ದೇವನ ನೆನೆಯುವೆ

ಬೆಳಗಾಗಿ ನಾನೆದ್ದು ದೇವನ ನೆನೆಯುವೆ

ಪರಮಸಂಪದದೊಡೆಯ ತೇಜಸ್ವಿಯ |

ಭೂತಾಯಿಯಂತೆ ಮತ್ತೆ ಆಗಸದಂತೆ

ಎಲ್ಲೆಲ್ಲೂ ಇರುವವಗೆ ಶರಣೆನ್ನುವೆ || ೧ ||

ಬುದ್ಧಿಗೊಡೆಯ ಜಗದೀಶನ ನೆನೆಯುವೆ

ಕರ್ಮಫಲದಾತ ಜ್ಯೋತಿರ್ಮಯನ |

ಮಂಗಳಮಯ ಸಕಲ ಲೋಕಪ್ರಿಯ

ದೇವಾಧಿದೇವನಿಗೆ ಶರಣೆನ್ನುವೆ || ೨ ||

ನಿತ್ಯವಿಜಯಿಯಾದ ಒಡೆಯನ ನೆನೆಯುವೆ 

ಸಕಲ ಲೋಕಾಧಾರ ತೇಜಸ್ವಿಯ |

ಪಾತಕಿಕಂಟಕ ಸತ್‌ಪ್ರಕಾಶ ಈಶ

ಸರ್ವಜ್ಞ ದೇವನಿಗೆ ಶರಣೆನ್ನುವೆ || ೩ ||

ಮನೋಧಿನಾಯಕ ದೇವನ ಬೇಡುವೆ

ಕೊಡು ಮತಿಯ ಕೊಡು ಸಕಲ ಸಂಪತ್ತಿಯ |

ಮಾಡೆನ್ನ ಸತ್ಪ್ರಜೆಯ ಬೆಳೆಸುತಲಿ ಸಜ್ಜನರ

ಸತ್ಯಕ್ಕಾಧೀಶ ದೇವ ಶರಣೆನ್ನುವೆ || ೪ ||

ಪರಮ ಬೆಳಕಿನೊಡೆಯ ದೇವನ ಬೇಡುವೆ

ಕರುಣಿಸು ರಕ್ಷೆ ಮೇಣ್ ಸಕಲಸುಖವ |

ಸಜ್ಜನರ ಸುಮತಿಯ ಪಾಲಿಸುವ ಮನವ

ನೀಡೆಂದು ಬೇಡುತ ಶರಣೆನ್ನುವೆ || ೫ ||

ಜಗದಂತರಾತ್ಮನೆ ವಿದ್ವಜ್ಜನರ ಬೇಡುವೆ

ನಿಮ್ಮಂತೆ ಎಮಗೂ ಸಿಗಲಿ ಸದ್ಬುದ್ಧಿ |

ಸಕಲಜಗವು ನಿನ್ನ ಹಾಡಿ ಹೊಗಳುತಲಿರಲು

ದಾರಿ ತೋರೈ ಪ್ರಭುವೆ ಶರಣೆನ್ನುವೆ || ೬ ||

-ಕ.ವೆಂ.ನಾಗರಾಜ್.

****************

ಆಧಾರ: ಋಗ್ವೇದದ ಮಂತ್ರಗಳು 7.41.1ರಿಂದ 5 - ಈ ರಚನೆಗೆ ಆಧಾರವಾಗಿದೆ. ಬೆಳಗಿನ ಸಮಯದಲ್ಲಿ ಹೇಳಲಾಗುವ ಈ ಮಂತ್ರಗಳಲ್ಲಿ ದೇವರನ್ನು ಸಂಪತ್ತಿನ ಅಧಿಪತಿ, ತೇಜಸ್ವಿ, ಸರ್ವವ್ಯಾಪಿ, ಪರಮಜ್ಞಾನಿ, ದಿವ್ಯಪ್ರಕಾಶಿ, ಕರ್ಮಫಲದಾತ, ಸರ್ವಜ್ಞ, ಜಗದಂತರಾತ್ಮ, ಇತ್ಯಾದಿ ವಿಶೇಷಣಗಳಿಂದ ನೆನೆಯಲಾಗುತ್ತದೆ. ಸದ್ಬುದ್ಧಿ, ಸುಮತಿ, ಸತ್ಸಂಗ, ಉತ್ಸಮ ಸಂಪತ್ತು, ಇತ್ಯಾದಿಗಳೊಂದಿಗೆ ಉತ್ತಮ ಸತ್ಪ್ರಜೆಯನ್ನಾಗಿ ರೂಪಿಸು ಎಂಬ ಕೋರಿಕೆ ಇದರಲ್ಲಿದೆ.