ಸುಬ್ಬನ ಸೋದರಮಾವ !

ಇವರ ಯುದ್ದದ ನಡುವೆ ಎಣ್ಣೆ ಒತ್ತಿಸಿಕೊಂಡು ಬಿಟ್ಟಿ ಮಸಾಜ್ ಮಾಡಿಸಿಕೊಳ್ಳುತ್ತ "ಎಣ್ಣೆಯನೊತ್ತುತ ಯದುಕುಲ ತಿಲಕಗೆ, ಬಣ್ಣಿಸಿ ಗೋಪಿ ಹರಸಿದಳು" ಎಂಬ ಅಜ್ಜಿಯ ಹಾಡನ್ನೂ ಕೇಳಿಸಿಕೊಳ್ಳುತ್ತ ನಿದ್ದೆ ಹೋದ ಸಂದರ್ಭವೂ ಇದೆ.

 

ಎಣ್ಣೆ ಒತ್ತಿಸಿಕೊಂಡು, ಅಲ್ಲಿ ಇಲ್ಲಿ ಕುಳಿತು, ಗೋಡೆಗೋ ಸೋಫ’ಗೋ ಎಣ್ಣೆ ಮೆತ್ತಿ ಅಮ್ಮನ ಕೈಲಿ ಬೈಸಿಕೊಳ್ಳುತ್ತ, ಒಂದು ಘಂಟೆ ಹೊತ್ತು ಕಾಲಹರಣ ಮಾಡಿ, ನಂತರ ಬಿಸಿ ಬಿಸಿ ನೀರಿನ ಸ್ನಾನ ಮಾಡಿಸಿಕೊಂಡು, ಪೊಗದಸ್ತಾದ ಊಟ ಮಾಡಿ, ಭಯಂಕರ ನಿದ್ದೆ ಮಾಡಿ, ಸಂಜೆ ವಾಕಿಂಗ್ ಅಂತ ಪಕ್ಕದ ಮನೆಗೆ ಹೋಗುವುದು, ವಾಡಿಕೆ. ಒಮ್ಮೆ, ಎಣ್ಣೆ ಸ್ನಾನ ಆಗುವಾಗ, ’ಹಸಿವೆ’ ಎಂದು ಅಜ್ಜಿಗೆ ಹೇಳಿದಾಗ, ರೇಗಿದ ಅಜ್ಜಿ ಒಮ್ಮೆ ಕೈಲಿದ್ದ ಸೀಗೆಪುಡಿ ಬಾಯಿಗೆ ತುರುಕಿದ್ದೂ ಇದೆ !!

 

ಮೊನ್ನೆ ಭಾನುವಾರವೂ ಇದೇ ಆಯ್ತು. ಅಜ್ಜಿ ಬಂದಿರೋದು ಗೊತ್ತಿರೋದ್ರಿಂದ ಸುಮ್ನೆ ಸುಬ್ಬನನ್ನು ಭೇಟಿ ಮಾಡುವ ನೆಪದಲ್ಲಿ ಅವನ ಮನೆಗೆ ಹೋದೆ. ಕೂಸು ಇನ್ನೂ ಮಲಗಿತ್ತು. ಸುಮ್ನೆ ಕೂತೆ. ಅವನು ಬಾರದಿದ್ದರೂ ತಿಂಡಿ ಬರಬಹುದು ಅಂತ.

 

ನಿದ್ದೆಯಿಂದ ಎದ್ದ ಸುಬ್ಬ ಮುಖ ತೊಳೆದು ಲಕ್ಷಣವಾಗಿ ಕೊಬ್ಬರಿ ಎಣ್ಣೆ ಹಚ್ಚಿಕೊಂಡು, ತಲೆ ಬಾಚಿ, ಬಟ್ಟೆ ಬದಲಿಸಿ ಹಾಗೇ ಹೊರಗೆ ನನ್ನನ್ನು ಕಂಡು ಕಿರು ನಗೆ ಸೂಸುವ ಮುನ್ನ, ಅಜ್ಜಿಯ ಉರಿಗಣ್ಣು ನೋಡಿ ಹಾಗೇ ನಿಂತ ... ತಾನೇನು ತಪ್ಪು ಮಾಡಿದೆ ಅಂತ !

 

ಸುಬ್ಬ ಅಜ್ಜಿಯ ಕೈಲಿ ಬೈಸಿಕೊಳ್ಳೋದು ಹೊಸದೇನಲ್ಲ ... ಅವನೇನು ಮಾಡಿದ ಎಂದು ತಿಳಿವ ಕುತೂಹಲ ನನಗೆ.

 

ಮುಸ್ಸಂಜೆ ಹೊತ್ತು ಯಾವುದೋ ಒಂದು ರಾಜಕೀಯ ಪಕ್ಷ ಮತ್ತೊಂದು ಪಕ್ಷದವರಿಗೆ ಬತ್ತಿ ಹಚ್ಚುವ ಲಗ್ನದಲಿ, ಸುಬ್ಬನ ಅಮ್ಮ ದೇವರ ದೀಪ ಹಚ್ಚಲು ಬತ್ತಿಯನ್ನು ಎಣ್ಣೆಯಲಿ ಮುಳುಗಿಸುತ್ತಿದ್ದ ಕಾಲದಲಿ, ಬತ್ತಿ ಹೊಸೆಯುತ್ತ ಬಾಗಿಲ ಬಳಿ ಕುಳಿತಿದ್ದ ಸಮಯದಲಿ, ಉರಿಗಣ್ಣ ಅಜ್ಜಿಯನ್ನು ನೋಡಿದ ಸುಬ್ಬನಿಗೆ ಹೊರಗೆ ಅಡ್ಡಡಿ ಬರುವ ಆಸೆಯೇ ಬತ್ತಿ ಹೋಯಿತು.

 

"ಹು..ಮು..ದೆ ... ಎಣ್ಣೆ ಹಚ್ಚಿ ತಲೆಗೆ ನೀರು ಹಾಕಿಕೊಂಡಿರೋ ದಿನ ಎಣ್ಣೆ ಹಚ್ಚಿಕೊಂಡ್ಯಾ?" ಅಂದರು ಅಜ್ಜಿ. ಹೀಗೆಲ್ಲ ಹೇಳಿದರೆ ಸುಬ್ಬನಿಗೆ ಅರ್ಥ ಆಗಲ್ಲ. ಹೋಗ್ಲಿ ಬಿಡಿ, ನನಗೂ ಅರ್ಥವಾಗಲಿಲ್ಲ. ಪೆಕರು ಪೆಕರಾಗಿ ಅಜ್ಜಿಯತ್ತ ನೋಡಿದ ಸುಬ್ಬ "ಯಾಕಜ್ಜಿ?" ಅಂದ.