ ಅವರನ್ನೂ ಕೂಡ ಸೇರಿಸಿಕೊಳ್ಳುವುದಾಗಿ ಮಾತನ್ನು ನೀಡುತ್ತಾನೆ. ವಧು ತನ್ನ ನಾಲ್ಕನೇ ಹೆಜ್ಜೆಯಲ್ಲಿ ತನ್ನ ಪತಿಯ ಎಲ್ಲಾ ನಿರ್ಧಾರಗಳಲ್ಲೂ ಕೈಜೋಡಿಸುವುದಾಗಿ ಪ್ರತಿಜ್ಞೆಯನ್ನು ನೀಡುತ್ತಾಳೆ.

​ಐದನೇ ಹೆಜ್ಜೆ: ಸಪ್ತಪದಿಯ ಐದನೇ ಹೆಜ್ಜೆಯಲ್ಲಿ ದಂಪತಿಗಳು ಪರಸ್ಪರ ಜೊತೆಯಾಗಿಯೇ ಇರುತ್ತೇವೆ ಮತ್ತು ತಮ್ಮ ಸಂತೋಷ, ದುಃಖಗಳನ್ನು ಇಬ್ಬರೂ ಪರಸ್ಪರ ಹಂಚಿಕೊಳ್ಳುತ್ತೇವೆಂದು ಭರವಸೆಯನ್ನು ನೀಡುತ್ತಾರೆ. ಹಾಗೂ ಅವರಿಬ್ಬರೂ ಜೊತೆಯಾಗಿ ಆರೋಗ್ಯಕರ ಮಕ್ಕಳನ್ನು ಆಶೀರ್ವದಿಸುವಂತೆ ಮತ್ತು ಆರೋಗ್ಯಕರ ಜೀವನಶೈಲಿಯನ್ನು ಕರುಣಿಸುವಂತೆ ದೇವರನ್ನು ಪ್ರಾರ್ಥಿಸುತ್ತಾರೆ.

​ಆರನೇ ಹೆಜ್ಜೆ: ಸಪ್ತಪದಿಯ ಆರನೇ ಹೆಜ್ಜೆಯಲ್ಲಿ ದಂಪತಿಗಳಿಬ್ಬರು ಪರಸ್ಪರ ಒಬ್ಬರನ್ನೊಬ್ಬರು ಪ್ರೀತಿಸುತ್ತೇವೆ, ಗೌರವಿಸುತ್ತೇವೆ, ಎಷ್ಟೇ ಕಠಿಣ ಸಂದರ್ಭದಲ್ಲೂ ಜೊತೆಯಾಗಿ ನಿಲ್ಲುತ್ತೇವೆಂದು ಹೇಳುತ್ತಾರೆ. ಸಂತೋಷಕರ ಜೀವನಕ್ಕಾಗಿ ದೇವರನ್ನು ಜೊತೆಯಾಗಿ ಪ್ರಾರ್ಥಿಸುತ್ತಾರೆ. ಎಲ್ಲಾ ಜವಾಬ್ದಾದಾರಿಗಳನ್ನು, ಎಲ್ಲಾ ಕರ್ತವ್ಯಗಳನ್ನು ಜೊತೆಯಾಗಿ ನಿಭಾಯಿಸುತ್ತೇವೆಂದು ಹೇಳುತ್ತಾರೆ.

ಏಳನೇ ಹೆಜ್ಜೆ: ಸಪ್ತಪದಿಯ ಏಳನೇ ಹಾಗೂ ಕೊನೆಯ ಹೆಜ್ಜೆಯಲ್ಲಿ ವಧು - ವರರಿಬ್ಬರೂ ಈ ಮೇಲಿನ ಎಲ್ಲಾ 6 ಪ್ರತಿಜ್ಞೆಯನ್ನು ಚಾಚು ತಪ್ಪದೇ ಪಾಲಿಸುತ್ತೇವೆಂದು ಭರವಸೆಯನ್ನು ನೀಡುತ್ತಾರೆ. ನಮ್ಮ ಎರಡೂ ಕುಟುಂಬಗಳನ್ನು ಒಂದೇ ಎನ್ನುವ ಭಾವನೆಯನ್ನು ಹೊಂದುತ್ತೇವೆಂದು ಹೇಳುತ್ತಾರೆ. ಜೀವನದಲ್ಲಿ ಒಬ್ಬರನ್ನೊಬ್ಬರು ಎಂತಹುದೇ ಪರಿಸ್ಥಿತಿಯಲ್ಲಿ ಬಿಟ್ಟುಕೊಡಲಾರೆವು ಎಂದು ಭರವಸೆಯನ್ನು ನೀಡುತ್ತಾರೆ.

(ವಾಟ್ಸಾಪ್ ಮೂಲಕ ಸಂಗ್ರಹ) - ಅರುಣ್ ಡಿ'ಸೋಜ, ಮಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್