ಋಣ ತೀರಿತು ಇಂದು

ಅಂದು ಮನೆ ಬಾಗಿಲಿನ ತನಕ ಕಣ್ಣೀರಿಗೂ ಕರಗದೆ
ಹರಿದಿದ್ದ ಹೊಳೆಯ ಬಿರುಸು ನೀರಿನ,
ಕನ್ಯೆಯೆಂದು ಗೊತ್ತಿದ್ದೂ, ನನ್ನ ಬಟ್ಟೆಯೊಡನೆ ಸರಸವಾಡಲು ಯತ್ನಿಸಿ
ಬೇಸತ್ತು ತಮ್ಮ ಕುರುಹು ಬಿಟ್ಟ ಮುಳ್ಳುಗಳ,
ಕಾಲಿಗೆ ಚುಚ್ಚತೊಡಗಿದ ನಿನ್ನ ಕಲ್ಲುಗಳ ಋಣ ತೀರಿತು ಇಂದು

ಮನೆಯ ಹಂಚಿನೊಳಗೆ ತೂರಿಕೊಂಡು
ನನ್ನ ಮುಖವನ್ನು ಚುಂಬಿಸಲು ಯತ್ನಿಸಿದ ನಿನ್ನ ಹನಿಗಳ
ಪಾತ್ರೆಯನ್ನಿಟ್ಟರೂ ಚಿಮ್ಮುತ್ತಾ ಮುಖದೆಡೆಗೆ ಹಾರುತ್ತಾ ಬರುವ ಕಾಮಿಯ
ಮೊಗೆಮೊಗೆದು ಎಸೆದರೂ ಇಂಗದ ಕಾಡುವ ನಿನ್ನ ಪ್ರೀತಿಯ,
ಮಾಸದ ಬದುಕಿನ ಒರತೆಯ ಋಣ ತೀರಿತು ಇಂದು

ಕೇಳಬೇಕಿನಿಸಿದರೂ ದೂರ ದೂರಕ್ಕೂ ಕೇಳದ ಇಂಚರ
ಮುನಿದ ಕಾರಣ ಮರೆತು ಹೋದೆ ಎಂಬಂತೆ ಹಾಡಿಸಿದ್ದೆ ನೀನು
ಬೆಳಕಿನಲ್ಲೂ ಕಾಣದ ದೂರದಲ್ಲಿ ಉಲಿದಿದ್ದ ಪಕ್ಷಿಗಳ
ಕತ್ತಲ ಪರಿವೆಯಿಲ್ಲದೇ ಗುನುಗುಟ್ಟುತ್ತಾ ಬಳಿ ಬಂದಿದ್ದ ಜೀರುಂಡೆಯ
ಮುಗಿಯದ ಮೇಲುಬೀಳುಗಳ ಮತ್ತು ಬಯಕೆಗಳ ಋಣ ತೀರಿದು ಇಂದು

ಅಂದು ತೀರಿತ್ತು ಋಣ ನಿನ್ನ ಮನೆಯ ತುಳಸಿ ಗಿಡದ
ಇಂದು ತೀರಿದೆ ಋಣ ಪ್ರತಿ ಸೂರ್ಯೋದಯ ಸೂರ್ಯಾಸ್ತಗಳ