: ನಲಿನಲಿದ ವೀರಾಂಜನೇಯ :

ವೀರಾಂಜನೇಯ ಭಕ್ತಿ ಕುಸುಮಾಂಜಲಿ ೧

: ನಲಿನಲಿದ ವೀರಾಂಜನೇಯ :


ಮಲೆನಾಡ ಸೆರಗ ನಭ ಚುಂಬಿಸುವ ವೃಕ್ಷಗಳ
ತಳದಿ ಜಲಧಾರೆ ಭೋರೆಂದು ಬಳುಕುತಲಿರುವ
ಸಲಿಲದಿಕ್ಕೆಲ ಸುತ್ತ ಬೆಳೆದ ಹಸಿರಿನ ಮೇಲೆ
ನಲಿನಲಿದ ವೀರಾಂಜನೇಯ ||1||

ಅಲ್ಲಿ ಗಿಳಿವಿಂಡುಗಳ ಕೋಗಿಲೆಗಳಿಂಚರಕೆ
ನವಿಲು ಸಾರಂಗಗಳ ನೃತ್ಯವೈಭವ ಸೊಗಕೆ
ಮೈಮರೆತ ಪುಳಕದಲಿ ಭಾವ ತನ್ಮಯನಾಗಿ
ಕುಣಿಕುಣಿದ ವೀರಾಂಜನೇಯ ||2||

ಕನಕ ಲಂಕೆಯ ದಹಿಸಿ ಮೆರೆದ ಕೇಸರಿ ತನುಜ
ಕನಕಮಕ್ಕಿಯ ಹಸಿರ ಮಲೆಯ ಮರೆಯಲಿ ಇರುವ
ಘನಮಹಿಮ ಕಾರಡವಿ ಬಯಸಿ ಶರಣರಮೇಲೆ
ತಾನೊಲಿದ ವೀರಾಂಜನೇಯ ||3||

ಬೆಳೆದ ಕಬ್ಬಿನ ಜೊತೆಗೆ ಬಾಳೆಗೊನೆ ಸವಿಜೇನು
ಹಲಸುಸೊಳೆ ಸಿಹಿಮಾವು ಹೊಳೆದಡದ ಎಳನೀರು
ಹೊಳೆಯ ಸಿಹಿನೀರ್ ಕುಡಿದ ಕಪಿಬಳಗ ಮೇಳದಲಿ
ನಲಿನಲಿದ ವೀರಾಂಜನೇಯ ||4||

                                                                            -    ಸದಾನಂದ