“ನೆರಳು”
ನೆರಳು ನೀಡುತ್ತಿದ್ದ ಮರಗಳೆಲ್ಲವೂ . . .
ಮಾನವನ ದುರಾಸೆಗೆ ಬಲಿಯಾಗಿ
ಧರಾಶಾಯಿಯಾಗಿರಲು
ಇನ್ನೆಲ್ಲಿದೆ ನೆರಳು ? ಬರೀ ಒಣ ಬಿಸಿಲು !
ಭಣಗುಡುವ ಬಯಲಲ್ಲೇ . . . ಉರುಳು - ಹೊರಳು
ಬೇಯುತಿದೆ ಭೂ ಮಾತೆಯ ಒಡಲು . ॥೧॥
ಮನೆಯ ಕಳೆದುಕೊಂಡ ಹಕ್ಕಿಗಳ
ಬದುಕೆಲ್ಲಾ. . . ಇನ್ನು ಬರೀ ಗೋಳು
ಎದೆ ತುಂಬಿ ಇಂಪಾಗಿ ಹಾಡಲು
ಎಲ್ಲಿದೆ ಹಸಿರು ತುಂಬಿದ ಸುಂದರ ವನಗಳು ?
ಮನದ ತುಂಬಾ ... ಅರಿಯದ ದಿಗಿಲು . ॥೨॥
ಮೇಯಲು ಹೋದ ದನ-ಕರುಗಳಿಗೆ
ವಿಶ್ರಮಿಸಲು ಮರದ ನೆರಳಿನ ಆಶ್ರಯವಿಲ್ಲ !
ಗೂಡಂಗಡಿಗಳ ಬಳಿಯಲ್ಲೇ ನಿಲ್ಲುತ್ತಿವೆ
ಜೊಲ್ಲು ಸುರಿಸುತ್ತ ... ನಿಟ್ಟುಸಿರು ಬಿಡುತ್ತಾ ...
ತಪ್ಪು ಯಾರದೋ ... ಶಿಕ್ಷೆ ಯಾರಿಗೋ ... ? ॥೩॥
ಸುಡುವ ಬಿಸಿಲಿಗೆ ತಂಪು ನೀಡಲು
ತಂಗಾಳಿ ... ಬೀಸಿ ಬರಲು ಮರಗಳು ಬೇಕೇ ಬೇಕು
ಅದಕ್ಕಾಗಿ ನಾವು ಗಿಡಗಳನ್ನು ನೆಡಲೇಬೇಕು
ನಮ್ಮ ಮಕ್ಕಳಿಗಾದರೂ ... ಸಿಗಲಿ
ಮರದಡಿಯ ನೆರಳು ! ॥೪॥
ನಾವು ಮಾಡಿದ ಮಹಾ ಪಾಪಕೆ
ಪ್ರಾಣಿ, ಪಕ್ಷಿಗಳಿಗೆ ಸಿಗದಿರಲಿ 'ಉರಿ ಶಾಪ'
ಕಡಿಮೆಯಾಗಲಿ ಈ ಉರಿ ಬಿಸಿಲಿನ ತಾಪ
ನಿಂತು ಹೋಗಲಿ ಮರಗಳನು ಕಡಿದು
ಉರುಳಿಸುವ ಮಾನವನ ಪ್ರತಾಪ !!! ॥೫॥