‘ಸಿಂಪಲ್’ ಕವನಗಳು

ಮರೆಯದಿರು

ಮರೆಯದಿರು

ನನ್ನೊಲುಮೆ

ನಿನ್ನೊಲವ ಜೀವನದಿ

ಮರೆತಿರಲು

ಕುಗ್ಗುವುದು

ಸವಿಯೆಂಬ ಪ್ರೇಮನದಿ

ಬೆರೆತಾಗ

ಸಿಗುವುದೈ

ಹಸಿರೆನಿಪ ಸ್ವಾಗತವು

ಮರೆತಾಗ

ಬರುವುದೇ

ಒಲವೆನಿಪ ಬಂಧನವು

ಕರೆಯದೇ 

ಬರುವವರ

ಬರಬೇಡ ಜೊತೆಗಿಂದು 

ಕರೆದವರ

ಕೈಹಿಡಿದು

ಕರಕೊಂಡು ಬಾಯಿಂದು

ಕೊರೆಯುವರ

ದೂರವಿಡು

ಸನಿಹವಿರೆ ಬೆಳೆಸುವರು

ಬದುಕುತಲೆ

ಚೆಲುವಾಗು

ಬೆಸುಗೆಯಲೆ ಮಧುವೆಂದು

***

ಯಾವ ಗಳಿಗೆಗೆ

ಯಾವ ಗಳಿಗೆಗೆ ನಾನು ಬಂದೆನೊ

ಯಾವ ಬೆಳಕನು ಕಂಡು ನಿಂದೆನೊ

ಯಾವ ಸುಖವನು ಉಂಡು ಬೆಳೆದೆನೊ

ಯಾವ ನೆಲದಲಿ ಹೇಗೆ ಇರುವೆನೊ

ಯಾರ ಸ್ನೇಹವ ಮಾಡಿ ನಲಿದೆನೊ

ಯಾರ ಬಂಧಕೆ ಸೋತು ಹೋದೆನೊ

ಯಾರ ಜೀವಕೆ ಕೈಯ ಹಿಡಿದೆನೊ

ಯಾರ ಸಂಗದಿ ಪ್ರೀತಿ ಪಡೆದೆನೊ

ಯಾರು ಯಾರಿಗೊ ಮೋಡಿ ಆದೆನೊ

ಯಾರು ಕಾಣದ ನೆಲಕೆ ಸೋತೆನೊ

ಯಾರು ಕೇಳದ ಪದಕೆ ಕುಣಿದೆನೊ

ಯಾರು ಬಾರದ ಸವಿಗೆ ಕಾದೆನೊ

-ಹಾ ಮ ಸತೀಶ, ಬೆಂಗಳೂರು

ಚಿತ್ರ ಕೃಪೆ: ಇಂಟರ್ನೆಟ್ ತಾಣ