ಕಲ್ಪನಾ ವಿಲಾಸ

ಮನದಲ್ಲಿ ಇಂದೇಕೋ
ತಳಮಳ ಕ್ಷಣಗಳು
ಎಂದೋ ಒಂದು ದಿನ
ಎಲ್ಲೋ ನೋಡಿದ
ಸುಂದರಿಯ ಅಸ್ಪಷ್ಟ ಚಿತ್ರ

ಅವಳಿಗೂ ನನಗೂ
ಯಾವುದೇ ಸಂಬಂಧವಿಲ್ಲ
ಅನುಬಂಧವಿಲ್ಲ
ರಾಗ-ದ್ವೇಷಗಳ ಭಾವನೆಯಿಲ್ಲ
ಆದರೂ ಎಡೆಬಿಡದೆ ಕಾಡುತಿದೆ
ಅವಳ ನೆನಪು

ನೀರವ ರಾತ್ರಿಯಲಿ
ಮಿಂಚು ಹುಳದಂತೆ ಬಂದು
ಮರುಕ್ಷಣವೇ ಮರೆಯಾದ
ಅವರ ಹೆಸರು, ಊರು-ಕೇರಿ
ಯಾವುದೂ ಅರಿಯದು
ಎನ್ನ ಮನ

ಕೃಷ್ಣ ಸುಂದರಿಯ
ತುಂಟ ನಗು, ಓರೆ ನೋಟ
ವೈಯಾರದ ನಡೆ
ಬಳುಕುವ ಸೊಂಟ
ಮತ್ತೆ-ಮತ್ತೆ ಮನದಲ್ಲಿ
ಮೂಡಿದೆ ಇಂದು

ಸಂತೆಯಲ್ಲೋ, ಜಾತ್ರೆಯಲ್ಲೋ
ಬಸ್ ನಿಲ್ದಾಣದಲ್ಲೋ
ಯಾವ ತಾಣವದು
ಅವಳ ಭೇಟಿಯಾದದ್ದು
ಎಂಬುದು ಅರಿವಿಲ್ಲದಿದ್ದರೂ
ಕಾಡುತಿದೆ ಅವಳ ನೆನಪು
ತಲೆಬರಹವಿಲ್ಲದ ಕವಿತೆಯಂತೆ ....