ಬೆಳದಿಂಗಳ ಬಿಸಿಲು - ಲಕ್ಷ್ಮೀಕಾಂತ ಇಟ್ನಾಳ

ಬೆಳದಿಂಗಳ ಬಿಸಿಲು           - ಲಕ್ಷ್ಮೀಕಾಂತ ಇಟ್ನಾಳ

ಇನಿಯನ ನೋಡಲು ತರುಣಿಯ ಕಣ್ಣಲಿ

ಛಕ್ಕನೆ ಬೆಳ್ಳಿಯ ಮಿಂಚುಗಳು

ಒಲುಮೆಯ ಚಿಲುಮೆಯ ರಾಗರಂಗಿನ

ಹೂ ಭಾವ ಚಿಮ್ಮುವ ಹಣತೆಗಳು

ವರುಣನ ಕರುಣೆಗೆ ಕಾತರ ಇಳೆಗೆ

ಸ್ವಾತಿಯ ಮುತ್ತಿನ ಮಳೆಹನಿಗೆ

ಚಂದಿರ ತಾ ಹಣಿಕಿದ ಮೋಡದಿ,

ನಾಚಿಕೆ ವರಿಸಿತು ನೈದಿಲೆಗೆ

ನದಿಗಳ ಅಲೆಯಲಿ ಫಳ ಫಳ ಹೊಳೆಯುವ

ಸೂರ್ಯನ ಮಿಂಚಿನ ಕಣ್ಣುಗಳು

ಅರಳಿದ ಎದೆಯಲಿ ಪುಟಿ ಪುಟಿದೇಳುವ

ಮೀಟುವ ಊಟೆಯ ಭಾವಗಳು

ಹೃದಯದ ಪ್ರೀತಿಯ ಚಿಲುಮೆಯ ಸೆಲೆಯು

ಕಾದಿದೆ ಕುಳಿತು ಮೋಹದಲಿ,

ಓಡುವ ಬದುಕಿನ ಸಾಗುವ ಹೆಜ್ಜೆಗೆ,

ಕಾಣದು ಒಲುಮೆಯು, ದಾಹದಲಿ,

ಬೆಳದಿಂಗಳ ಮನೆ ತಂಪಿನ ಪರಿಸರ

ಮೆಲ್ಲಗೆ ಸುಡುಬಿಸಿಲಾಗುತಿದೆ

ನಿದಿರೆಯು ಬಾರದೆ ಕನಸುಗಳಿಲ್ಲದೆ

ನೆಮ್ಮದಿ ಬದುಕು ಮುರುಟುತಿದೆ

(ಚಿತ್ರಗಳ ಕೃಪೆ : ಅಂತರ್ಜಾಲ)